ଯାଜପୁର,୧୪ା୧୦(ହର୍ଷବର୍ଦ୍ଧନ ବେହେରା): ସମସ୍ତ ବ୍ୟକ୍ତିଙ୍କ ଜୀବନ ବହୁମୂଲ୍ୟ ବୋଲି ରାଜ୍ୟ ସରକାରଙ୍କ ବିଶ୍ୱାସ ରହିଛି। ତେଣୁ ବେଆଇନ କଳାପଥର ଖାଦାନରେ ଅତଡ଼ା ଖସି ପ୍ରାଣ ହରାଇଥିବା ଶ୍ରମିକଙ୍କ ପାଇଁ ଦାୟୀ ଅଧିକାରୀ ଓ ଖାଦାନ ମାଲିକଙ୍କ ନାମରେ ଆପରାଧିକ ମାମଲା ରୁଜୁ କରାଯାଇ ପାରିବ। ଯାଜପୁର ଜିଲା ଧର୍ମଶାଳା ତହସିଲ ଅନ୍ତର୍ଗତ ଲୁଣିବର ପଥର ଖାଦାନରେ ଅତଡା ଖସି ୨ ଜଣ ଶ୍ରମିକଙ୍କ ମୃତ୍ୟୁ ଘଟଣାରେ ଓଡ଼ିଶା ଲୋକାୟୁକ୍ତ ନିଜ ଆଡୁ(ସୋ ମୋଟୋ) ୨୫୦/୨୦୨୩ ମାମଲାର ବିଚାର କରି ଏଭଳି ରାୟ ଦେଇଛନ୍ତି। ଲୋକାୟୁକ୍ତ ସେକ୍ରେଟାରି (ଜୁଡିସିଆଲ)ଙ୍କ ପକ୍ଷରୁ ରାଜ୍ୟ ସରକାରଙ୍କ ଇସ୍ପାତ ଓ ଖଣି ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଏବଂ ଖାଦାନ ମାଲିକ ଜେନାପୁର ଥାନା ରଗଡିପୋଷି ଗ୍ରାମର ଗଙ୍ଗାଧର ଓଝାଙ୍କୁ ଆଇନ ଅନୁସାରେ ନୋଟିସ ଜାରି ହୋଇ ଜବାବ ଦେବାକୁ ନିର୍ଦ୍ଦେଶ ହୋଇଛି। ଏମାନେ ୬ ସପ୍ତାହ ମଧ୍ୟରେ ନିଜର ମତାମତ ରିପୋର୍ଟ ଦାଖଲ କରିବେ। ପରବର୍ତ୍ତୀ ଶୁଣାଣି ୨୩ା୧୧ା୨୦୨୩ରେ କରାଯିବ ବୋଲି ନିର୍ଦ୍ଦେଶରେ ଦର୍ଶାଯାଇଛି।
ଲୁଣିବର ପାହାଡ ପଥର ଖାଦାନରେ ଗତ ମେ ମାସ ୩୧ ତାରିଖ ମଧ୍ୟରାତ୍ରିରେ ଅପୁ ରାଉତ ଓ ଶାନ୍ତନୁ ଖିଲାର ନାମକ ୨ ଶ୍ରମିକଙ୍କ ମୃତ୍ୟୁ ହୋଇଥିଲା। ବେଆଇନ ଖାଦାନରୁ ଏକ୍ସାଭେଟର ସହାୟତାରେ କଳାପଥର ଉତ୍ତୋଳନ ସମୟରେ ଏହି ଘଟଣା ଘଟିଥିଲା। ଏଥିରେ ଅପୁ ରାଉତ ଅପରେଟର ଏବଂ ଶାନ୍ତନୁ ଖିଲାର ସହାୟକ ଭାବେ କାମ କରୁଥିଲେ। ଏକ ହେଭି ମେଶିନ ଖୋଲାଖୋଲି ଭାବେ ବେଆଇନ କଳାପଥର ଖାଦାନରେ ବ୍ୟବହାର ହେଉଥିଲା। ଦୁର୍ଭାଗ୍ୟପୂର୍ଣ୍ଣ ଯେ, ଉକ୍ତ ଘଟଣା ଘଟିବା ପରେ ମଧ୍ୟ ପ୍ରଶାସନିକସ୍ତରେ ବେଆଇନ ଖାଦାନ ବୋଲି ଦର୍ଶାଯାଇ ନ ଥିଲା। ଏନେଇ ଧରିତ୍ରୀ ଏବଂ ଓଡିଶାପୋଷ୍ଟରେ ତଥ୍ୟଭିତ୍ତିକ ଖବର ପ୍ରକାଶ ପାଇଥିଲା। ଏହି ଖବରକୁ ନେଇ ଓଡିଶା ଲୋକାୟୁକ୍ତ ନିଜ ଆଡୁ ମାମଲା ରୁଜୁ କରିବା ସହ ୫ା୬ା୨୦୨୩ରେ କଟକ ଭିିଜିଲାନ୍ସ ନିର୍ଦ୍ଦେଶକଙ୍କୁ ଘଟଣା ଉପରେ ତଦନ୍ତ କରି ଦୁଇ ମାସ ମଧ୍ୟରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ। ଭିଜିଲାନ୍ସ ନିର୍ଦ୍ଦେଶକ ୨୫ା୯ା୨୦୨୩ରେ ପ୍ରାଥମିକ ତଦନ୍ତ ରିପୋର୍ଟ ଲୋକାୟୁକ୍ତଙ୍କ ପାଖରେ ଦାଖଲ କରିଥିଲେ। ଉକ୍ତ ରିପୋର୍ଟରେ ସ୍ପଷ୍ଟ ଭାବେ ଦର୍ଶାଯାଇଛି ଯେ, ଲୁଣିବର ପାହାଡର ବିଏସ୍କ୍ୟୁ ନମ୍ବର-୫ ଖାଦାନର ଲିଜଧାରୀ ଗଙ୍ଗାଧର ଓଝା ବିଏସ୍କ୍ୟୁ ନମ୍ବର-୨ ଖାଦାନରେ ବେଆଇନ ଭାବେ କଳାପଥର ଉତ୍ତୋଳନ କରୁଥିବା ସମୟରେ ଦୁର୍ଘଟଣା ଘଟି ୨ ଜଣ ଶ୍ରମିକଙ୍କ ଜୀବନ ଯାଇଛି। ଏହି ବେଆଇନ କାର୍ଯ୍ୟରେ ୩୨୩ଡି୩ ନମ୍ବର ହାଇଡ୍ରୋଲିକ ଏକ୍ସାଭେଟର ମେଶିନ ବ୍ୟବହାର କରାଯାଇଥିଲା। ତଦନ୍ତକାରୀ ଅଧିକାରୀ ଆଲୋଚନା କରିବାକୁ ବାରମ୍ବାର ଉଦ୍ୟମ କରିଥିଲେ ହେଁ ଲିଜ୍ଧାରୀ ଗଙ୍ଗାଧର ଓଝା କୌଣସି ସହାୟତା କରି ନ ଥିଲେ। ଏପରିକି ତଦନ୍ତକୁ ମନା କରି ଦେଇଥିଲେ। ଏହାବାଦ କୌଣସି ସରକାରୀ ଅଧିକାରୀ ଗଙ୍ଗାଧର ଓଝାଙ୍କ ଏହି ବେଆଇନ ଖାଦାନ ସମ୍ପର୍କରେ ସୂଚନା ଦେଇ ନ ଥିଲେ। ତେଣୁ ଲୋକାୟୁକ୍ତ ସମ୍ପୃକ୍ତ ସରକାରୀ ଅଧିକାରୀଙ୍କୁ ଦାୟୀ କରିବା ସହ ଲିଜ୍ଧାରୀ ଗଙ୍ଗାଧର କେମିତି ଖୋଲାଖୋଲି ଭାବେ ହେଭି ହାଇଡ୍ରୋଲିକ ଏକ୍ସାଭେଟର ମେଶିନ ବ୍ୟବହାର କରିପାରିଲେ ବୋଲି ପ୍ରଶ୍ନ କରିଛନ୍ତି। ପ୍ରାକୃତିକ ଖଣି ସମ୍ପଦକୁ ସୁରକ୍ଷା ଦେବାକୁ ସରକାରୀ ଅଧିକାରୀ ନିୟୋଜିତ ଥାଇ ମଧ୍ୟ ସେମାନେ ଏଥିରେ ବିଫଳ ହୋଇଛନ୍ତି ବୋଲି ଲୋକାୟୁକ୍ତଙ୍କ ପକ୍ଷରୁ ଉଦ୍ବେଗ ପ୍ରକାଶ କରାଯାଇଛି।
