ଧାମନଗର,୧୬।୧୨(ସ୍ବ.ପ୍ର.): ଭଦ୍ରକ ଜିଲା ଧାମନଗର ତହସିଲଦାର କ୍ଷୀରୋଦ ଚନ୍ଦ୍ର ପଣ୍ଡା ଓ ଆନନ୍ଦପୁର ପଞ୍ଚାୟତର ପୂର୍ବତନ ସରପଞ୍ଚ ଶରତ ଚନ୍ଦ୍ର ମାଝିଙ୍କ ବିରୋଧରେ ଧାମନଗର ଥାନାରେ ମାମଲା (ନଂ. ୪୪୯/୨୨) ରୁଜୁ ହୋଇଛି। ଆନନ୍ଦପୁର ପଞ୍ଚାୟତର ବୈତରଣୀ ନଦୀ ଉତେଇପୁର-୨ ବାଲିଘାଟରୁ ବେଆଇନ ଭାବେ ବାଲି ଉଠାଣ ଓ ଚାଲାଣ ନେଇ ସ୍ଥାନୀୟ ଯୁବକ ମନୋଜ କୁମାର ଦାସଙ୍କ ଅଭିଯୋଗକୁ ଭିତ୍ତିକରି ଗୁରୁବାର ସେମାନଙ୍କ ବିରୋଧରେ ମାମଲା ରୁଜୁ କରିଛି ପୋଲିସ। ପ୍ରକାଶ ଯେ, ଉତେଇପୁର-୨ ବାଲିଘାଟକୁ ଶରତ ୨୦୧୭ରେ ନିଲାମ ନେଇଥିଲେ। ୨୦୨୨ ମାର୍ଚ୍ଚ ୩୧ ଯାଏ ବାଲିଘାଟ ଲିଜ୍ ଅବଧି ଥିଲା। ମାର୍ଚ୍ଚ ୩୧ରେ ସିଟିଓ (କନ୍ସେଣ୍ଟ ଟୁ ଅପରେଟ) ଅବଧି ସରିଥିବାରୁ ଏହି ବାଲିଘାଟରୁ ଆଉ ବାଲି ଉତ୍ତୋଳନ କରାଯିବା କଥା ନୁହେଁ। ଏନେଇ ତହସିଲ ପକ୍ଷରୁ ଶରତଙ୍କୁ ଅବଗତ କରାଯିବାର ଥିଲା। ଏଥିସହ ଶରତଙ୍କୁ ଦିଆଯାଇଥିବା ଟ୍ରାଞ୍ଜିଟ ପାସ୍ ଫେରସ୍ତ ନେବାର ଥିଲା। ହେଲେ ତହସିଲଦାର ପଣ୍ଡା ଏ ବାବଦରେ ନିରବ ରହି ବେଆଇନ ବାଲି ଉତ୍ତୋଳନକୁ ସମର୍ଥନ କରୁଥିବା ଅଭିଯୋଗ ହୋଇଥିଲା। ଏପରିକି ଏପ୍ରିଲରେ ଏ ସମ୍ପର୍କରେ ଗାଁ ଲୋକେ ତହସିଲଦାରଙ୍କୁ ବାରମ୍ବାର ଜଣାଇଥିଲେ ବି ସେ ନିରବ ରହିଥିଲେ। ପରେ ମନୋଜ ବାଲିଘାଟର ନିଲାମ ସମ୍ପର୍କରେ ସମସ୍ତ ତଥ୍ୟର ସାର୍ଟିଫାଏଡ୍ କପି ମାଗିଥିଲେ। ତହସିଲ ପକ୍ଷରୁ ଏଥିଲାଗି ୭୨ଦିନ ସମୟ ନିଆଯାଇଥିଲା। ସାର୍ଟିଫାଏଡ୍ କପି ପ୍ରଦାନ ପରେ ବାଲିଘାଟ ପାଇଁ ସିଟିଓର ଅବଧି ମାର୍ଚ୍ଚ ୩୧ରେ ଶେଷ ହୋଇଥିବା ଏଥିରୁ ଜଣାପଡ଼ିଥିଲା। ଏହାପରେ ସେ ପ୍ରଦୂଷଣ ନିୟନ୍ତ୍ରଣ କାର୍ଯ୍ୟାଳୟକୁ ଆର୍ଟିଆଇ ମାଗି ଜାଣିବାକୁ ପାଇଲେ ଯେ, ଉତ୍ତେଇପୁର-୨ ବାଲିଘାଟକୁ ଆଉ ସିଟିଓ ପ୍ରଦାନ କରାଯାଇ ନାହିଁ କି ପୁରୁଣା ସିଟିଓର ନବୀକରଣ ହୋଇନାହିଁ। ସମସ୍ତ ତଥ୍ୟକୁ ଭିତ୍ତିକରି ମନୋଜ ଅନ୍ଲାଇନ ପ୍ଲାଟଫର୍ମରେ ଏତଲା ଦେଇଥିଲେ। ମାଇନର ମିନେରାଲ ଡେଭଲପମେଣ୍ଟ ଆଣ୍ଡ ରେଗୁଲେଶନ ଆକ୍ଟ, ଇନଭାଇରନମେଣ୍ଟ ପ୍ରୋଟେକ୍ସନ ଆକ୍ଟ, ୱାଟର ଆକ୍ଟ, ଏୟାର ପଲ୍ୟୁଶନ ଆକ୍ଟ ଏବଂ ସରକାରୀ ସମ୍ପତ୍ତି ଚୋରି ଭଳି ସଙ୍ଗୀନ ଦଫାରେ ମାମଲା ରୁଜୁ ପାଇଁ ସେ ନିବେଦନ କରିଥିଲେ। ପୋଲିସ କେବଳ ଚୋରି ଆକ୍ଟରେ ଦଫା ଲଗାଇଥିବା ମନୋଜ କହିଛନ୍ତି। ଘଟଣାର ତଦନ୍ତ ପରେ ଆବଶ୍ୟକ ହେଲେ ଅନ୍ୟ ଦଫା ସବୁ ଲଗାଯିବ ବୋଲି ଥାନାଧିକରୀ ବନମାଳୀ ବାରିକ କହିଛନ୍ତି। ଏ ସମ୍ପର୍କରେ ତହସିଲଦାର ପଣ୍ଡା କହିଛନ୍ତି, ଉକ୍ତ ବାଲିଘାଟର ଲିଜ୍ ଅବଧି ସରିବା ପୂର୍ବରୁ ଶରତଙ୍କୁ ମାର୍ଚ୍ଚ ୨୨ରେ ଲିଖିତ ଭାବେ ଅବଗତ କରାଯାଇଥିଲା। ସିଟିଓ ନବୀକରଣ ପାଇଁ କୁହାଯାଇଥିଲା। ସେ ମାର୍ଚ୍ଚ ୩୦ ଭିତରେ ନବୀକରଣ ନ କରିବାରୁ ୩୧ରେ ଅବଧି ସରିବା ପରେ ସେଠାରୁ ବାଲି ଉଠାଣ ବନ୍ଦ କରାଯାଇଥିଲା। ପରେ ସେ ଓ୍ବାଇ ଫର୍ମର ଅପବ୍ୟବହାର କରି ବାଲି ଉଠାଣ କରିଥିଲେ ଦଣ୍ଡ ପାଇବେ। ତେବେ ତାଙ୍କ ନାଁରେ ମାମଲା ରୁଜୁ କରାଯାଇଥିବା ନେଇ କୌଣସି ନୋଟିସ୍ ଆସି ନ ଥିବା ତହସିଲଦାର କହିଛନ୍ତି।
