ନୂଆଦିଲ୍ଲୀ,୧୪ ।୩: କେନ୍ଦ୍ର ସରକାରଙ୍କ ୩ କୃଷି ଆଇନକୁ ବିରୋଧ କରି ଦିଲ୍ଲୀ ସୀମାରେ ବିଭିନ୍ନ ରାଜ୍ୟର କୃଷକମାନେ ୧୦୦ ଦିନରୁ ଊର୍ଦ୍ଧ୍ୱ ସମୟ ହେଲା ଆନ୍ଦୋଳନରେ ବସିଛନ୍ତି । ୧୦ଥରରୁ ଅଧିକ ଥର କେନ୍ଦ୍ର ସରକାରଙ୍କ ସହ କୃଷକନେତାମାନେ କଥା ହୋଇଥିଲେ ମଧ୍ୟ ଏହାର କୌଣସି ସମାଧାନ ଏପର୍ଯ୍ୟନ୍ତ ବାହାରି ପାରିନାହିଁ । ଫଳରେ ଆଗାମୀ ଦିନରେ ଆନ୍ଦୋଳନକୁ ଆହୁରି ତିବ୍ର କରିବା ଯୋଜନାରେ ଅଛନ୍ତି କୃଷକ । ଏହାକୁ ନେଇ କୁଣ୍ଡଳି ସୀମାରେ ଗୋଟିଏ ଦିନ ପୂର୍ବରୁ କୃଷକମାନେ ଆନ୍ଦୋଳନ ସ୍ଥଳରେ ଜାତୀୟ ରାଜପଥ ଉପରେ ବୋଲୱେଲ ବସାଇବା ଓ ପକ୍କା ଘର ନିର୍ମାଣ କରିବା ଦେଖାଯାଇଛି । ଏବେ ଏହାକୁ ନେଇ ଏନ୍ଏଚ୍ଏଆଇ ଓ ନଗରପାଳିକା କୃଷକଙ୍କ ବିରୋଧରେ ମାମଲା କରିଛି । ଏଥିରେ କାହାରି ନାଁ ନ ଥିବା ବେଳେ ପୋଲିସ କହିଛି ଯାଞ୍ଚ ପରେ ସବୁ ଜଣାପଡିବ । ଏହାରି ଭିତରେ କୃଷକଙ୍କ ବିରୋଧକୁ ଦେଖି ଭାରତୀୟ ଜନତା ପାର୍ଟି(ଭାଜପା) ନେତା ସେମାନଙ୍କ କାର୍ଯ୍ୟକ୍ରମ ବନ୍ଦ କରି ଦେଇଛନ୍ତି । ପଞ୍ଜାବରେ ଭାଜପା ନେତାଙ୍କୁ ଘେରାଉ କରାଯାଇଥିବା ବେଳେ ହରିୟାଣାରେ ବିରୋଧ ଆଶଙ୍କା କରି ଭାଜପା ନେତା ସେମାନଙ୍କର କାର୍ଯ୍ୟକ୍ରମକୁ ରଦ୍ଦ କରି ଦେଇଛନ୍ତି ।
