ଲକ୍ଷ୍ନୌ,୧୫।୪: କରୋନା ପ୍ରକୋପ ଦିନକୁ ଦିନ ବଢ଼ିବାରେ ଲାଗିଛି। କରୋନାର ଏହି ନୂଆ ଷ୍ଟ୍ରେନ୍ ଏବେ ଭୟଙ୍କର ରୂପ ଧାରଣ କରିଛି। ଯେଉଁଠି କରୋନାକୁ ନେଇ ସରକାର ଅଧିକ ସଜାଗ ରହିଛନ୍ତି ବୋଲି କହୁଛନ୍ତି ସେଠାରେ ସ୍ବାସ୍ଥ୍ୟସେବାର ନଗ୍ନ ଉଦାହରଣ ଦେଖିବାକୁ ମିଳୁଛି। ପ୍ରାୟ ରାଜ୍ୟରେ ଏଭଳି ସ୍ଥିତି ହୋଇଯାଇଛି ଯେ, ଚିକିତ୍ସା ପାଇଁ ହସ୍ପିଟାଲରେ ବେଡ୍ ଖାଲି ନାହିଁ। ଇତିମଧ୍ୟରେ ଉତ୍ତରପ୍ରଦେଶ ଲକ୍ଷ୍ନୌରୁ ଏଭଳି ଏକ ଘଟଣା ସାମ୍ନାକୁ ଆସିଛି, ଯେଉଁଠାରେ ଜଣେ ୭୦ ବର୍ଷୀୟ କରୋନା ଆକ୍ରାନ୍ତ ବ୍ୟକ୍ତି ସାଙ୍ଗରେ ଅକ୍ସିଜେନ ସିଲିଣ୍ଡର ଧରି ହସ୍ପିଟାଲରୁ ହସ୍ପିଟାଲ ବୁଲିଥିଲେ। ହେଲେ ତାଙ୍କୁ କୌଣସି ହସ୍ପିଟାଲରେ ବେଡ୍ ମିଳ ନ ଥିଲା ଶେଷରେ ତାଙ୍କୁ ଘରୁ ଫେରିବାକୁ ପଡ଼ିଥିଲା।
ସୂଚନାଯୋଗ୍ୟ, ଲକ୍ଷ୍ନୌର ଅଲିଗଞ୍ଜରେ ରହୁଥିବା ବୃଦ୍ଧ ସୁଶୀଲ କୁମାର ଶ୍ରୀବାସ୍ତବ ପୂର୍ବରୁ ଡାଇବେଟିସ୍ ଓ ରାକ୍ତ ଚାପରେ ପୀଡ଼ିତ ଥିବା ବେଳେ ବୁଧବାର ସେ କରୋନାରେ ଆକ୍ରାନ୍ତ ହୋଇଥିଲେ। ତାଙ୍କୁ ନିଶ୍ୱାସ ନେବାରେ କଷ୍ଟ ଅନୁଭବ ହେଉଥିବା ବେଳେ ଅକ୍ସିଜେନ ଲେଭଲ ତଳକୁ ଖସିଯାଇଥିଲା। ଫଳରେ ଘର ଲୋକ ତାଙ୍କୁ ହସ୍ପିଟାଲରେ ଭର୍ତ୍ତି କରିବାକୁ ନିଷ୍ପତ୍ତି ନେଇଥିଲେ। କିନ୍ତୁ କୌଣସି ହସ୍ପିଟାଲରେ ବେଡ୍ ଖାଲି ନ ଥିବାରୁ ଉକ୍ତ ବୃଦ୍ଧ ଆକ୍ରାନ୍ତଙ୍କୁ ଭର୍ତ୍ତି କରାଯାଇ ପାରି ନ ଥିଲା। ଦିନସାରା ସାଙ୍ଗରେ ସିଲିଣ୍ଡର ଧରି ଏ ହସ୍ପିଟାଲରୁ ସେ ହସ୍ପିଟାଲ ଧାଇଁଥିଲେ। ହେଲେ କୌଣସି ସୁଫଳ ମିଳି ନ ଥିଲା। ଶେଷରେ ପରିବାର ଲୋକେ ନିରାଶ ହୋଇ ଘରକୁ ଫେରିଥିଲେ।
