ଡେରାବିଶ, ୬।୨(ସ୍ବ.ପ୍ର.): ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ପ୍ରଥମ ପର୍ଯ୍ୟାୟ ଭୋଟ୍ ଫେବୃୟାରୀ ୧୬ରେ ଡେରାବିଶ ବ୍ଲକରେ ଅନୁଷ୍ଠିତ ହେବ । ଏଥିପାଇଁ ଆଉମାତ୍ର ଅଳ୍ପ ଦିନ ବାକି ରହିଥିବା ବେଳେ ବିଭିନ୍ନ ରାଜନୈତିକ ଦଳର ପ୍ରାର୍ଥୀମାନେ ଘରକୁ ଘର ବୁଲି ପ୍ରଚାରକୁ ଜୋର୍ଦାର୍ କରିଛନ୍ତି । ଏହି ବ୍ଲକ ଅଧୀନରେ ୧୨ ନଂ. ଜିଲା ପରିଷଦ ଜୋନ୍ ପାଇଁ ୩ ପ୍ରମୁଖ ଦଳ ବିଜେଡି, ଭାଜପା ଓ କଂଗ୍ରେସର ପ୍ରାର୍ଥୀମାନେ ନିର୍ବାଚନ ମଇଦାନକୁ ଓହ୍ଲାଇଛନ୍ତି। ବିଜେଡି ପ୍ରାର୍ଥୀ ରାଜ୍ୟ ସରକାରଙ୍କ ଜନମଙ୍ଗଳ ଯୋଜନାକୁ ନେଇ ଭୋଟରଙ୍କ ପାଖରେ ପହଞ୍ଚତ୍ ଥିବା ବେଳେ ଭାଜପା କେନ୍ଦ୍ର ସରକାରଙ୍କ ଯୋଜନାର ଗୁଣଗାନ କରୁଛନ୍ତି । ଅନ୍ୟପକ୍ଷେ କଂଗ୍ରେସ ରାଜ୍ୟ ଓ କେନ୍ଦ୍ର ସରକାରଙ୍କ ଦୋଷତ୍ରୁଟିକୁ ନେଇ ଭୋଟରଙ୍କ ପାଖକୁ ଯାଉଛନ୍ତି ।
ସୂଚନା ଅନୁଯାୟୀ ଏହି ଜୋନ୍ରେ ୭ ପଞ୍ଚାୟତ ରହିଛି । ସମୁଦାୟ ଭୋଟରଙ୍କ ସଂଖ୍ୟା ୩୬ହଜାର ୬୭୬ । ସେଥିମଧ୍ୟରୁ ୧୭ହଜାର ୭୪୭ ଜଣ ମହିଳା ଭୋଟର ଥିବା ବେଳେ ପୁରୁଷ ଭୋଟରଙ୍କ ସଂଖ୍ୟା ୧୮ହଜାର ୯୨୯ । ସମୁଦାୟ ୧୨୬ବୁଥ୍ରେ ଏହି ଭୋଟରମାନେ ନିଜର ମତଦାନ ଅଧିକାର ସାବ୍ୟସ୍ତ କରିବେ । ଏଥିପାଇଁ ଜିଲା ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଇଛି । ଚଳିତ ନିର୍ବାଚନରେ ବିଜେଡି ପକ୍ଷରୁ ଜଣେ ଅବସରପ୍ରାପ୍ତ ଅଧିକାରୀ ଧନେଶ୍ୱର ସେଠୀଙ୍କୁ ପ୍ରାର୍ଥୀ କରାଯାଇଥିବା ବେଳେ ଭାଜପା ପକ୍ଷରୁ ତପନ ମଲ୍ଲିକ ଓ କଂଗ୍ରେସ ତରଫରୁ ସସ୍ମିତା ଜେନା ପ୍ରାର୍ଥୀ ହୋଇଛନ୍ତି । ବିଜେଡି ପ୍ରାର୍ଥୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିଭିନ୍ନ ଯୋଜନା ଓ ମହିଳାଙ୍କୁ ସ୍ବାବଲମ୍ବୀ କରିବା ପାଇଁ ରାଜ୍ୟ ସରକାରଙ୍କ ବଳିଷ୍ଠ ପଦକ୍ଷେପର ବାର୍ତ୍ତା ପ୍ରତି ଭୋଟରଙ୍କ ନିକଟରେ ପହଞ୍ଚାଉଥିବା ଦେଖିବାକୁ ମିଳିଛି । ଏଥର ନିର୍ବାଚନରେ ତାଙ୍କୁ ସଫଳତା ମିଳିବ ବୋଲି ସେ ଦାବି କରିଛନ୍ତି। ଏ ସଂକ୍ରାନ୍ତରେ ଧନେଶ୍ୱର କହିଛନ୍ତି, ରାଜ୍ୟର ବିକାଶ ଧାରାରେ ଡେରାବିଶକୁ ସାମିଲ କରିବା ପାଇଁ ମୁଁ ସଂକଳ୍ପବଦ୍ଧ ା ଭାଜପା ପ୍ରାର୍ଥୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିଭିନ୍ନ ଲୋକାଭିମୁଖୀ ଯୋଜନାକୁ ନେଇ ଭୋଟରଙ୍କୁ ବୁଝାଉଛନ୍ତି। ଏଥର ନିର୍ବାଚନରେ ସେ ସଫଳତା ପାଇବେ ବୋଲି ଆଶାବାଦୀ ଥିବା କହିଛନ୍ତି। ବିଜୟୀ ହେଲେ ସାଧାରଣ ଲୋକଙ୍କ ପାଇଁ ଆସୁଥିବା ପ୍ରଧାନମନ୍ତ୍ରୀ ଆବାସ ଯୋଜନା ଦୁର୍ନୀତିର ପର୍ଦ୍ଦାଫାଶ କରିବେ ବୋଲି କହିଛନ୍ତି । ଅପରପକ୍ଷେ କଂଗ୍ରେସ ପ୍ରାର୍ଥୀ ସସ୍ମିତା କହିଛନ୍ତି, ଗରିବ ହିତାଧିକାରୀଙ୍କ ପାଇଁ ଆସୁଥିବା ବାସଗୃହ ଯୋଜନା ସମ୍ପୂର୍ଣ୍ଣ ବାଟମାରଣା ହୋଇଥିବା ବେଳେ ବୟସ୍କ ପାଇଁ ଆସୁଥିବା ଭତ୍ତା ପାଇବାରୁ ଏହି ଜୋନ୍ର ବହୁ ହିତାଧିକାରୀ ବଞ୍ଚତ୍ତ ହୋଇଛନ୍ତି । ୧୪୦ ବର୍ଷର କଂଗ୍ରେସ ଦଳ ସବୁ ସମୟରେ ସାଧାରଣ ଲୋକଙ୍କ ସହିତ ଥିଲା, ଅଛି ଓ ଭବିଷ୍ୟତରେ ରହିବ । ଚଳିତ ନିର୍ବାଚନରେ ତାଙ୍କ ପ୍ରତି ସାଧାରଣ ଭୋଟରଙ୍କ ସମର୍ଥନ ଯଥେଷ୍ଟ ଅଧିକ ରହିଛି ବୋଲି ସସ୍ମିତା କହିଛନ୍ତି।
