ନୂଆଦିଲ୍ଲୀ, ୪।୪ : ଅର୍ଥନୈତିକ ସଙ୍କଟ ଦେଇ ଗତି କରୁଥିବା ଶ୍ରୀଲଙ୍କାର ସମସ୍ତ କ୍ୟାବିନେଟ ସଦସ୍ୟ ରାତି ଅଧାରେ ଇସ୍ତଫା ଦେଇଛନ୍ତି। ଗଣମାଧ୍ୟମ ରିପୋର୍ଟ ଅନୁଯାୟୀ, ଶ୍ରୀଲଙ୍କା ସରକାରଙ୍କ ସମସ୍ତ ମନ୍ତ୍ରୀ ଇସ୍ତଫା ଦେଇଛନ୍ତି, କିନ୍ତୁ ପ୍ରଧାନମନ୍ତ୍ରୀ ମହିନ୍ଦା ରାଜପକ୍ଷେ ପ୍ରଧାନମନ୍ତ୍ରୀ ପଦରେ ରହିଛନ୍ତି। ଶ୍ରୀଲଙ୍କାରେ ଜାରି ରହିଥିବା ୩୬ ଘଣ୍ଟିଆ ଦେଶବ୍ୟାପୀ କର୍ଫ୍ୟୁ ସେମାବାର ସକାଳ ୬ଟାରେ ଶେଷ ହୋଇଛି। ଏହାକୁ ଲୋକେ ଉଲ୍ଲଂଘନ କରି ପ୍ରଦର୍ଶନ କରିଥିଲେ। ଅର୍ଥନୈତିକ ସଙ୍କଟ ପରେ ସରକାର ବିରୋଧୀ ରାଲି ହୋଇଥିବାରୁ ପୋଲିସ ଲୁହବୁହା ଗ୍ୟାସ ଏବଂ ଓ୍ବାଟର କ୍ୟାନନ ପ୍ରୟୋଗ କରିଛନ୍ତି।
ଏଥି ସହିତ ଆର୍ଥିକ ସଙ୍କଟ ଦେଇ ଗତି କରୁଥିବା ଶ୍ରୀଲଙ୍କାର ଏହି ସମସ୍ୟାର ସମାଧାନ ପାଇଁ ଏକ ସର୍ବଦଳୀୟ କାର୍ଯ୍ୟବାହକ ସରକାର ଗଠନ ପାଇଁ ଦାବି ବୃଦ୍ଧି ପାଇବାରେ ଲାଗିଛି।
ଶ୍ରୀଲଙ୍କା ଇତିହାସରେ ସବୁଠାରୁ ଖରାପ ଆର୍ଥିକ ସଙ୍କଟ ଦେଇ ଗତି କରୁଛି । ଗତ କିଛି ସପ୍ତାହ ଧରି ଦେଶର ଲୋକମାନେ ଇନ୍ଧନ ଏବଂ ରନ୍ଧନ ଗ୍ୟାସ ପାଇଁ ଲମ୍ବା ଧାଡିରେ ଛିଡା ହେବା ସହିତ ଅତ୍ୟାବଶ୍ୟକ ଦ୍ରବ୍ୟର ଅଭାବର ସମ୍ମୁଖୀନ ହେବାରେ ଲାଗିଛନ୍ତି। ରାଷ୍ଟ୍ରପତି ଗୋଟାବାୟୋ ରାଜପେକ୍ଷ ଶୁକ୍ରବାର ବିଳମ୍ବିତ ରାତିରେ ଏକ ସ୍ବତନ୍ତ୍ର ଗେଜେଟ ବିଜ୍ଞପ୍ତି ଜାରି କରି ଏପ୍ରିଲ ୧ ତାରିଖରୁ ଶ୍ରୀଲଙ୍କାରେ ଜରୁରୀକାଳୀନ ପରିସ୍ଥିତି ଲାଗୁ କରିଥିଲେ। ସରକାର ଶନିବାର ସନ୍ଧ୍ୟା ୬ ଟାରୁ ସୋମବାର ସକାଳ ୬ ଟା ପର୍ଯ୍ୟନ୍ତ ଦେଶବ୍ୟାପୀ କର୍ଫ୍ୟୁ ଘୋଷଣା କରିଥିଲେ।
ସୋସିଆଲ ମିଡିଆରେ ଜନସାଧାରଣଙ୍କ ପ୍ରବେଶକୁ ବନ୍ଦ କରିବା ପାଇଁ ସରକାର ରବିବାର ଦିନ ଇଣ୍ଟରନେଟ ସେବାକୁ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି ଏବଂ ଲୋକଙ୍କୁ ଗୋଟିଏ ସ୍ଥାନରେ ଏକାଠି ହେବାକୁ ବାରଣ କରିଛନ୍ତି। ଅପରପକ୍ଷରେ ହ୍ବାଟସ ଆପ, ଟୁଇଟର, ଫେସବୁକ ଏବଂ ଇନଷ୍ଟାଗ୍ରାମ ଭଳି ସୋସିଆଲ ମିଡିଆ ପ୍ଲାଟଫର୍ମରେ ଲଗାଯାଇଥିବା ପ୍ରତିବନ୍ଧକକୁ ରବିବାର ଶ୍ରୀଲଙ୍କା ସରକାର ହଟାଇ ଦେଇଛନ୍ତି। ଦେଶବ୍ୟାପୀ ଜନସାଧାରଣଙ୍କ ଜରୁରୀକାଳୀନ ପରିସ୍ଥିତି ଏବଂ ଦେଶରେ ଆର୍ଥିକ ସଙ୍କଟ ବଢ଼ି଼ିବାରେ ଲାଗିଥିବାବେଳେ ସରକାର ବିରୋଧୀ ପ୍ରତିବାଦ ଯୋଗୁ ପୂର୍ବରୁ ସୋସିଆଲ ମିଡିଆକୁ ବାରଣ କରାଯାଇଥିଲା।
ଏହି ପ୍ରତିବନ୍ଧକକୁ ହଟାଇବା ସମ୍ପର୍କରେ ଜଣେ ଅଧିକାରୀ କହିଛନ୍ତି ଯେ ଫେସବୁକ, ଟୁଇଟର, ୟୁଟ୍ୟୁବ, ଇନଷ୍ଟାଗ୍ରାମ, ଟିକଟକ, ସ୍ନାପଚାଟ, ହ୍ବାଟସ ଆପ, ୍ଓ୍ବାଇବର, ଟେଲିଗ୍ରାମ ଏବଂ ଫେସବୁକ ମେସେଞ୍ଜରର ସେବା ୧୫ ଘଣ୍ଟା ପରେ ପୁନଃସ୍ଥାପିତ ହୋଇଛି।
