ବ୍ରହ୍ମପୁର ଅଫିସ,୧୫।୩: ବ୍ରହ୍ମପୁର ମହାନଗର ନିଗମ(ବିଇଏମ୍ସି) ପକ୍ଷରୁ ମଙ୍ଗଳବାର ବିଇଏମ୍ସି ନୂତନ ସମ୍ମିଳନୀ କକ୍ଷରେ ଜାତୀୟ ସହରାଞ୍ଚଳ ସ୍ବାସ୍ଥ୍ୟ ମିଶନ (ଏନୟୁଏଚ୍ଏମ୍) ଦ୍ୱାରା ଏକ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଛି। ଶିବିରରେ ମେୟର ସଂଘମିତ୍ରା ଦଳେଇ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ସହରାଞ୍ଚଳ ସ୍ବାସ୍ଥ୍ୟ ମିଶନ ସମ୍ପର୍କରେ ଜାଣିବା ସହ ଏହାଦ୍ୱାରା ସମ୍ପାଦିତ ସମସ୍ତ କାର୍ଯ୍ୟକ୍ରମକୁ ପ୍ରଶଂସା କରିଥିଲେ। ଆସନ୍ତା ଦିନରେ ଲାଞ୍ଜିପଲୀଠାରେ ଏକ ନୂତନ ସହରାଞ୍ଚଳ ସ୍ବାସ୍ଥ୍ୟ ଓ ଆରୋଗ୍ୟ କେନ୍ଦ୍ର ପ୍ରତିଷ୍ଠା କରିବା ପାଇଁ ମେୟର ପ୍ରତିଶ୍ରୁତି ଦେଇଥିଲେ। ଅନ୍ୟମାନଙ୍କ ମଧ୍ୟରେ ଡେପୁଟି ମେୟର ଇ. ବିବେକ ରେଡ୍ଡୀ, ଜିଲା ମୁଖ୍ୟ ଚିକିତ୍ସାଧିକାରୀ ଡ.ଉମା ଶଙ୍କର ମିଶ୍ର, ଡେପୁଟି କମିଶନର ବିନୋଦ କୁମାର ବେହେରା, ଆଶୀର୍ବାଦ ପରିଡା, ନଗର ଚିକିତ୍ସାଳୟ ଜିଲା ଚିକିତ୍ସାଧିକାରୀ ଡ.ବିଶ୍ୱମ୍ବର ବେହେରା, ଅତିରିକ୍ତ ଜିଲା ସହରାଞ୍ଚଳ ଜନସ୍ବାସ୍ଥ୍ୟ ଅଧିକାରୀ ଡ.ମନୋଜ କୁମାର ପଣ୍ଡା, ସହରାଞ୍ଚଳ ଜନସ୍ବାସ୍ଥ୍ୟ ଅଧିକାରୀ ଡ.ମାନସ ରଞ୍ଜନ ପଣ୍ଡା ପ୍ରମୁଖ ମଞ୍ଚାସୀନ ଥିଲେ।
ବ୍ରହ୍ମପୁରରେ ସହରାଞ୍ଚଳ ସ୍ବାସ୍ଥ୍ୟ କେନ୍ଦ୍ର ସମ୍ପର୍କରେ ସବିଶେଷ ତଥ୍ୟ ଏନ୍ୟୁଏଚ୍ଏମ୍ ପକ୍ଷରୁ ଉପସ୍ଥାପନ କରାଯାଇଥିଲା। ଏନ୍ୟୁଏଚ୍ଏମ୍ ପକ୍ଷରୁ କୁହାଯାଇଛି, ସହରରେ ଜାତୀୟ ଗୁଣାତ୍ମକମାନ ନିର୍ଦ୍ଧାରଣ ପ୍ରମାଣ ପତ୍ର ପ୍ରାପ୍ତ ୭ ସହରାଞ୍ଚଳ ସ୍ବାସ୍ଥ୍ୟକେନ୍ଦ୍ର ଥିବା ବେଳେ ଅନ୍ତର୍ଜାତୀୟ ମାନ ନିର୍ଦ୍ଧାରଣ ପ୍ରମାଣପତ୍ର ପ୍ରାପ୍ତ ୮ଟି ସହରାଞ୍ଚଳ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ମଧ୍ୟ ରହିଛି। ବର୍ଷ ଶେଷ ସୁଦ୍ଧା ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଦ୍ୱାରା ବହିଃ ବିଭାଗରେ ପ୍ରାୟ ୯୦ ରୋଗୀଙ୍କ ଚିକିତ୍ସା ସୁବିଧା, ଆମ କ୍ଲିନିକ ମାଧ୍ୟମରେ ୧୦ ବିଶେଷଜ୍ଞଙ୍କ ସେବା ଉପଲବ୍ଧ ଥିବା ବେଳେ ୨୦୧୮-୧୯ରେ ୩୬,୦୩୫ ଓ ୨୦୨୨-୨୩ ଡିସେମ୍ବର ସୁଦ୍ଧା ୧ଲକ୍ଷ ୬ ହଜାର ୯୫ ଜଣ ଉପକୃତ ହୋଇଛନ୍ତି। ଏଥିସହ ଭ୍ରାମ୍ୟମାଣ ସ୍ବାସ୍ଥ୍ୟ ଶିବିରରେ ଦୈନିକ ୫୦ ରୋଗୀଙ୍କ ଚିକିତ୍ସା ଓ ଶିଶୁ ଏବଂ ଗର୍ଭବତୀମାନଙ୍କର ଟୀକାକରଣ କାର୍ଯ୍ୟକ୍ରମ ଶତ ପ୍ରତିଶତ କାର୍ଯ୍ୟକ୍ଷମ ହୋଇଥିବା ସୂଚନା ମିଳିଛି। ଏଥିସହ ବୈକୁଣ୍ଠନଗର ସହରାଞ୍ଚଳ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର କାୟାକଳ୍ପ ପୁରସ୍କାର ପାଇଛି। ତତ୍ସହିତ ସହରରେ ୬ ସହରାଞ୍ଚଳ ସ୍ବାସ୍ଥ୍ୟ ଓ ଆରୋଗ୍ୟ କେନ୍ଦ୍ର ପ୍ରତିଷ୍ଠିତ ଏବଂ କାର୍ଯ୍ୟକ୍ଷମ ରହିଛି। ଏହି ଶିବିରକୁ ଏନ୍ୟୁଏଚ୍ଏମ୍ ସହରାଞ୍ଚଳ କାର୍ଯ୍ୟ ପରିଚାଳକ ଲମ୍ବୋଦର ଦିଗାଲ ଓ ସହକାର୍ଯ୍ୟ ପରିଚାଳକ ମଳୟ କୁମାର ବିଶ୍ୱାଳ ପରିଚାଳନାରେ ସହଯୋଗ କରିଥିଲେ। ଶିବିରରେ ବହୁ କର୍ପୋରେଟରଙ୍କ ସମେତ ସ୍ବାସ୍ଥ୍ୟ କର୍ମୀମାନେ ଉପସ୍ଥିତ ଥିଲେ।
