ନୂଆଦିଲ୍ଲୀ,୨୩।୮: ବିଶ୍ୱର ପ୍ରାୟ ଶହେ କୋଟିରୁ ଊର୍ଦ୍ଧ୍ୱ ଲୋକ ୨୦୫୦ ସୁଦ୍ଧା ଆଣ୍ଠୁଗଣ୍ଠି ବାତ ରୋଗରେ ପୀଡ଼ିତ ହେବେ, ଯାହା ସାଧାରଣତଃ ଗଣ୍ଠିକୁ ଅଧିକ ସଂକ୍ରମିତ କରିବ ବୋଲି ଏକ ନୂଆ ଅଧ୍ୟୟନରୁ ଜଣାପଡ଼ିଛି। ବିଶ୍ୱ ଜନସଂଖ୍ୟାର ପ୍ରାୟ ୧୫% ଲୋକ ବର୍ତ୍ତମାନ ଏହି ରୋଗରେ ପୀଡ଼ିତ। ୩୦ ବର୍ଷ କିମ୍ବା ତଦୂର୍ଦ୍ଧ୍ୱ ବୟସ ଲୋକଙ୍କ ସ୍ବାସ୍ଥ୍ୟ ଉପରେ (୧୯୯୦ ରୁ ୨୦୨୦) ୩୦ ବର୍ଷ ଧରି ଏହି ସର୍ଭେ କରାଯାଇଥିଲା। ଏଥିରୁ ଏକଥା ପ୍ରମାଣିତ ହୋଇଛି। ୨୦୨୦ରେ ୫୯୫ ନିୟୁତ ଲୋକ ଏହି ରୋଗରେ ପୀଡ଼ିତ ଥିବା ଜଣାପଡ଼ିଥିଲା, ଯାହା ୧୯୯୦ରେ ୨୫୬ ନିୟୁତ ଥିଲା। ୧୯୯୦ରୁ ୨୦୨୦ ମଧ୍ୟରେ ଏହି ରୋଗୀଙ୍କ ସଂଖ୍ୟା ପ୍ରାୟ ୧୩୨% ବୃଦ୍ଧି ପାଇଥିଲା। ଆମେରିକାର ସ୍ବାସ୍ଥ୍ୟ ମୂଲ୍ୟାଙ୍କନ ସଂସ୍ଥାନ(ଆଇଏଚଏମ୍ଇ)ପକ୍ଷରୁ ଏହି ସର୍ଭେ କରାଯାଇଥିଲା। ଏହା ୨୦୨୧ରେ ବିଶ୍ୱ ଜନସଂଖ୍ୟା ଉପରେ ରୋଗର ପ୍ରଭାବକୁ ନେଇ କରାଯାଇଥିବା ସର୍ଭେର ଏକ ଅଂଶ ଥିଲା। ମେଦବହୁଳ ଲୋକଙ୍କୁ ଆଣ୍ଠୁଗଣ୍ଠିବାତ ରୋଗ ଅଧିକ ମାତ୍ରାରେ ହେଉଥିବା ଏହି ସର୍ଭେରେ ଜଣାପଡ଼ିଥିଲା। ଲୋକସଂଖ୍ୟା ବୃଦ୍ଧି ଘଟୁଥିବାବେଳେ ଲୋକେ ଦୀର୍ଘାୟୁ ହେଉଛନ୍ତି। ଏଭଳି ସ୍ଥିତିରେ ଆମକୁ ସ୍ବାସ୍ଥ୍ୟ ବିଷୟରେ ଅଧିକ ସଚେତନ ହେବାକୁ ପଡ଼ିବ ବୋଲି ଆଇଏଚ୍ଏମ୍ଇର ବୈଜ୍ଞାନିକ ଜେମି ଷ୍ଟେଇନମେଜ୍ କହିଛନ୍ତି। ମେଦବହୁଳତା ତଥା ପୃଥୁଳ ଶରୀର ଆଣ୍ଠୁଗଣ୍ଠି ବାତ ରୋଗର ମୁଖ୍ୟ କାରଣ ବୋଲି କୁହାଯାଉଛି। ୧୯୯୦ରେ ୧୬% ମେଦବହୁଳ ରୋଗୀଙ୍କ ମଧ୍ୟରେ ଏହି ରୋଗ ଦେଖାଯାଉଥିବାବେଳେ ୨୦୨୦ ବେଳକୁ ଏହି ମାତ୍ରା ୨୦%କୁ ବୃଦ୍ଧି ପାଇଛି। ଯଦି ଲୋକଙ୍କ ମଧ୍ୟରେ ଦେଖାଯାଉଥିବା ମେଦବହୁଳ ରୋଗକୁ ରୋକାଯାଇପାରିବ, ତେବେ ଏହି ରୋଗର ମାତ୍ରା ୨୦%ରେ ସୀମିତ ରହିବ ବୋଲି ସର୍ଭେରେ କୁହାଯାଇଛି। ଶାରୀରିକ ପରିଶ୍ରମ ନ କରିବା ମେଦବୃଦ୍ଧିର ମୂଳକାରଣ ହୋଇଥିବାବେଳେ ଏହା କ୍ରମେ ଆଣ୍ଠୁଗଣ୍ଠିକୁ ସଂକ୍ରମିତ କରିଥାଏ ବୋଲି କୁହାଯାଉଛି। ସେହିପରି ପୁରୁଷଙ୍କ ତୁଳନାର ମହିଳାମାନେ ଏହି ରୋଗରେ ଅଧିକ ପୀଡ଼ିତ ହୋଇଥାନ୍ତି ବୋଲି ଉକ୍ତ ସର୍ଭେରୁ ଜଣାପଡ଼ିଛି। ୨୦୨୦ରେ ୬୧% ମହିଳା ଏବଂ ୩୯% ପୁରୁଷ ଏହି ରୋଗରେ ପୀଡ଼ିତ ଥିଲେ। ଏହା ହେଉଛି ଏହି ରୋଗର ଲିଙ୍ଗଗତ ବ୍ୟବଧାନ। ତେବେ କେଉଁ କାରଣରୁ ପୁରୁଷଙ୍କ ତୁଳନାରେ ମହିଳାଙ୍କ ମଧ୍ୟରେ ଏହି ରୋଗ ଅଧିକ ମାତ୍ରାରେ ଦେଖାଯାଉଛି ସେନେଇ ଅଧ୍ୟୟନ ଚାଲିଛି। କିନ୍ତୁ ଗବେଷକମାନେ ବିଶ୍ୱାସ କରୁଛନ୍ତି, ବଂଶାନୁକ୍ରମିକ ହରମୋନାଲ ବ୍ୟବଧାନ ଏହି ରୋଗ ସଂକ୍ରମଣରେ ମୁଖ୍ୟ ଭୂମିକା ଗ୍ରହଣ କରିଥାଏ। ବର୍ତ୍ତମାନ ସୁଦ୍ଧା ଏହି ରୋଗର ସଫଳ ଚିକିତ୍ସା ହୋଇପାରୁନଥିବାବେଳେ ସତର୍କତା ଏବଂ ଆଗୁଆ ପଦକ୍ଷେପ ଏହି ରୋଗକୁ ଜଟିଳ ହେବାରୁ ରୋକାଯାଇପାରିବ। ଏହା ବ୍ୟତୀତ ଆଣ୍ଠୁ ପ୍ରତିରୋପଣ ଭଳି ଖର୍ଚ୍ଚାନ୍ତ ଚିକିତ୍ସା ମଧ୍ୟ ଆପଣାଇପାରିବ କିନ୍ତୁ ଏହା ନିମ୍ନ ଓ ମଧ୍ୟ ଆୟକାରୀ ଲୋକଙ୍କ ଲାଗି ସମ୍ଭବ ନୁହେଁ ବୋଲି ଏହି ସର୍ଭେରେ କୁହାଯାଇଛି।
