ମଦନପୁର/ରିଷିଡ଼ା, ୧୭।୩: କଳାହାଣ୍ଡି ଜିଲା ମ.ରାମପୁର ଥାନା ଅଧୀନ ମଦନପୁର ଆଶ୍ରମ ସ୍କୁଲ ଛକ ନିକଟରେ ବୁଧବାର ଯୁବକଙ୍କ ରକ୍ତାକ୍ତ ମୃତଦେହ ପୋଲିସ ଉଦ୍ଧାର କରିଛି। ମୃତକ ହେଲେ ରିଷିଡା ଗ୍ରାମର ଯୁବ ବ୍ୟବସାୟୀ ରୁପେଶ ଅଗ୍ରଓ୍ବାଲ(୩୬)। ମୃତକଙ୍କ ବଡଭାଇ ନରେଶ ଅଗ୍ରଓ୍ବାଲ ମ.ରାମପୁର ଥାନାରେ ତାଙ୍କ ଭାଇଙ୍କୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି। ଏ ନେଇ ମ.ରାମପୁର ଥାନାରେ ଦଫା ୩୦୨, ୩୪ରେ ଏକ ମାମଲା (ନଂ.୫୭/୨୦୨୧) ରୁଜୁ ହୋଇଛି। ଏହି ଘଟଣାରେ ପୋଲିସ ଜଣଙ୍କୁ ଅଟକ ରଖି ପଚରାଉଚୁରା କରୁଛି। ସୂଚନା ଅନୁଯାୟୀ, ମଙ୍ଗଳବାର ରାତିରେ ରୁପେଶ ଜଣେ ବ୍ୟକ୍ତିଙ୍କ ସହ ମିଶି ଭୋଜି ଖାଇବାକୁ ଯାଇ ଆଉ ଫେରି ନ ଥିଲେ। ବୁଧବାର ସକାଳେ ମ.ରାମପୁର-ରିଷିଡା ମୁଖ୍ୟ ରାସ୍ତାରେ ରୁପେଶଙ୍କ ମୃତଦେହ ପଡ଼ିଥିବା ଦେଖିବାକୁ ମିଳିଥିଲା । ରୁପେଶଙ୍କୁ ହତ୍ୟା କରି ମୁଖ୍ୟ ରାସ୍ତାରେ ପକାଇ ଦେଇଥିବା ପରିବାର ଲୋକ ଅଭିଯୋଗ କରିଛନ୍ତି। ପରିବାରବର୍ଗ ଖବର ପାଇବା ପରେ ପୋଲିସକୁ ଜଣାଇଥିଲେ। କେସିଙ୍ଗା ଏସ୍ଡିପିଓ ଏସ୍ ସୁଶ୍ରୀ, ଥାନା ଅଧିକାରୀ ଜୟଦେବ ତାରିଣୀ, ରିଷିଡା ଫାଣ୍ଡି ଅଧିକାରୀ କ୍ଷୀରସିନ୍ଧୁ ମାଝି ସଦଳବଳେ ପହଞ୍ଚତ୍ଥିଲେ। ବଲାଙ୍ଗୀରରୁ ସାଇଣ୍ଟିଫିକ ଟିମ ସନ୍ଧାନୀ କୁକୁର ସହ ପହଞ୍ଚି ତଦନ୍ତ କରିଥିଲେ। ରୁପେଶଙ୍କ ଛାତିରେ ମାଡ ହୋଇ ମୁହଁ, ନାକରେ ପ୍ରଚୁର ରକ୍ତସ୍ରାବ ହୋଇଛି। ରାସ୍ତା ଅପରପାର୍ଶ୍ୱରେ ମୃତକଙ୍କ ଗାମୁଛା, ଚପଲ ଓ ଜାକେଟ ପଡିଥିବା ଦେଖିବାକୁ ମିଳିଛି। ତାଙ୍କ ସାଥିରେ ଯାଇଥିବା ଯୁବକଙ୍କୁ ପୋଲିସ ଅଟକ ରଖି ପଚରାଉଚୁରା କରୁଛି। ଶବ ବ୍ୟବଚ୍ଛେଦ ପରେ ସନ୍ଧ୍ୟାରେ ପରିବାରବର୍ଗଙ୍କୁ ହସ୍ତାନ୍ତର କରାଯାଇଛି। ହତ୍ୟାକାରୀଙ୍କୁ ତୁରନ୍ତ ଗିରଫ କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି।
