ନବରଙ୍ଗପୁର,୨୬ା୧: ନବରଙ୍ଗପୁର ଜିଲା କୁର୍ଲୁଘାଟି ନିକଟରେ ମଙ୍ଗଳବାର ଏକ ଚଳନ୍ତା କାର୍ ଜଳିଯାଇଛି। ତେବେ ଗାଡ଼ିଟି ପୋଡି ସମ୍ପୂର୍ଣ୍ଣ ନଷ୍ଟ ହୋଇଥିଲେ ମଧ୍ୟ ଏଥିରେ କେହି ମୃତାହତ ହୋଇନାହାନ୍ତି। ସୂଚନା ଅନୁଯାୟୀ, ନବରଙ୍ଗପୁର ଥାନା ଅଧୀନ ବିଜରାଗୁଡ଼ା ଗ୍ରାମର ଭୀମ ନାୟକ ସକାଳେ ନିଜ କାର୍ ଧରି ନବରଙ୍ଗପୁରରେ ସର୍ଭିସିଂ କରାଇଥିଲେ। ପରେ ଡ୍ରାଇଭରଙ୍କୁ ଗାଡ଼ି ଦେଇ ସେ ପଛରେ ବାଇକ୍ରେ ବିଜରାଗୁଡ଼ା ଫେରୁଥିଲେ। ଏହି ସମୟରେ କୁର୍ଲୁଘାଟି ନିକଟରେ ହଠାତ୍ କାର୍ ଇଞ୍ଜିନ୍ରୁ ନିଆଁ ବାହାରୁଥିବା ଦେଖି ଭୀମ କାର୍କୁ ଅଟକାଇଥିଲେ। ବନେଟ୍ ଖୋଲି ଦେଖିବା ସମୟରେ ଇଞ୍ଜିନରେ ନିଆଁ ଲାଗିଥିବା ଜାଣିବାକୁ ପାଇଥିଲେ। ଏ ନେଇ ଭୀମ ଏବଂ ଚାଳକ ତେନ୍ତୁଳିଖୁଣ୍ଟି ଅଗ୍ନିଶମ ବିଭାଗକୁ ବାରମ୍ବାର ଫୋନ୍ କରିଥିଲେ ମଧ୍ୟ ଦମକଳ ବାହିନୀ ପହଞ୍ଚିବାରେ ବିଳମ୍ବ ହୋଇଥିଲା। ଫଳରେ ଗାଡ଼ିଟି ସମ୍ପୂର୍ଣ୍ଣ ପୋଡି ଯାଇଥିବା ମାଲିକ ଅଭିଯୋଗ କରିଛନ୍ତି। ଘଟଣାସ୍ଥଳରେ ନବରଙ୍ଗପୁର ଏବଂ ତେନ୍ତୁଳିଖୁଣ୍ଟି ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ। କୌଣସି ଯାନ୍ତ୍ରିକ ତ୍ରୁଟି ଯୋଗୁ ଏଭଳି ଦୁର୍ଘଟଣା ଘଟିଥିବା ଅନୁମାନ କରାଯାଉଛି।
