ନୂଆଦିଲ୍ଲୀ,୩ ।୨: କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ପୁଣିଥରେ ମୋଦି ସରକାରଙ୍କୁ ଟାର୍ଗେଟ କରିଛନ୍ତି । ରାହୁଲ କହିଛନ୍ତି ମୋଦି ସରକାର ଦେଶକୁ ‘ଶେହନଶାହା’ ଭଳି ଚଳାଇବାକୁ ଚେଷ୍ଟା କରୁଛନ୍ତି । ବର୍ତ୍ତମାନର ସରକାରଙ୍କ ନୀତି ଯୋଗୁ ଆଜି ଦେଶ ଆଭ୍ୟନ୍ତରୀଣ ତଥା ବାହ୍ୟ ଦିଗରେ ଏକ ବଡ ବିପଦର ସମ୍ମୁଖୀନ ହୋଇଛି । ପାର୍ଲାମେଣ୍ଟର ଉଭୟ ଗୃହର ମିଳିତ ବୈଠକରେ ରାଷ୍ଟ୍ରପତିଙ୍କ ସମ୍ବୋଧନରେ ମୋଶନ ଅଫ୍ ଧନ୍ୟବାଦ ଉପରେ ହୋଇଥିବା ଆଲୋଚନାରେ ଅଂଶ ଗ୍ରହଣ କରି ରାହୁଲ ଦାବି କରିଛନ୍ତି ଯେ କେନ୍ଦ୍ର ସରକାରଙ୍କ ନୀତି ଯୋଗୁ ଆଜି ଚାଇନା ଓ ପାକିସ୍ତାନ ଏକାଠି ହୋଇଛନ୍ତି । ରାହୁଲ ଆହୁରି ମଧ୍ୟ ଦାବି କରିଛନ୍ତି କି କେନ୍ଦ୍ର ସରକାରଙ୍କ ନୀତି ଯୋଗୁ ହିନ୍ଦୁସ୍ତାନ ଦୁଇଭାଗ ହୋଇଯାଇଛି । ଗୋଟିଏ ହେଉଛି ଗରିବଙ୍କର ଅନ୍ୟଟି ଧନୀଙ୍କର । ଏହାସହ ସେ ଦାବି କରିଛନ୍ତି ଯେ ଅଭିଭାଷଣରେ ଦେଶ ସାମ୍ନାନାରେ ଥିବା କୌଣସି ସମସ୍ୟାର ଉଲ୍ଲେଖ କରାଯାଇ ନାହିଁ ।
ରାହୁଲ ଗାନ୍ଧୀଙ୍କ ଏହି ବୟାନକୁ ନେଇ ଏବେ ରାଜନୀତି ହୋଇଛି ସରଗରମ । କେନ୍ଦ୍ର ଆଇନ ମନ୍ତ୍ରୀ କିରଣ ରିଜେଜୁ କହିଛନ୍ତି ରାହୁଲ ଗାନ୍ଧୀ ଏଥିପାଇଁ କ୍ଷମା ମାଗନ୍ତୁ । ଏହାସହ ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର କହିଛନ୍ତି ରାହୁଲଙ୍କୁ ତଥ୍ୟ ସମ୍ପର୍କରେ କିଛି ବି ସୂଚନା ନାହିଁ ।
