ନୂଆଦିଲ୍ଲୀ,୧।୨: ରବିବାର ୨୦୨୬-୨୭ ଆର୍ଥିକ ବର୍ଷ ପାଇଁ ବଜେଟ୍ ଉପସ୍ଥାପନ କରିଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ। ସରକାର ଆଗାମୀ ଆର୍ଥିକ ବର୍ଷ ପାଇଁ ରାଜକୋଷୀୟ ନିଅଣ୍ଟକୁ ଜିଡିପି (GDP)ର ୪.୩ ପ୍ରତିଶତ ମଧ୍ୟରେ ସୀମିତ ରଖିବାକୁ ଲକ୍ଷ୍ୟ ଧାର୍ଯ୍ୟ କରିଛନ୍ତି। ଏହା ଗତ ବର୍ଷର ସଂଶୋଧିତ ଆକଳନ ୪.୪ ପ୍ରତିଶତ ତୁଳନାରେ ସାମାନ୍ୟ କମ୍, ଯାହା ସରକାରଙ୍କ ଆର୍ଥିକ ଶୃଙ୍ଖଳା ରକ୍ଷା କରିବା ଦିଗରେ ଏକ ସକାରାତ୍ମକ ପଦକ୍ଷେପ।
ତଥାପି ସରକାର ନିଜର ଖର୍ଚ୍ଚ ଓ ନିଅଣ୍ଟକୁ ଭରଣା କରିବା ପାଇଁ ବଜାରରୁ ମୋଟ ୧୭.୨ ଲକ୍ଷ କୋଟି ଟଙ୍କାର ଋଣ ସଂଗ୍ରହ କରିବେ। ସେଥିମଧ୍ୟରୁ ୧୧.୭ ଲକ୍ଷ କୋଟି ଟଙ୍କା ସରକାରୀ ସିକ୍ୟୁରିଟି ମାଧ୍ୟମରେ ସଂଗୃହିତ ହେବ।
ଚଳିତ ବର୍ଷ ମୋଟ ବ୍ୟୟ ଆକଳନ ପ୍ରାୟ ୪୯.୬ ଲକ୍ଷ କୋଟି ଟଙ୍କା ରହିଛି। ସେଥିମଧ୍ୟରୁ ଭିତ୍ତିଭୂମି ବିକାଶ ବା ପୁଞ୍ଜି ବ୍ୟୟ ପାଇଁ ୧୧.୭ ଲକ୍ଷ କୋଟି ଟଙ୍କା ବ୍ୟୟ କରାଯିବ।
ଅର୍ଥମନ୍ତ୍ରୀ କହିଛନ୍ତି ଯେ ସରକାର ବିକାଶମୂଳକ କାର୍ଯ୍ୟରେ ନିବେଶ ଜାରି ରଖିବା ସହ ଦେଶର ଋଣ ବୋଝକୁ କମାଇବା ପାଇଁ ପ୍ରତିଶ୍ରୁତିବଦ୍ଧ। ସ୍ୱଳ୍ପ ସଞ୍ଚୟ ଏବଂ ଅନ୍ୟାନ୍ୟ ଉତ୍ସରୁ ମଧ୍ୟ ବାକି ପାଣ୍ଠି ଯୋଗାଡ଼ କରାଯିବ।
ରାଜକୋଷୀୟ ନିଅଣ୍ଟ କ’ଣ?
ସରଳ ଭାଷାରେ କହିଲେ, ଯେତେବେଳେ ସରକାରଙ୍କ ମୋଟ ରୋଜଗାର (ରାଜସ୍ୱ) ତୁଳନାରେ ଖର୍ଚ୍ଚ ଅଧିକ ହୁଏ, ସେହି ବ୍ୟବଧାନକୁ ରାଜକୋଷୀୟ ନିଅଣ୍ଟ କୁହାଯାଏ। ଏହାକୁ ପୂରଣ କରିବା ପାଇଁ ସରକାର ଋଣ କରିଥାନ୍ତି।
