ଢେଙ୍କାନାଳ ଅଫିସ, ୧୧।୬ ଢେଙ୍କାନାଳ ଜିଲାରେ ବ୍ରାଉନ୍ସୁଗାର ର଼୍ୟାକେଟ୍ ସକ୍ରିୟ ହୋଇଉଠିଛି। ସହରସ୍ଥିତ ରାମେଶ୍ୱରପୁର ରେଳଧାରଣା ପାର୍ଶ୍ୱରେ ଥିବା ଏକ ସିମେଣ୍ଟ ଗୋଦାମ ନିକଟରୁ ଶୁକ୍ରବାର ଟାଉନ ଥାନା ପୋଲିସ ୧୬ ଗ୍ରାମ ୭୦୦ ମିଲିଗ୍ରାମ ବ୍ରାଉନ୍ ସୁଗାର ଜବତ କରିଛି। ଏହି ଘଟଣାରେ ସ୍ଥାନୀୟ ବାଜିଚୌକ ଜୟଗୋପାଳ ସାହିର ରାହୁଲ କୁମାର ରାଉତ ଓରଫ ଜଗନ (୨୩), ରଗଡ଼ିସାହିର ଗଣେଶ ନାଥ (୨୫), ମୋଟଙ୍ଗା ଥାନା ବୁଢ଼ାପଙ୍କ ଗ୍ରାମର ସୌମ୍ୟରଞ୍ଜନ ଦାସ ଓରଫ ସମୀର (୨୭)ଙ୍କୁ ଗିରଫ କରାଯାଇଛି। ସେମାନଙ୍କ ନିକଟରୁ ଏକ କଳାରଙ୍ଗର କାର (ନଂ. ଓଡି ୦୨ ବିସି ୮୯୫୪), ନଗଦ ୪୦ ହଜାର ୮୦୦ ଟଙ୍କା, ଏକ ମନିପର୍ସରୁ ୧,୩୨୦ ଟଙ୍କା, ୫ ମୋବାଇଲ, ୨ ଭରି ଓଜନର ସୁନା ଚେନ୍, ବ୍ରେସଲେଟ୍, ସୁନା ମୁଦି ଜବତ ହୋଇଛି। ଜବତ ବ୍ରାଉନ୍ ସୁଗାରର ଆନୁମାନିକ ମୂଲ୍ୟ ୧ଲକ୍ଷ ୭୦ହଜାର ଟଙ୍କା ହେବ ବୋଲି ଆକଳନ କରାଯାଇଛି।
ଢେଙ୍କାନାଳରେ ବ୍ରାଉନ୍ସୁଗାର ଭଳି ନିଷିଦ୍ଧ ନିଶାର ଅବାଧ କାରବାର ବଢ଼ିବାରେ ଲାଗିଛି। ଏଥିରେ ସମ୍ପୃକ୍ତ ବ୍ୟବସାୟୀମାନେ ଯୁବପିଢ଼ିଙ୍କୁ ଟାର୍ଗେଟ କରୁଛନ୍ତି। ପୂର୍ବରୁ ଏକାଧିକ ଥର ଧଳାଜହର ଜବତ ହେବା ପରେ ପୋଲିସ ପ୍ରଶାସନର ମୁଣ୍ଡବ୍ୟଥା ବଢ଼ିଥିଲା। ରାମେଶ୍ୱରପୁର ରେଳଧାରଣା ନିକଟରେ ବ୍ରାଉନ୍ସୁଗାର ବିକ୍ରି ପାଇଁ ଯୋଜନା ଚାଲିଥିବା ସୂଚନା ମିଳିବା ପରେ ଏସ୍ପି ଏଲ୍. ଦିବ୍ୟା ଭି.ଙ୍କ ନିର୍ଦ୍ଦେଶରେ ସଦର ଏସ୍ଡିପିଓ ବିକାଶ ବେଉରାଙ୍କ ନେତୃତ୍ୱରେ ଥାନାଧିକାରୀ ରାଜେନ୍ଦ୍ର ମହାପାତ୍ର, ଏସ୍ଆଇ ଚନ୍ଦ୍ରକାନ୍ତ ସେଠୀ, ସୌଭାଗ୍ୟ ପାଣି ସଦଳବଳ ଚଢ଼ାଉ କରିଥିଲେ। ଏ ନେଇ ଟାଉନ ଥାନାରେ ନଂ. ୩୪୫/୨୨, ଦଫା ୨୧(ବି), ଏନ୍ଡିପିଏସ୍ ଆକ୍ଟରେ ଏକ ମାମଲା ରୁଜୁ କରାଯାଇଛି। ଧରାପଡ଼ିଥିବା ସମ୍ପୃକ୍ତ ୩ ଅଭିଯୁକ୍ତ ବ୍ରାଉନସୁଗାର ବ୍ୟବସାୟରେ ଲିପ୍ତ ଥିବା ଏସ୍ଡିପିଓ ସୂଚନା ଦେଇଛନ୍ତି।
