ଧାମନଗର,୧୦ା୬(ଦେବେନ୍ଦ୍ର ଆନ୍ଦିଆ): ଭଦ୍ରକ ଜିଲା ଧାମନଗର ଥାନା ଆନନ୍ଦପୁର ପଞ୍ଚାୟତସ୍ଥିତ ବୈତରଣୀ ନଦୀପୋଲ ନିକଟରୁ ଧାମନଗର ପୋଲିସ ଜଣେ ବ୍ରାଉନସୁଗାର ବିକ୍ରେତା ଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଜଣକ ହେଲେ ସ୍ଥାନୀୟ ଉତ୍ତେଇପୁର ଗ୍ରାମର ଦୁର୍ଯ୍ୟୋଧନ ପତିଙ୍କ ପୁଅ ମାନସରଞ୍ଜନ (୨୬)।
ସୂୂଚନାଥାଉ କି, ମଙ୍ଗଳବାର ବୈତରଣୀ ନଦୀ ପୋଲ ନିକଟରେ ମାନସରଞ୍ଜନ ନିଶା କାରବାର ପାଇଁ ଠିଆ ହୋଇଥିବା ବେଳେ ବିଶେଷ ସୂତ୍ରରୁ ଧାମନଗର ପୋଲିସ ଖବର ପାଇ ଅତର୍କିତ ଭାବେ ଚଢ଼ଉ କରିଥିଲା। ଅଭିଯୁକ୍ତ ପୋଲିସକୁ ଦେଖି ଦୌଡି ପଳାଇଯିବାକୁ ଉଦ୍ୟମ କରୁଥିବାବେଳେ ପୋଲିସ ତାଙ୍କୁ କାବୁ କରି ମାନସ ଠାରୁ ୧୦ ଗ୍ରାମ ୩୦ ମିଲି ଓଜନର ବ୍ରାଉନସୁଗାର ଏବଂ ନଗଦ ୧୨ ହଜାର୧୦୦ ଟଙ୍କା , ଗୋଟିଏ ମୋବାଇଲ ଜବତ କରିଛି। ଥାନା ଏସ୍ଆଇ ମହେଶ୍ୱର ପ୍ରଧାନଙ୍କ ଅଭିଯୋଗ କ୍ରମେ ଥାନା କେସ୍ ନଂ ୨୫୭/୨୬ରେ ମାମଲା ରୁଜୁ କରାଯାଇ ଅଭିଯୁକ୍ତ ମାନସରଞ୍ଜନଙ୍କୁ ଗିରଫ କରାଯାଇ ବୁଧବାର କୋର୍ଟ ଚାଲାଣ କରାଯାଇଛି। ଥାନା ଏସ୍ଆଇ ନାରାୟଣ ନାୟକ ଘଟଣାର ତଦନ୍ତ ଭାର ନେଇ ତଦନ୍ତ କରୁଛନ୍ତି।
ପ୍ରକାଶଥାଉ କି, ଆନନ୍ଦପୁର ପଞ୍ଚାୟତର ବିଭିନ୍ନ ଗାଁ, ଛକ ବଜାର ଓ ନଦୀବନ୍ଧଗୁଡ଼ିକରେ ଦୀର୍ଘଦିନ ଧରି ଏହି ବ୍ରାଉନସୁଗାର ବେପାର ସାଙ୍ଗକୁ ବେଆଇନ ଚୋରା ନିଶା କାରବାର ବ୍ୟାପକ ଭାବେ ବଢ଼ିବାରେ ଲାଗିଛି। ଏହି ନିଶା କାରବାର ଯୋଗୁ ଯୁବପିଢ଼ି ବିପଥଗାମୀ ହେଉଥିବାରୁ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦିନକୁ ଦିନ ବଢ଼ିବାରେ ଲାଗିଛି। ଏହି ଚୋରା କାରବାର ଉପରେ ସମ୍ପୂର୍ଣ୍ଣ ରୋକୋ ଲଗାଇବା ପାଇଁ ପୋଲିସ ନିୟମିତ ଚଢ଼ାଉ କରିବା ପାଇଁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି।
