ପୁରୀ ଅଫିସ,୫।୧୦: ପୁରୀ ସହରରେ ବେଆଇନ ନିଶା କାରବାର ବୃଦ୍ଧି ପାଉଛି। କିଛିଦିନ ହେବ ବ୍ରାଉନ୍ସୁଗାର କାରବାର ଅଧିକ ମାତ୍ରାରେ ଚାଲିଛି। ବାହାରୁ ବେପାରୀମାନେ ବ୍ରାଉନ୍ସୁଗାର ଆଣି ପୁରୀରେ ବିକ୍ରି କରୁଛନ୍ତି। ରବିବାର ପୁରୀକୁ ବ୍ରାଉନ୍ସୁଗାର ଚୋରାଚାଲାଣ ହେଉଥିବାବେଳେ ପୋଲିସ ୬ଜଣଙ୍କୁ ଗିରଫ କରିଛି। ସେମାନେ ହେଲେ ଖୋର୍ଦ୍ଧା ଟାଉନ ଅଞ୍ଚଳର ଅନିଲ ବରାଳ, କୃଷ୍ଣଚନ୍ଦ୍ର ଭୁଜବଳ ଓ ସୋମନ ରଥ ଭୁଜବଳ, ପୁରୀ କୁମ୍ଭାରପଡ଼ାର ବାବୁନା ନାୟକ, ଖଣ୍ଡିଆବନ୍ଧର ବଳରାମ ଭୋଇ ଓ ଗୋଖାସାହିର ବାବୁନା ବେହେରା। ଏମାନଙ୍କଠାରୁ ୨୭୫ ଗ୍ରାମ୍ ବ୍ରାଉନ୍ସୁଗାର, ଗୋଟିଏ ବନ୍ଧୁକ, ଗୋଟିଏ କାର, ବାଇକ୍ ଜବତ କରାଯାଇଛି। ଏହି କାରବାରରେ ସମ୍ପୃକ୍ତ ଥାଇ ଫେରାର ହୋଇଯାଇଥିବା ଅଭିଯୁକ୍ତମାନେ ହେଲେ ରାମିନୀ ମଲ୍ଲିକ, ଲିଟୁ ମହାନ୍ତି, ଜିତେନ୍ଦ୍ର କୁମାର ମହାନ୍ତି, ଝରଣା ପଣ୍ଡା, ବୁଲୁ ଖୁଣ୍ଟିଆ, ସନିଆ ବିଶୋଇ, ମିନତି ବିଶ୍ୱାଳ ଓ ସୁଜାତା ବିଶ୍ୱାଳ ବୋଲି ବାସେଳିସାହି ଥାନା ଆଇଆଇସି ଜୀବନାନନ୍ଦ ଜେନା ସୂଚନା ଦେଇଛନ୍ତି।
ଅପରାହ୍ନରେ ବାସେଳିସାହି ଥାନା ପୋଲିସ ମଙ୍ଗଳାଘାଟ ଛକରେ ଗାଡ଼ି ଯାଞ୍ଚ କରୁଥିଲା। ଏହି ସମୟରେ ପୋଲିସ ଗୋଟିଏ ବାଇକ୍ (ନଂ. ଓଡି ୧୩ ଏନ୍-୧୨୫୪) ଏବଂ ଗୋଟିଏ କାର୍ (ନଂ. ଓଆର୍ ୦୨ବିଏଚ୍-୫୪୦୨)କୁ ଅଟକାଇଥିଲା। ଯାଞ୍ଚ ସମୟରେ କାର୍ରୁ ଏକ ଜରି ପ୍ୟାକେଟରେ ୨୭୫ଗ୍ରାମ୍ ୩୫ ମିଲିଗ୍ରାମ୍ ବ୍ରାଉନ୍ସୁଗାର ମିଳିଥିଲା। ବ୍ରାଉନ୍ସୁଗାର ସହ ୯୫୦ ଟଙ୍କା ଏବଂ ଗୋଟିଏ ମୋବାଇଲ ଫୋନ ଜବତ କରାଯାଇଥିଲା। କାର୍ରେ ୭ଜଣ ଥିବା ବେଳେ ୩ଜଣ ଖସିଯାଇଥିଲେ। ୪ଜଣଙ୍କୁ ପୋଲିସ କାବୁ କରିଥିଲା। ସେହିପରି ବାଇକ୍ରେ ଥିବା ୨ଜଣ ଯୁବକଙ୍କୁ ଧରିବା ସହ ସେମାନଙ୍କଠାରୁ ଗୋଟିଏ ପିସ୍ତଲ ଓ ଜୀବନ୍ତ ଗୁଳି ଜବତ କରିଥିଲା। ଫେରାର ଅଭିଯୁକ୍ତମାନଙ୍କୁ ଏହି ବ୍ରାଉନ୍ସୁଗାର ଦେବା ପାଇଁ ଧରାପଡ଼ିଥିବା ଅଭିଯୁକ୍ତମାନେ ଆଣି ଆସୁଥିଲେ। ଏ ନେଇ ଥାନାରେ ଏକ ମାମଲା (ନଂ.୨୫୮/୨୦) ରୁଜୁ କରାଯାଇ ଅଧିକ ଖୋଳତାଡ ଚାଲିଛି ବୋଲି ଆଇଆଇସି କହିଛନ୍ତି। ସୂଚନାଥାଉ କି, କିଛିଦିନ ତଳେ ପୋଲିସ ୧୫ ଗ୍ରାମ୍ ବ୍ରାଉନ୍ସୁଗାର ଜବତ କରିବା ସହ ୨ ମହିଳାଙ୍କ ସମେତ ୩ ଜଣଙ୍କୁ ଗିରଫ କରିଥିଲା।
