କାମାକ୍ଷାନଗର, ୪।୫(ଡି.ଏନ୍.ଏ.):ସାମାନ୍ୟ ଅର୍ଥ ଲୋଭରେ ପଡ଼ି ଭୁଲି ଯାଇଥିଲେ ହିତାହିତ ଜ୍ଞାନ। ରକ୍ତ ସମ୍ପର୍କୀୟ ନାବାଳକ ଭାଇକୁ ଅପହରଣ କରିବା ପରେ ବେକକୁ ରଶିରେ ଭିଡ଼ି ଶ୍ୱାସରୁଦ୍ଧ କରି ଅତି ନିର୍ମମ ଭାବେ କରିଥିଲେ ହତ୍ୟା। ଏଭଳି ଏକ ସମ୍ବେଦନଶୀଳ ମାମଲାର ରାୟ ଘଟଣାର ୪ବର୍ଷ ପରେ ମଙ୍ଗଳବାର ପ୍ରକାଶ ପାଇଛି। ହତ୍ୟାକାରୀ ସତ୍ୟସ୍ବପ୍ନା ସାହୁ ଓରଫ୍ ବାପୁନ୍ଙ୍କୁ ଢେଙ୍କାନାଳ ଜିଲା କାମାକ୍ଷାନଗର ଅତିରିକ୍ତ ଦୌରାଜ୍ଜ୍ ସତ୍ୟନାରାୟଣ ପାତ୍ର ଦୋଷୀ ସାବ୍ୟସ୍ତ କରିବା ସହ ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି। ଏଥିସହ ୧ଲକ୍ଷ ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି। ସରକାରୀ ଓକିଲ ଦେବରାଜ ବେହେରା ମାମଲା ପରିଚାଳନା କରିଥିଲେ।
ମାମଲାର ବିବରଣୀ ଅନୁଯାୟୀ, କାମାକ୍ଷାନଗର ଥାନା ମୁକ୍ତାପଶି ଗ୍ରାମରେ ୨୦୧୮ ମାର୍ଚ୍ଚ ୧୫ରେ ସଂଘଟିତ ହୋଇଥିଲା ଏହି ବହୁଚର୍ଚ୍ଚିତ ହତ୍ୟାକାଣ୍ଡ। ପ୍ରଦୀପ କୁମାର ସାହୁଙ୍କ ଏକମାତ୍ର ପୁଅ ପ୍ରବୀଣ ଓରଫ୍ ଶିବା (୮) ସ୍କୁଲରୁ ଫେରି ଗଁାଦାଣ୍ଡରେ ଖେଳୁଥିବାବେଳେ ହଠାତ୍ ନିଖୋଜ ହୋଇଯାଇଥିଲେ। ଖୋଜାଖୋଜି କରିବା ସତ୍ତ୍ୱେ ତାଙ୍କର କୌଣସି ସନ୍ଧାନ ନ ମିଳିବାରୁ ପରିବାର ଲୋକେ ଥାନାର ଦ୍ୱାରସ୍ଥ ହୋଇଥିଲେ। ଏହି ସମୟରେ ପ୍ରଦୀପଙ୍କ ମୋବାଇଲକୁ ଏକ ମେସେଜ୍ ଆସିଥିଲା। ୪୦ ହଜାର ଟଙ୍କା ଦେଲେ ପୁଅକୁ ଫେରିପାଇବ ବୋଲି ଏଥରେ ଚେତାବନୀ ଦିଆଯାଇଥିଲା। ପୋଲିସ ମୋବାଇଲ୍ ନମ୍ବର ଟ୍ରାକିଂ କରିବା ପରେ ସନ୍ଦେହ ଘେରକୁ ଆସିଥିଲେ ପ୍ରଦୀପଙ୍କ ବଡ଼ଭାଇଙ୍କ ପୁଅ ତଥା ମୃତ ପ୍ରବୀଣଙ୍କ ଦାଦାପୁଅ ଭାଇ ସତ୍ୟସ୍ବପ୍ନା। ୧୬ ତାରିଖରେ ପୋଲିସ ତାଙ୍କୁ ଉଠାଇ ନେଇ ଜେରା କରିବା ପରେ ଘଟଣାର ରହସ୍ୟ ଉନ୍ମୋଚିତ ହୋଇଥିଲା। ଅର୍ଥଲୋଭରେ ବାପୁନ୍ ନିଜ ରକ୍ତ ସମ୍ପର୍କୀୟ ଭାଇଙ୍କୁ ଅପହରଣ କରିଥିଲେ। ଏହାପରେ ବେକକୁ ରଶିରେ ଚିପି ଅତି ନିର୍ମମ ଭାବେ ହତ୍ୟା କରିଥିଲେ। ଦୋଷ ଲୁଚାଇବାକୁ ମୃତଦେହକୁ ଅଖାରେ ପୂରାଇ ଘରେ ରଖିଥିଲେ। ଜେରା ବେଳେ ପାଲିସ ଆଗରେ ସବୁ ସତ ମାନିଯାଇଥିଲେ ସତ୍ୟସ୍ବପ୍ନା। ଏ ନେଇ ନଂ.୫୦/୧୮ ଏବଂ ଦଫା ୩୦୨, ୨୦୧, ୩୬୪ ଅନୁଯାୟୀ ପୋଲିସ ଏକ ମାମଲା ରୁଜୁ କରି ଅଭିଯୁକ୍ତଙ୍କୁ କୋର୍ଟଚାଲାଣ କରିଥିଲା। ଜାମିନ ନାମଞ୍ଜୁର ପରେ ତାଙ୍କୁ ଜେଲ ହାଜତକୁ ପଠାଇ ଦିଆଯାଇଥିଲା। ତତ୍କାଳୀନ ଥାାନାଧିକାରୀ ଜ୍ଞାନରଞ୍ଜନ ସାମଲ ଏବଂ ତଦନ୍ତକାରୀ ଅଧିକାରୀ ଲିଆକତ୍ ଖାନ୍ଙ୍କ ଉଦ୍ୟମରେ ମାତ୍ର ୨୪ ଘଣ୍ଟା ମଧ୍ୟରେ ହତ୍ୟା ଅଭିଯୁକ୍ତ ଧରାପଡ଼ିଥିଲେ। ଏହି ଘଟଣା ସେତେବେଳେ ଚର୍ଚ୍ଚାର ବିଷୟ ପାଲଟିଥିଲା।
