ଗୁଣପୁର,୪।୫(ଡି.ଏନ୍.ଏ.): ରାୟଗଡ଼ା ଜିଲା ଗୁଣପୁର ସହର କନ୍ୟକା ପରମେଶ୍ୱର ମନ୍ଦିର ସମ୍ମୁଖ ଏସ୍ଏସ୍ ଜୁଏଲେରି ଦୋକନା ମାଲିକ ଏସ୍.ବାବା ପ୍ରସାଦଙ୍କଠାରୁ ସୁନା ଅଳଙ୍କାର ଲୁଟ୍ ଘଟଣାରେ ସମ୍ପୃକ୍ତ ୨ ଅଭିଯୁକ୍ତଙ୍କୁ ଗୁଣପୁର ପୋଲିସ ଗଞ୍ଜାମ ଜିଲା ଆସ୍କାରୁ ଗିରଫ କରିଛି। ଅଭିଯୁକ୍ତମାନେ ହେଲେ ଯାଜପୁରର ଅର୍ଜୁନ ପ୍ରଧାନ ଏବଂ ଭଞ୍ଜନଗରର ତରୁଣ ଦାସ। ପୋଲିସ ସେମାନଙ୍କଠାରୁ ଚୋରି ହାଇଥିବା ୧୪୦୦ ଗ୍ରାମ୍ ସୁନା ସହ ଲୁଟ୍ରେ ବ୍ୟବହାର କରିଥିବା ବାଇକ ଜବତ କରିଥିବା ରାୟଗଡ଼ା ଏସ୍ପି ବିବେକାନନ୍ଦ ଶର୍ମା ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ସୂଚନାନୁଯାୟୀ, ଗତ ୨୬ ତାରିଖରେ ଏସ୍. ବାବା ପ୍ରସାଦ ଦୋକାନ ଖୋଲିବାକୁ ଆସିଥିଲେ। ଗାଡ଼ିରେ ଏକ ବ୍ୟାଗ୍ରେ ୩କେଜି ସୁନା ସହ ୨ଲକ୍ଷ ଟଙ୍କା ରଖି ଦୋକାନ ଖୋଲିବାବେଳେ ଅଭିଯୁକ୍ତମାନେ ବ୍ୟାଗ୍ ନେଇ ପଳାଇଥିଲେ। ଉକ୍ତ ଘଟଣା ସିସି ଟିଭିରେ କଏଦ ହୋଇଥିଲା। ଅଭିଯୋଗ ପରେ ସିସିଟିଭି ଫୁଟେଜ ଆଧାରରେ ପୋଲିସ ତଦନ୍ତ ଆରମ୍ଭ କରିଥିଲା। ପୋଲିସର ୩ଟି ଟିମ୍ ଜୟପୁର, ଆନ୍ଧ୍ରର ପାଲାସା ଏବଂ ଗଞ୍ଜାମରେ ତଦନ୍ତ କରିଥିଲା। ଲୁଟ୍ ଅଳଙ୍କାରକୁ ଅଭିଯୁକ୍ତମାନେ ଆସ୍କାର ଏକ ଅଞ୍ଚଳରେ ମାଟି ତଳେ ଲୁଚାଇ ରଖିଥିଲେ। ଅତିରିକ୍ତଏସ୍ପି ରାମପ୍ରସାଦ ସାହୁଙ୍କ ତତ୍ତ୍ବାବଧାନରେ ଗୁଣପୁର ଏସ୍ଡିପିଓ ଅଜୟ କୁମାର ବାରିକ ଆସ୍କାରେ ତଦନ୍ତ କରି ଅଭିଯୁକ୍ତ ଓ ଚୋରି ସାମଗ୍ରୀ ଧରିପାରିଛନ୍ତି ବୋଲି ଏସ୍ପି ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଲୁଟ୍ ହୋଇଥିବା ଟଙ୍କା, ବଳକା ସୁନା ଅଳଙ୍କାର ସହ ଅନ୍ୟ ଅଭିଯୁକ୍ତଙ୍କୁ ପୋଲିସ ଖୁବ୍ ଶୀଘ୍ର ଧରିବ ବୋଲି ଏସ୍ପି କହିଛନ୍ତି। ଜବତ ଅଳଙ୍କାରକୁ ଦୋକାନ ମାଲିକଙ୍କୁ ପ୍ରଦାନ କରାଯାଇଛି। ଖବରଦାତା ସମ୍ମିଳନୀରେ ଗୁଣପୁର ଏସ୍ଡିପିଓ, ଆଇଆଇସି ଯଶବନ୍ତ ହିଆଲ, ଆଶ୍ରିତା ଖାଲୋକ ଉପସ୍ଥିତ ଥିଲେ।
