ପୁରୀ ଅଫିସ,୧।୯: ଋଣରେ ଇକ୍ୟୁଏଟେଡ୍ ମନ୍ଥ୍ଲି ଇନ୍ଷ୍ଟଲମେଣ୍ଟ୍ (ଇଏମ୍ଆଇ) ବ୍ୟବସ୍ଥା ଲାଗୁ ହେବା ପରେ ବଜାରରେ ଅର୍ଥନୈତିକ ଉତ୍ସାହ ପରିଲକ୍ଷିତ ହୋଇଛି। ଲୋକେ ସୁଧ ସହ ଋଣ ଶୁଝିବାର ସହଜ ରାସ୍ତା ପାଇଛନ୍ତି। ଫଳରେ ବ୍ୟାଙ୍କିଂ ବ୍ୟବସ୍ଥା ଲାଭବାନ ହେବା ସହ ଗ୍ରାହକଙ୍କ କ୍ରୟ କ୍ଷମତା ବଢ଼ିଛି। ଏଭଳି ପରିବର୍ତ୍ତନ ଅର୍ଥନୀତି ବଜାର ପାଇଁ ଉତ୍ତମ ଖବର। ମାତ୍ର ଏହାକୁ ଆଳ କରି ଦଲାଲମାନେ ଟଙ୍କା ଲୁଟିବାରେ ସକ୍ଷମ ହେଉଛନ୍ତି। ଗ୍ରାହକମାନଙ୍କୁ ଏନେଇ କୌଣସି ସୂଚନା ମିଳୁନାହିଁ।
କ୍ରେଡିଟ୍ ଇନ୍ଫର୍ମେଶନ୍ ବ୍ୟୁରୋ ଇଣ୍ଡିଆ ଲିମିଟେଡ୍ (ସିବିଲ୍) ପକ୍ଷରୁ ସ୍କୋର ଠିକ୍ କରିବା ଆଳରେ ଅଧିକାଂଶ ଗ୍ରାହକଙ୍କଠାରୁ ମୋଟା ଅଙ୍କର ଟଙ୍କା ନିଆଯାଉଛି। ସାଧାରଣତଃ ଋଣ ପାଇଁ ସିବିଲ୍ ସ୍କୋରକୁ ପ୍ରମୁଖ ମାପଦଣ୍ଡ ଭାବେ ବିଚାର କରାଯାଇ ଥାଏ। ଅର୍ଥାତ୍ ଯାହାର ସିବିଲ୍ ସ୍କୋର ଅଧିକ ରହିଥାଏ, ସମ୍ପୃୃକ୍ତ ବ୍ୟକ୍ତିଙ୍କୁ ଋଣ ମିଳିବା ସହଜ ହୋଇଯାଏ। ୭୫୦ ସିବିଲ ସ୍କୋରକୁ ଆଦର୍ଶ ବୋଲି ଗ୍ରହଣ କରାଯାଉଥିବାବେଳେ ଏହାଠାରୁ ୩୦-୫୦ ସ୍କୋର କମ୍ ଥିବା ବ୍ୟକ୍ତିଙ୍କୁ ମଧ୍ୟ ଋଣ ମିଳିଥାଏ। ସ୍କୋରକୁ ଧ୍ୟାନରେ ରଖି ଋଣର ମାତ୍ରା କମ୍-ବହୁତ ହୁଏ। ଅନେକ ଏଜେନ୍ସି ବ୍ୟାଙ୍କ ଓ ଗ୍ରାହକଙ୍କ ମଧ୍ୟରେ ଯୋଗସୂତ୍ର ଭାବେ କାର୍ଯ୍ୟ କରୁଛନ୍ତି। ସମ୍ପୃକ୍ତ ଏଜେନ୍ସିମାନେ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆର୍ବିଆଇ) ଦ୍ୱାରା ଅନୁମୋଦିତ ହୋଇଥିବାରୁ ବ୍ୟାଙ୍କ ଏମାନଙ୍କ ସହ ଅର୍ଥନୈତିକ କାର୍ଯ୍ୟକଳାପ କରିବାକୁ ପଛଘୁଞ୍ଚା ଦେଉନାହାନ୍ତି। ତେବେ ଏହି ଏଜେନ୍ସିମାନଙ୍କ ଏଜେଣ୍ଟ ମାନେ ହିଁ ଦଲାଲ ସାଜି ଲୋକଙ୍କଠାରୁ ଟଙ୍କା ଲୁଟୁଛନ୍ତି। ଯେଉଁମାନଙ୍କର ସିବିଲ୍ ଖରାପ ସେମାନଙ୍କୁ ଋଣ ଯୋଗାଇବାରେ ସହାୟତା କରୁଛନ୍ତି ଓ ପ୍ରତିବଦଳରେ ମୋଟା ଅଙ୍କର ଅର୍ଥ ନେଉଛନ୍ତି। ଋଣ ମିଳିସାରିବା ପରେ ଏଜେଣ୍ଟମାନେ ଋଣର ୫ ପ୍ରତିଶତ ନଗଦ ରାଶି ଦାବି କରୁଛନ୍ତି। ବାରମ୍ବାର ଆବେଦନ କରି ବିଫଳ ହୋଇଥିବା ବ୍ୟକ୍ତି ଋଣ ପାଇବା ଲୋଭରେ ଏଜେଣ୍ଟମାନଙ୍କୁ ଟଙ୍କା ଦେଉଛନ୍ତି। ପୁରୀ ସହରରେ ଏଭଳି ଏଜେଣ୍ଟମାନେ କ୍ରମାଗତ ଭାବେ ସକ୍ରିୟ ହେଉଥିବା ଦେଖିବାକୁ ମିଳୁଛି। ଲୋକଙ୍କୁ ଋଣ ନେବା ପାଇଁ କଲ୍ କରୁଥିବା ବ୍ୟକ୍ତି କୌଣସି ସରକାରୀ କିମ୍ବା ଘରୋଇ ବ୍ୟାଙ୍କର କର୍ମଚାରୀ ନୁହଁନ୍ତି ବୋଲି ଜଣାପଡ଼ୁଛି। ସମ୍ପୃକ୍ତ ଏଜେଣ୍ଟ ଋଣ କରାଇଦେବା ପାଇଁ ପ୍ରତିଶ୍ରୁତି ଦେଉଛନ୍ତି। ଜଣେ ବ୍ୟକ୍ତିଙ୍କର ସିବିଲ୍ ଯେତେ ଖରାପ ଥିଲେ ମଧ୍ୟ ତାହାକୁ ଠିକ୍ ସ୍କୋରକୁ ଅଣାଯାଇପାରିବ ବୋଲି ସେ ଦାବି କରୁଛନ୍ତି। ପ୍ରତିବଦଳରେ ଅତିକମ୍ରେ ଋଣର ୫ ପ୍ରତିଶତ ଦେବା ପାଇଁ କହୁଛନ୍ତି। ସଂପୃକ୍ତ ଟଙ୍କା ବଦଳରେ କୌଣସି ରସିଦ ମିଳିବ ନାହିଁ ବୋଲି ମଧ୍ୟ କୁହାଯାଉଛି। ଏଭଳି ଘଟଣା ବଢ଼ିବାରେ ଲାଗିଛି। ଋଣ ଚାହୁଁଥିବା ଲୋକେ ଏନେଇ ବିରୋଧ କରୁନାହାନ୍ତି, ଓଲଟା ଟଙ୍କା ଦେଇ ଋଣ ଉଠାଇ ଆଣୁଛନ୍ତି ବୋଲି ଏକ ବ୍ୟାଙ୍କର ଗ୍ରାହକ ଚିରଞ୍ଜୀବୀ ପରିଡ଼ା କହିଛନ୍ତି। ସେ କହିଛନ୍ତି, ଜଣେ ବ୍ୟକ୍ତି ଯଦି ଋଣ ନେବା ପାଇଁ ଯୋଗ୍ୟ ନୁହେଁ, ତେବେ ତାଙ୍କୁ ଋଣ ନ ମିଳିବା ଉଚିତ ନଚେତ ସ୍ବଳ୍ପ ଋଣ ଦିଆଯିବା ଦରକାର। ମାତ୍ର ସଂପୃକ୍ତ ଅର୍ଥନୈତିକ ପରାମର୍ଶଦାତା ଏଜେନ୍ସିମାନେ ନିଜ କ୍ଷମତାର ଦୂରୁପଯୋଗ କରୁଛନ୍ତି। ଅନୈତିକ ଉପାୟରେ ଲୋକଙ୍କୁ ଋଣ ଦେଇ ନିଜେ ଲାଭବାନ ହେଉଛନ୍ତି। ସେହିଭଳି ଏକ ଘରୋଇ ବ୍ୟାଙ୍କର ମ୍ୟାନେଜର ନିଜ ନାମ ଗୋପନ ରଖି କହିଛନ୍ତି, ସରକାରୀ ବ୍ୟାଙ୍କରେ ଏଭଳି କାର୍ଯ୍ୟକଳାପ ହେଉଥାଇପାରେ। ମାତ୍ର ଘରୋଇ ବ୍ୟାଙ୍କରେ ଏହା ସମ୍ଭବ ନୁହେଁ। ଅନ୍ୟପକ୍ଷରେ ଅର୍ଥନୈତିକ ବିଶେଷଜ୍ଞ ପ୍ରିୟମ୍ବଦା ପ୍ରିୟଦର୍ଶିନୀ କହିଛନ୍ତି, ସିବିଲ ସ୍କୋରକୁ ଅଚାନକ ଭାବେ ବଢାଯାଇପାରିବ ନାହିଁ। ଯଦି ଋଣ ପଇଠରେ ଅନିୟମିତତା ହୋଇଛି, ତେବେ ଏହାକୁ ଧିରେ ଧିରେ ନିର୍ଦ୍ଦିଷ୍ଟ ପଦ୍ଧତିରେ ଠିକ୍ କରାଯାଇପାରିବ। ସିବିଲ୍ ସୁଧାରିବା ପାଇଁ ଅନେକ ଏଜେନ୍ସି ମଧ୍ୟ ରହିଛନ୍ତି। ସେମାନେ ପରାମର୍ଶଦାତା ଭାବେ କାର୍ଯ୍ୟ କରନ୍ତି। ମାତ୍ର ଯେଉଁ ଅଭିଯୋଗ ସମ୍ପର୍କରେ ଏଠାରେ ଉଲ୍ଲେଖ କରାଯାଉଛି ତାହା ସମ୍ପୂର୍ଣ୍ଣ ରୂପେ ଅନୈତିକ। ଅକସ୍ମାତ୍ ସିବିଲ୍ ଠିକ୍ କରି ଋଣ ଦେବା ଦ୍ୱାରା ଅନେକ ପ୍ରମୁଖ ସମସ୍ୟାର ସାମ୍ନା କରିବାକୁ ପଡ଼ିବ। ମୁଖ୍ୟତଃ ଋଣ ନେବାର କ୍ଷମତା ନ ଥିବା ଲୋକଙ୍କୁ ମାତ୍ରାଧିକ ଋଣ ଦେବା ଫଳରେ ଏନ୍ପିଏ (ନନ୍ ପର୍ଫର୍ମିଂ ଆସେଟ୍) ବଢ଼ୁଛି। ସେହିଭଳି ଦଲାଲମାନେ ଟଙ୍କା ଲୁଟୁଥିବାରୁ ବଜାରରେ କଳାଧନ ବଢ଼ିବାରେ ଲାଗିଛି।
