ମହାକାଳପଡ଼ା,୧୩ା୯(ଡି.ଏନ୍.ଏ.):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳରେ ଚାଷଜମିରୁ ବନ୍ୟା, ଲୁଣିପାଣି, ଉଦ୍ବୃତ୍ତ ବର୍ଷାଜଳ ନିୟନ୍ତ୍ରଣ ଓ ନିଷ୍କାସନ ପାଇଁ ରାଜ୍ୟ ଜଳ ସମ୍ପଦ ବିଭାଗ ପକ୍ଷରୁ ୨ଟି ସ୍ଲୁଇସ୍ କ୍ରିକ୍ ଗେଟ୍ କରାଯାଇଛି। ଗୋବରୀ ନଦୀ ମାଉଥ ୧- ଭାଟେଣୀ ଓ ମହାନଦୀ ସଂଲଗ୍ନ ଗୁପ୍ତଗିରି ନଦୀକୁ ସଂଯୋଗ କରୁଥିବା ଆଖଡାସାହିଠାରେ ଉଦ୍ଘାଟିତ ହୋଇଥିଲା। କିନ୍ତୁ ଭାଟେଣୀ ସ୍ଲୁଇସ୍ କ୍ରିକ୍ ଗେଟ୍ଟି ଭାଙ୍ଗିଯିବାରୁ ତାହା କାର୍ଯ୍ୟକ୍ଷମ ହୋଇନାହିଁ। ଏହା ଉପରେ ଦେଇ କେବୀ ଦାଣ୍ଡୁଆ ପଞ୍ଚାୟତର ବଗଗହନ, ପଙ୍କପାଳ ଗଁା ଲୋକେ, ଛାତ୍ରୀଛାତ୍ର ଭାଟେଣୀସ୍ଥିତ ନରେନ୍ଦ୍ରନାଥ ଉଚ୍ଚ ପ୍ରାଥମିକ ବିଦ୍ୟାଳୟ ଓ ବେଣାକନ୍ଧା ହାଇସ୍କୁଲକୁ ବିପଦସଙ୍କୁଳ ଭାବେ ପ୍ରତିଦିନ ଯାତାୟାତ କରୁଛନ୍ତି।
ସୂଚନଯୋଗ୍ୟ, ବ୍ଲକର ଜମ୍ବୁ ପଞ୍ଚାୟତର ସ୍ଥାନୀୟ ଗୋବରୀ ନଦୀ ମାଉଥ ୧-ଭାଟେଣୀଠାରେ ୨୦୦୩ ଜୁଲାଇରେ ନୂତନ ସ୍ଲୁଇସ୍ କ୍ରିକ୍ ଗେଟ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଶିଳାନ୍ୟାସ କରାଯାଇଥିଲା। ଏହାର ପ୍ରାଥମିକ ବ୍ୟୟ ଅଟକଳ ୯୭ ଲକ୍ଷ ଟଙ୍କା ଥିଲା। ପରବର୍ତ୍ତୀ ସମୟରେ ଏହି ପ୍ରକଳ୍ପରେ ୬ କୋଟି ଟଙ୍କା ବ୍ୟୟ ହୋଇଥିଲା। ଭାଟେଣୀ ସ୍ଲୁଇସ୍ ଗେଟ୍ ନିର୍ମାଣରେ ବୈଷୟିକ ଜ୍ଞାନକୌଶଳ ତ୍ରୁଟି ଓ ନିମ୍ନମାନର କାମ ଯୋଗୁ ୨୦୦୭ ପଞ୍ଚାୟତ ନିର୍ବାଚନ ପୂର୍ବରୁ ଉଦ୍ଘାଟନ ହେବାକୁ ଥିବାବେଳେ ଭୁଶୁଡ଼ି ପଡ଼ିଥିଲା। ଫଳରେ ୬ କୋଟି ଟଙ୍କା ବ୍ୟୟରେ ନିର୍ମିତ ପ୍ରକଳ୍ପର ଅର୍ଥ ପାଣିରେ ପଡ଼ିଥିଲା। ମହାନଦୀ ସଂଲଗ୍ନ ଶାଖା ଗୁପ୍ତଗିରି ନଦୀକୁ ସଂଯୋଗ କରୁଥିବା ଆଖଡ଼ାସାହିଠାରେ ୨୦୧୩ ମେ’ରେ ନୂଆ ସ୍ଲୁଇସ୍ କ୍ରିକ୍ ଗେଟ୍ ନିର୍ମାଣ କାର୍ଯ୍ୟ ପାଇଁ ୭ କୋଟି ଟଙ୍କା ବ୍ୟୟ ଅଟକଳରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶିଳାନ୍ୟାସ କରିଥିଲେ। ଫଳରେ ବରକନ୍ଧା ଓ ପେଟଛେଲା ପଞ୍ଚାୟତର ଆଖଡ଼ାସାହିଠାରେ ୨୦୧୩ରେ ନୂଆ ସ୍କୁଇସ୍ ଗେଟ୍ ନିର୍ମାଣ ଆରମ୍ଭ ହୋଇ ୨୦୧୮ରେ ନିର୍ମାଣ ସମ୍ପୂର୍ଣ୍ଣ ହୋଇଥିଲା। ଅଦ୍ୟାବଧି ଦୁଇପାର୍ଶ୍ୱରେ (ଆପ୍ରୋଚ୍ ରୋଡ୍) ରାସ୍ତା ପାଇଁ ଘରୋଇ ଜମି ଅଧିଗ୍ରହଣ ସମସ୍ୟା ଯୋଗୁ ସଂଯୋଗ ହୋଇ ନ ପାରି ଅଧାପନ୍ତରିଆ ଭାବେ ୪ ବର୍ଷ ହେଲା ପଡ଼ିଛି। ଫଳରେ ରାମନଗର, ବଉଳକଣି, ପେଟଛେଲା, ବରକନ୍ଧା, ମଙ୍ଗଳପୁର, ବାରଡାଙ୍ଗ ପଞ୍ଚାୟତର ଶତାଧିକ ହେକ୍ଟର ଚାଷ ଜମିରେ ଖରାଦିନେ ସମୁଦ୍ର ଲୁଣି ପାଣି ପ୍ରବେଶ କରୁଛି। ଏଥିସହ ପ୍ରତିବର୍ଷ ମହାନଦୀର ବନ୍ୟାଜଳ ପ୍ରବେଶ ଯୋଗୁ ଖରିଫ୍ ଫସଲ ବାଧାପ୍ରାପ୍ତ ହେଉଛି। ଏହି ୨ଟି ସ୍ଲୁଇସ୍ କ୍ରିକ୍ କାର୍ଯ୍ୟକ୍ଷମ ହେବା ନେଇ ଏବେ ଅନିଶ୍ଚିତତା ଦେଖାଦେଇଛି ବୋଲି ସ୍ଥାନୀୟ ଚାଷୀମାନେ କହିଛନ୍ତି।
ସେହିପରି ମହାନଦୀ ଓ ଶାଖା ଗୁପ୍ତଗିରି ନଦୀକୁ ସଂଯୋଗ କରୁଥିବା ଆଖଡ଼ାସାହିଠାରେ ସ୍ଲୁଇସ୍ କ୍ରିକ ଗେଟ୍ ଦେଇ ୬ଟି ପଞ୍ଚାୟତର ଶତାଧିକ ହେକ୍ଟର ଚାଷଜମିରେ ଚଳିତବର୍ଷ ବନ୍ୟାଜଳ ପ୍ରବେଶକରି ଖରିଫ୍ ଫସଲ ନଷ୍ଟ କରିଛି ବୋଲି ପ୍ରାକ୍ତନ ସରପଞ୍ଚ ନାଥ କୁମାର ଭୋଳ କହିଛନ୍ତି। ସେହିପରି ଗୋବରୀ ମାଉଥ୍ ୧ ଭାଟେଣୀଠାରେ ଭଗ୍ନ ସ୍ଲୁଇସ୍ କ୍ରିକ୍ ଦେଇ ମହାକାଳପଡ଼ା ଓ ପଟ୍ଟାମୁଣ୍ଡାଇ ବ୍ଲକର ହଜାର ହଜାର ହେକ୍ଟର ଚାଷଜମିର ଉଦ୍ବୃତ୍ତ ବର୍ଷାଜଳ ନିଷ୍କାସନ ପଥ ଦେଇ ସମୁଦ୍ରକୁ ଯାଇଥାଏ। ଖରାଦିନେ ଏହି ଭାଟେଣୀ କ୍ରିକ୍ ଏହି ଦୁଇ ବ୍ଲକର ଶତାଧିକ ହେକ୍ଟର ଚାଷଜମିରେ ସମୁଦ୍ର ଲୁଣି ପାଣି ପ୍ରବେଶ କରି ଫସଲ ନଷ୍ଟ କରିଛି। ରାଜ୍ୟ ସରକାର ଏହି ୨ଟି ପ୍ରକଳ୍ପ କାର୍ଯ୍ୟକ୍ଷମ କରିବାକୁ ସ୍ଥାନୀୟ ବୁଦ୍ଧିଜୀବୀ, ସାମାଜିକ କର୍ମୀ, ଚାଷୀମାନେ ଦାବି କରିଛନ୍ତି। ଏହି ୨ଟି ସ୍ଲୁଇସ୍ କ୍ରିକ୍ କାର୍ଯ୍ୟକ୍ଷମ ହେଲେ ଖରାଦିନେ ସମୁଦ୍ର ଲୁଣିପାଣି ଓ ବର୍ଷାଦିନେ ବନ୍ୟାଜଳକୁ ନିୟନ୍ତ୍ରଣ କରାଯାଇ ଚାଷୀଙ୍କ ଖରିଫ, ରବି, ପରିବା ସମେତ ଅନ୍ୟାନ୍ୟ ଫସଲ ଉତ୍ପାଦନ ହେବ। ଏଥିସହ ହଜାର ହଜାର ହେକ୍ଟର ଚାଷଜମିକୁ ମଧୁର ଜଳସେଚିତ ହୋଇପାରିବ ବୋଲି ବିରଞ୍ଚତ୍ ନାରାୟଣ ଦାସ, ସୁବାସ ଚନ୍ଦ୍ର ସ୍ବାଇଁ ପ୍ରମୁଖ ଦାବି କରିଛନ୍ତି।
