ଛତ୍ରପୁର,୭।୧(ଡି.ଏନ୍.ଏ.)- ଡ୍ରଗ ଲାଇସେନ୍ସ କରାଇ ଦେବାକୁ ଗଞ୍ଜାମ ଜିଲାପାଳଙ୍କ କାର୍ଯ୍ୟାଳୟର ଆସିଷ୍ଟାଣ୍ଟ କଲେକ୍ଟର ବନମାଳୀ ଶତପଥୀ ୨ ଲକ୍ଷ ଟଙ୍କା ଲାଞ୍ଚ ନେଇଥିବା ଅଭିଯୋଗ ହୋଇଛି । ଗତ ସପ୍ତାହରେ ଜିଲାପାଳଙ୍କ କୋର୍ଟରେ ଉକ୍ତ ମାମଲାର ଶୁଣାଣି ହୋଇସାରିଛି । ଆସିଷ୍ଟାଣ୍ଟ କଲେକ୍ଟରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ସହ ତାଙ୍କୁ ପ୍ରି-ମାଚ୍ୟୁର ଅବସର ଦେବାପାଇଁ ରାଜ୍ୟ ସରକାରଙ୍କୁ ଜିଲାପାଳ ବିଜୟ ଅମୃତା କୁଲାଙ୍ଗେ ଚିଠି ଲେଖିଛନ୍ତି । ଶତପଥୀ ପୂର୍ବରୁ ଜିଲାପାଳଙ୍କ ଅଭିଯୋଗ ଶୁଣାଣି ସେଲ୍ରେ କାର୍ଯ୍ୟ କରୁଥିଲେ । ଡ୍ରଗ୍ ଲାଇସେନ୍ସ ପ୍ରଦାନ ପାଇଁ ତାଙ୍କର କ୍ଷମତା ନ ଥିବା ସତ୍ତ୍ୱେ ନିଜ ପଦବୀର ଅପବ୍ୟବହାର କରିଥିବାରୁ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ଆସିଷ୍ଟାଣ୍ଟ କଲେକ୍ଟରଙ୍କ ଭଳି ବ୍ରହ୍ମପୁରସ୍ଥିତ ଡେପୁଟି ଡ୍ରଗ୍ କଣ୍ଟ୍ରୋଲର (ସାଉଥ ଜୋନ୍) ମଧ୍ୟ ଡ୍ରଗ୍ ଲାଇସେନ୍ସ ଆବେଦନକାରୀଙ୍କୁ ହଇରାଣ କରିଥିବା ଜିଲାପାଳଙ୍କ ନିକଟରେ ଅଭିଯୋଗ ହୋଇଥିଲା। ଏହାର ତଦନ୍ତ କରିବାକୁ ଗତ ୨୩ ତାରିଖରେ ଜିଲାପାଳଙ୍କ ପକ୍ଷରୁ ଭିଜିଲାନ୍ସ ଏସ୍ପିଙ୍କୁ ଚିଠି କରାଯାଇଥିଲା । ପୁଣିଥରେ ଭିଜିଲାନ୍ସକୁ ଚିଠି ଲେଖାଯିବ ବୋଲି ଜିଲାପାଳ ସୂଚନା ଦେଇଛନ୍ତି । ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ପ୍ରୋସିଡିଙ୍ଗ ଆରମ୍ଭ ହୋଇଥିବା ଜିଲାପାଳ ଗୁରୁବାର କହିିଛନ୍ତି ।
ପ୍ରକାଶ ଯେ, ଆସିକା ବାଣୀବିହାରର ପବିତ୍ର ମୋହନ ଜେନାଙ୍କ ମେଡିକାଲ ଷ୍ଟୋର ରହିଛି । ପବିତ୍ରଙ୍କ ମୃତ୍ୟୁ ପରେ ନୂଆ ଡ୍ରଗ୍ ଲାଇସେନ୍ସ ପ୍ରଦାନ ପାଇଁ ତାଙ୍କ ସ୍ତ୍ରୀ ମିନତୀ ଜେନା ଆବେଦନ କରିଥିଲେ । ତେବେ ଏହି ଲାଇସେନ୍ସ ଦେବା ପାଇଁ ବ୍ରହ୍ମପୁରସ୍ଥିତ ଡେପୁଟି ଡ୍ରଗ୍ କଣ୍ଟ୍ରୋଲର ହଇରାଣ କରିଥିବା ମିନତୀ ଅଭିଯୋଗ କରିଛନ୍ତି । ପରେ ତାଙ୍କ ଝିଅ ଏ ସମ୍ପର୍କରେ ଜିଲାପାଳଙ୍କ କାର୍ଯ୍ୟାଳୟରେ ଥିବା ହେଲ୍ପ ଲାଇନ୍ ନମ୍ବରକୁ ଫୋନ୍ କରି ଅଭିଯୋଗ କରିଥିଲେ । ହେଲ୍ପ ଲାଇନ୍ ଦାୟିତ୍ୱରେ ଥିବା ଆସିଷ୍ଟାଣ୍ଟ କଲେକ୍ଟର ନିଜ ମୋବାଇଲରେ ମିନତୀଙ୍କ ଝିଅଙ୍କୁ ଫୋନ୍ କରି ୨ ଲକ୍ଷ ଟଙ୍କା ଦେଲେ ଡ୍ରଗ୍ ଲାଇସେନ୍ସ ଡେପୁଟି ଡ୍ରଗ୍ ଡ୍ରଗ୍ କଣ୍ଟ୍ରୋଲରଙ୍କୁ କହି ଲାଇସେନ୍ସ କରାଇଦେବେ ବୋଲି କହିଥିଲେ । ପରେ ଆସିଷ୍ଟାଣ୍ଟ କଲେକ୍ଟର ୨ ଲକ୍ଷ ଟଙ୍କା ନେଇଥିଲେ ବୋଲି ଅଭିଯୋଗ ହୋଇଛି । ଦୀର୍ଘ ମାସ ପରେ ମଧ୍ୟ ଡ୍ରଗ୍ ଲାଇସେନ୍ସ ନ ମିଳିବାରୁ ଟଙ୍କା ଫେରାଇ ଦେବାକୁ ମିନତୀଙ୍କ ଝିଅ ବାରମ୍ବାର କହିିବା ପରେ ଆସିଷ୍ଟାଣ୍ଟ କଲେକ୍ଟର ବର୍ତ୍ତମାନ ସୁଦ୍ଧା ୧ ଲକ୍ଷ ୭୦ ହଜାର ଟଙ୍କା ଫେରାଇଥିବା ଜଣାପଡ଼ିଛି।
