ବେଜିଂ,୨୪।୧୦: ଲାଇନ ଅଫ୍ ଆଚ୍ୟୁଆଲ କଣ୍ଟ୍ରୋଲ (ଏଲ୍ଏସି)ରେ ଭାରତ ସହିତ ଚାଇନାର ଉତ୍ତେଜନା ଥମିବାର ନାଁ ଧରୁନି। ଏପରିସ୍ଥଳେ ସୀମାର ବିବାଦୀୟ ଜମି ହାତେଇବା ପାଇଁ ଚାଇନା ନୂଆ ଷଡ଼ଯନ୍ତ୍ର କରିଛି। ଚାଇନାର ଜାତୀୟ ପିପୁଲ୍ସ କଂଗ୍ରେସର ସ୍ଥାୟୀ ସଦସ୍ୟମାନେ ଏକ ନୂତନ ଜମି ସୀମା ଆଇନ ପ୍ରଣୟନ କରିଛନ୍ତି।
ଏହା ଅନୁଯାୟୀ ଚାଇନା ସୀମା ଅଞ୍ଚଳରେ ନିଜର ବିସ୍ତାରବାଦୀ ନୀତି ମାଧ୍ୟମରେ ହସ୍ତକ୍ଷେପ ବୃଦ୍ଧି କରିବାକୁ ଯାଉଛି। ଏହି ଅଞ୍ଚଳରେ ସାଧାରଣ ନାଗରିକଙ୍କ ଲାଗି ଜନବସତି ସ୍ଥାପନ କରିବାକୁ ଚାଇନା ପ୍ରସ୍ତୁତ ହେଉଛି। ଫଳରେ ଏହି ଅଞ୍ଚଳରେ ସାମରିକ କାର୍ଯ୍ୟାନୁଷ୍ଠାନ କରିବା ଭାରତ ପାଇଁ କଷ୍ଟସାଧ୍ୟ ହୋଇ ପଡ଼ିବ।
ଚାଇନାର ଏହି ନୂଆ ଆଇନ ଦେଶର ସାର୍ବଭୌମତ୍ୱ ତଥା ଆଞ୍ଚଳିକ ଅଖଣ୍ଡତାକୁ ପ୍ରଭାବଶାଳୀ କରିବାକୁ ସକ୍ଷମ ହେବ ବୋଲି କୁହାଯାଉଛି। ଏହା ଅନ୍ତର୍ଗତ ସୀମାନ୍ତ ଅଞ୍ଚଳରେ ଚାଇନା ସୁରକ୍ଷା ବ୍ୟବସ୍ଥା ବୃଦ୍ଧି କରାଯିବ। ଏହା ସହିତ ଅର୍ଥନୈତିକ, ସାମାଜିକ ବିକାଶ ସହିତ ଜନସାଧାରଣ ଲୋକଙ୍କ ବାସ ଉପଯୋଗୀ କ୍ଷେତ୍ର ଏବଂ ଭିତ୍ତିଭୂମି ବିକାଶ ଉପରେ ମଧ୍ୟ ଗୁରୁତ୍ୱାରୋପ କରାଯିବ। ଆସନ୍ତା ୨୦୨୨ ବର୍ଷ ଜାନୁୟାରୀ ୧ ରୁ ଏହି ଆଇନ କାର୍ଯ୍ୟକାରୀ ହେବ।
ଭାରତ ଏବଂ ଚାଇନା ମଧ୍ୟରେ ଏକ ଦୀର୍ଘ ସୀମା ବିବାଦ ରହିଛି। ଦୁଇ ଦେଶ ମଧ୍ୟରେ ଏଲ୍ଏସି ନେଇ ହୋଇଥିବା ଚୁକ୍ତି ଏପର୍ଯ୍ୟନ୍ତ ଚୂଡାନ୍ତ ହୋଇନାହିଁ। ଏଭଳି ପରିସ୍ଥିତିରେ ଚାଇନା ଏବଂ ଭାରତ ମଧ୍ୟରେ ଅନେକ ସମୟରେ ତିକ୍ତତାର ବାତାବରଣ ସୃଷ୍ଟି ହେଉଛି। ଲଦାଖ ସେକ୍ଟରରେ ଉଭୟ ଦେଶର ବହୁ ଥର ମୁହାଁମୁହିଁ ହୋଇଛନ୍ତି ଏବଂ ସୀମାରେ ମଧ୍ୟ ହିଂସାତ୍ମକ ସଂଘର୍ଷ ଘଟିଛି।
ଏଭଳି ପରିସ୍ଥିତିରେ ଚାଇନା ଦ୍ୱାରା ସ୍ବୀକୃତ ହୋଇଥିବା ନୂତନ ଆଇନ ଭାରତ-ଚାଇନା ସୀମା ଚୁକ୍ତିନାମାକୁ ପ୍ରଭାବିତ କରିବାର ଆଶଙ୍କା ସୃଷ୍ଟି ହୋଇଛି। ଫଳରେ ଏକ ନୂତନ ବିବାଦ ସୃଷ୍ଟି ହେବ ବୋଲି ଚର୍ଚ୍ଚା ହେଉଛି। ଭାରତ ଏବଂ ଭୁଟାନ ମଧ୍ୟରେ ବି ସୀମା ବିବାଦ ରହିଛି।
ତେବେ ଚାଇନାର ସୀମା ବିବାଦ ଭାରତ ଏବଂ ଭୁଟାନଠାରୁ ଅଧିକ ଗୁରୁତର। ଭାରତ ଏବଂ ଚାଇନା ମଧ୍ୟରେ ୩୪୮୮ କିଲୋମିଟର ସୀମା ବିବାଦ ରହିଥିବାବେଳେ ଭୁଟାନ ସହିତ ପ୍ରାୟ ୪୦୦ କିଲୋମିଟରର ବିବାଦ ରହିଛି। ଚାଇନା ଅନ୍ୟ ୧୨ଟି ଦେଶ ସହିତ ସୀମା ବିବାଦର ସମାଧାନ କରି ସାରିଛି। ତେବେ ଭାରତ ସହିତ ଥିବା ବିବାଦର ସମାଧାନ ହୋଇ ନାରି ନାହିଁ।
