ବେଜିଂ,୨୫।୪ : ଭାରତ ଏବଂ ଚାଇନା ମଧ୍ୟରେ ୧୮ ତମ ରାଉଣ୍ଡ କର୍ପସ କମାଣ୍ଡର ବୈଠକ ପରେ ଚାଇନା ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ବିବୃତ୍ତି ଦିଆଯାଇଛି। ବୈଠକରେ ସମ୍ପର୍କରେ କୁହାଯାଇଛି , ସୀମା ଅଞ୍ଚଳରେ ଶାନ୍ତି ବଜାୟ ରଖିବାକୁ ଉଭୟ ଚାଇନା ଏବଂ ଭାରତ ସହମତ ହୋଇଛନ୍ତି।
ଏହା ସହିତ, ଏହା ମଧ୍ୟ ସହମତ ହୋଇଛି, ପୂର୍ବ ଲଦାଖରେ ଦୀର୍ଘ ଦିନ ଧରି ଚାଲିଆସୁଥିବା ଅବରୋଧ ସହ ଜଡିତ ପ୍ରସଙ୍ଗଗୁଡିକ ଶୀଘ୍ର ସମାଧାନ କରାଯିବ। ଏପ୍ରିଲ ୨୩ରେ, ଚୁସୁଲ-ମୋଲଡୋ ସୀମା ବୈଠକରେ ଚାଇନା-ଇଣ୍ଡିଆ କର୍ପସ କମାଣ୍ଡର ସ୍ତରର ବୈଠକ ଅନୁଷ୍ଠିତ ହୋଇଥିଲା।
୫ ମାସ ପରେ ଦୁଇ ଦେଶ ମଧ୍ୟରେ ଏହି ବୈଠକ ଅନୁଷ୍ଠିତ ହୋଇଥିଲା। ଫାୟାର ଫ୍ୟୁରି କର୍ପସ କମାଣ୍ଡର ଲ୍ୟୁଟନାଟ ଜେନେରାଲ ରସିମ ବାଲି ଭାରତରୁ ଏଥିରେ ଭାଗ ନେଇଥିଲେ।
ଏହି ବୈଠକକୁ ନେଇ ପିପୁଲ୍ସ ଲିବରେସନ ଆର୍ମି (ପିଏଲଏ) ର ବିବୃତ୍ତିରେ ଆସିଛି, ଉଭୟ ପକ୍ଷ ମଧ୍ୟରେ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଖୋଲାଖୋଲି ଆଲୋଚନା ହୋଇଥିଲା। ଏଥିସହ ମତ ବିନିମୟ ହୋଇଥିଲା। ବିଶେଷ କଥା ହେଉଛି ୨୭ ଏବଂ ୨୮ ଏପ୍ରିଲରେ ଭାରତରେ ଅନୁଷ୍ଠିତ ହେବାକୁ ଥିବା ସାଂଘାଇ ସହଯୋଗ ସଂଗଠନ ସମ୍ମିଳନୀ ପୂର୍ବରୁ ଏହି ବୈଠକ ଅନୁଷ୍ଠିତ ହୋଇଛି ଯେଉଁଥିରେ ଚାଇନା ପ୍ରତିରକ୍ଷା ମନ୍ତ୍ରୀ ଲି ଶାଙ୍ଗଫୁ ମଧ୍ୟ ଅଂଶଗ୍ରହଣ କରିବେ।
