ଡେରାବିଶ, ୪।୬(ବେବର୍ତ୍ତା ଅଜୟ ଦାସ): କେନ୍ଦ୍ରାପଡ଼ା ଜିଲା ଡେରାବିଶ ଥାନା ଅଞ୍ଚଳରେ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ୫୩ ନମ୍ବର ଜାତୀୟ ରାଜପଥର ଲକ୍ଷ୍ମୀନାରାୟଣପୁର ଛକ ନିକଟରେ ଛିଡ଼ା ହୋଇଥିବା ଏକ ହାଇୱା ଗାଡ଼ିର ବନ୍ଦ କେବିନ୍ ଭିତରୁ ଗୁରୁବାର ସନ୍ଧ୍ୟାରେ ଜଣେ ଯୁବକଙ୍କ ମୃତଦେହ ଉଦ୍ଧାର କରାଯାଇଛି। ମୃତ ଯୁବକ ଜଣକ ହେଲେ ନିକିରେଇ ଥାନା ଚକରଘୁନାଥପୁର ଗ୍ରାମର ପ୍ରଫୁଲ୍ଲ ଜେନା (୩୬)। ପରିବାର ପକ୍ଷରୁ ଏହାକୁ ଏକ ସନ୍ଦେହଜନକ ମୃତ୍ୟୁ ବୋଲି ଦର୍ଶାଇ ଥାନାରେ ଅଭିଯୋଗ କରାଯିବା ପରେ ପୋଲିସ ହାଇୱା ସହ ମୃତଦେହକୁ ଜବତ କରି ତଦନ୍ତ ଆରମ୍ଭ କରିଛି।
ସୂଚନା ଅନୁଯାୟୀ, ଲକ୍ଷ୍ମୀନାରାୟଣପୁର ଛକ ନିକଟରେ (OD-04-U-2531) ନମ୍ବର ବିଶିଷ୍ଟ ଏକ ହାଇୱା ଦୀର୍ଘ ସମୟ ଧରି ଛିଡ଼ା ହୋଇ ରହିଥିଲା ଏବଂ ତା’ର କେବିନ୍ ଦ୍ୱାର ସମ୍ପୂର୍ଣ୍ଣ ବନ୍ଦ ଥିଲା। ଏହା ଦେଖି ସ୍ଥାନୀୟ ଲୋକଙ୍କ ମଧ୍ୟରେ ସନ୍ଦେହ ଜାତ ହେବାରୁ ସେମାନେ ଭିତରକୁ ଚାହିଁ ଜଣେ ଯୁବକ ଅଚେତ ଅବସ୍ଥାରେ ପଡ଼ିଥିବା ଦେଖି ପୋଲିସକୁ ଖବର ଦେଇଥିଲେ।
ପ୍ରଫୁଲ୍ଲଙ୍କ ସମ୍ପର୍କୀୟ ଭାଇ ନିହାର ରଞ୍ଜନ ଜେନାଙ୍କ ସୂଚନା ମୁତାବକ, ବୁଧବାର ପ୍ରଫୁଲ୍ଲ ଓ ତାଙ୍କ ସହଯୋଗୀ ଅନ୍ୟ ଦୁଇଜଣ ଡ୍ରାଇଭର ତିନୋଟି ହାଇୱା ରାସ୍ତାକଡ଼ରେ ରଖି ଘରକୁ ଯାଇଥିଲେ। ଗୁରୁବାର ସକାଳେ ସମସ୍ତେ ଗାଡ଼ି ପାଖକୁ ଫେରିଥିଲେ। ଅନ୍ୟ ଦୁଇଜଣ ହାଇୱା ନେଇ ପାରାଦ୍ୱୀପ ବାହାରିଯାଇଥିବା ବେଳେ ପ୍ରଫୁଲ୍ଲ “ମତେ ନିଦ ଲାଗୁଛି” କହି କେବିନ୍ ଭିତରେ ଶୋଇପଡ଼ିଥିଲେ।
ବାଟରେ ପ୍ରଫୁଲ୍ଲଙ୍କ ଗାଡ଼ି ଆସିବାରେ ବିଳମ୍ବ ଦେଖି ଅନ୍ୟ ଦୁଇ ଡ୍ରାଇଭର ତାଙ୍କୁ ବାରମ୍ବାର ଫୋନ୍ କରିଥିଲେ ମଧ୍ୟ ପ୍ରଫୁଲ୍ଲ ଫୋନ୍ ଉଠାଇ ନ ଥିଲେ। ସେମାନେ ପାରାଦ୍ୱୀପରୁ ମାଲ୍ ଅନଲୋଡ୍ କରି ସନ୍ଧ୍ୟାରେ ଫେରିବା ବେଳେ ପ୍ରଫୁଲ୍ଲଙ୍କ ଗାଡ଼ି ସେମିତି ଛିଡ଼ା ହୋଇଥିବା ଦେଖି ସ୍ଥାନୀୟ ଲୋକଙ୍କ ସହାୟତାରେ କେବିନ୍ ଦ୍ୱାର ଖୋଲିଥିଲେ ଏବଂ ଭିତରେ ପ୍ରଫୁଲ୍ଲଙ୍କ ମୃତଦେହ ପଡ଼ିଥିବା ଦେଖିବାକୁ ପାଇଥିଲେ।
ଘଟଣା ସମ୍ପର୍କରେ ଜାଣିବା ପରେ ପ୍ରଫୁଲ୍ଲଙ୍କ ସମ୍ପର୍କୀୟମାନେ ତୁରନ୍ତ ଡେରାବିଶ ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇବା ସହ ହାଇୱା ଗାଡ଼ିଟିକୁ ନିଜ ହେପାଜତକୁ ନେଇଛି। ପରିବାର ଲୋକେ ଏହାକୁ ଏକ ସନ୍ଦେହଜନକ ମୃତ୍ୟୁ ବା ହତ୍ୟାକାଣ୍ଡ ବୋଲି ସନ୍ଦେହ କରୁଥିବାରୁ ପୋଲିସ ସମସ୍ତ ଦିଗକୁ ଆଧାର କରି ତଦନ୍ତ ଚଳାଇଛି।
ପ୍ରଫୁଲ୍ଲଙ୍କ ବାପା ବାର୍ଦ୍ଧକ୍ୟ ଓ ରୋଗ ଜନିତ କାରଣରୁ ଦୀର୍ଘ ଦିନ ହେବ ଶେଯରେ ପଡ଼ିରହିଥିବା ବେଳେ, ପରିବାରର ଏକମାତ୍ର ରୋଜଗାରିଆ ପୁଅ ଚାଲିଯିବା ପରେ ତାଙ୍କ ସ୍ତ୍ରୀ ଓ ୪ ବର୍ଷର କୋମଳମତି ଝିଅ ସମ୍ପୂର୍ଣ୍ଣ ଅସହାୟ ହୋଇପଡ଼ିଛନ୍ତି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଗଭୀର ଶୋକର ଛାୟା ଖେଳିଯାଇଛି।
