କୁଆଁରମୁଣ୍ଡା,୨୮।୬(ମହେନ୍ଦ୍ର କୁମାର ସାହୁ): ସୁନ୍ଦରଗଡ଼ ଜିଲା ବୀରମିତ୍ରପୁର ଥାନା ଅଧୀନ କୁମଝରିଆ ପଞ୍ଚାୟତ ବିଜାବାହାଲ ନିକଟସ୍ଥ ଏକ ରାଇସ ମିଲ୍ ପରିସରରୁ ଜଣେ ବୃଦ୍ଧାଙ୍କ ମୃତଦେହ ମିଳିଛି। ଶରୀରର କିଛି ଅଂଶ ରାଇସ ମିଲରୁ ବାହାରି ଥିବା ପୋଡ଼ା କୁଣ୍ଡା ଭିତରେ ରହି ପୋଡ଼ିଯାଇଥିବା ଜଣାପଡ଼ିଛି। ମୃତ ବୃଦ୍ଧା ଜଣକ ଲାସେ ଗ୍ରାମର ବୁଧନୀ ଲାଖୁଆ(୬୫) ବୋଲି ଆଇଆଇସି ରାମ ପ୍ରସାଦ ନାଗ ସୂଚନା ଦେଇଛନ୍ତି।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛି। ଏନେଇ ପୋଲିସ ଥାନାରେ ଏକ ମାମଲା(ନଂ.୨୯୯/୨୬) ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ସୋମବାର ମୃତଦେହ ବ୍ୟବଚ୍ଛେଦ କରାଯିବ ବୋଲି ପୋଲିସ କହିଛି।
ମିଳିଥିବା ସୂଚନା ମୁତାବକ, ବୁଧନୀ ସ୍କ୍ରାପ ଗୋଟାଳି ହୋଇଥିବା ବେଳେ ଘଟଣା ଦିନ ରାଇସ ମିଲ ପରିସର ପୋଡ଼ା କୁଣ୍ଡା ଭିତରେ କିଭଳି ପଡ଼ିଲେ ସେନେଇ ପୋଲିସ ତଦନ୍ତ ଆରମ୍ଭ କରିଛି। ଏପରିକି ରାଇସ ମିଲରେ ଥିବା ସୁରକ୍ଷା ଏବଂ ନିରାପତ୍ତା ବ୍ୟବସ୍ଥା ଦୁର୍ବଳ ଥିବାରୁ ବୁଧନି ରାଇସ ମିଲ ଭିତରକୁ ପଶି ଯିବାରେ ସକ୍ଷମ ହୋଇପାରିଲେ। ଏନେଇ ପୋଲିସ ପ୍ରାଥମିକ ତଦନ୍ତ କରି ରାଇସ ମିଲ ମାଲିକଙ୍କ ନାମରେ ଏକ ଏତଲା ଦାଏର କରି ଘଟଣାର ତଦନ୍ତ ଜାରି ରଖିଛି।
