ନୂଆଦିଲ୍ଲୀ,୪।୮: ଆସନ୍ତା ୫ ତାରିଖ ବୁଧବାରରେ ସ୍ପେସ୍ ଏକ୍ସ ରକେଟର ୩,୯୦୦ କି.ଗ୍ରା ଓଜନର ଏକ ଟୁକୁଡା ଚନ୍ଦ୍ରପୃଷ୍ଠରେ ବିସ୍ଫୋରଣ ହେବ। ୨୦୨୫ ଜାନୁଆରୀ ୧୫ରେ ସ୍ପେସ ଏକ୍ସ ପକ୍ଷରୁ ଏହି ଫାଲକାନ-୯ ରକେଟ ଛଡାଯାଇଥିଲା । କିନ୍ତୁ ସେଥିରୁ ଏକ ବିରାଟ ଖଣ୍ଡ ମହାକାଶରେ ରହିଯାଇଛି। ବର୍ତ୍ତମାନ ଏହି ରକେଟ ଖଣ୍ଡ ଚନ୍ଦ୍ର ଆଡକୁ ସେକେଣ୍ଡ ପ୍ରତି ୨.୩୪ କି. ଶବ୍ଦର ବେଗ ଠାରୁ ୭ ଗୁଣ ଅଧିକ ବେଗରେ ବଢ଼ିବାରେ ଲାଗିଛି। ଏହି ରକେଟ ଚନ୍ଦ୍ରରେ ଆସନ୍ତା ୫ ତାରିଖ ସକାଳ ୬ଟା ୩୫ରେ ମାଡ଼ ହେବାର ସମ୍ଭାବନା ରହିଛି।
ଏହି ମାଡ଼ ବା ବିସ୍ପୋରଣ ଫଳରେ ଚନ୍ଦ୍ରରେ ୩୦ ମିଟରର ଏକ ବିରାଟ ଗର୍ତ୍ତ ସୃଷ୍ଟି ହେବ। ଏଥିସହ ପ୍ରଚଣ୍ଡ ଧୂଳି ଓ ଆବର୍ଜନା ଉଠିବ। ଦୁର୍ଘଟଣାବଶତଃ ଚନ୍ଦ୍ରରେ ଧକ୍କା ହେବାର ଏହା ଦ୍ବିତୀୟ ରକେଟ ହେବ। ୨୦୨୨ରେ ଚୀନର ଏକ ରକେଟର ଟୁକୁଡା ଚନ୍ଦ୍ରରେ ବିସ୍ଫୋରଣ ହେବା ଫଳରେ ଦୁଇଟି ବିରାଟ ଗାତ ସୃଷ୍ଟି କରିଥିଲା।
ଅନ୍ତରୀକ୍ଷ ଟ୍ରାକିଂ ବିଶେଷଜ୍ଞ ବିଲ୍ ଗ୍ରେଙ୍କ ଅନୁମାନ ଯେ ସ୍ପେସ ଏକ୍ସ ରକେଟର ଟୁକୁଡା ଚନ୍ଦ୍ରର ପଶ୍ଚିମ ଭାଗରେ ଧକ୍କା ହେବ। ଚନ୍ଦ୍ରରେ ରକେଟ ବିସ୍ଫୋରଣ ହେବାର ଦୃଶ୍ୟ ଆମେରିକା, କାନାଡା ଓ ଦକ୍ଷିଣ ଆମେରିକାର ଅଧିକାଂଶ ଅଞ୍ଚଳରେ ଦେଖାଯିବ। ଧକ୍କା ଫଳରେ ୩ ଟନ ଟିଏନଟି ଭଳି ଶକ୍ତି ମଧ୍ୟ ଉତ୍ପନ ହେବ । ତେବେ କୁହାଯାଉଛି କି ପୂର୍ବ ଓ କେନ୍ଦ୍ରୀୟ ଆମେରିକାରେ ଏହି ଦୃଶ୍ୟ ଭଲ ଭାବେ ଦେଖାଯିବ। ଅନ୍ୟ ଅଞ୍ଚଳରେ ଖାଲି ଆଖିରେ ଦେଖିବା ସମ୍ଭବ ହେବନାହିଁ । ସୂଚନାଯୋଗ୍ୟ ଯେ ଫାଲକାନ-୯ ରକେଟ ଦୁଇଟି ବ୍ୟବସାୟିକ ଲୁନାର ଲ୍ୟାଣ୍ଡର (ଫାୟାରଫ୍ଲାଏ ଏରୋସ୍ପେସ୍ ବ୍ଲୁ ଘୋଷ୍ଟ-୧ ଓ ଜାପାନୀ ସ୍ପେ କମ୍ପାନିର ହାକୁଟୋ ଆର ରେଜିଲିଏନ୍ସ) ଚନ୍ଦ୍ରକୁ ନେଇଥିଲା।
