ନୂଆଦିଲ୍ଲୀ,୩।୩: ଆଜିର ଦିନକୁ କ୍ରିକେଟ ଇତିହାସର ସବୁଠାରୁ କଳା ଦିନ ବୋଲି ବିବେଚନା କରାଯାଏ। କାରଣ ୨୦୦୯ ମସିହା ମାର୍ଚ୍ଚ ୩ ତାରିଖରେ କିଛି ଏଭଳି ଘଟିଥିଲା ଯାହା ସାରା ବିଶ୍ୱକୁ ଚମକାଇଦେଇଥିଲା। ସେତେବେଳେ ଶ୍ରୀଲଙ୍କା କ୍ରିକେଟ ଟିମ୍ ପାକିସ୍ତାନ ଗସ୍ତରେ ଥିଲା। ଉକ୍ତ ଦିନ ଟିମ୍ ଲାହୋର ଯାଉଥିବା ସମୟରେ ଆତଙ୍କବାଦୀମାନେ ଆକ୍ରମଣ କରିଥିଲେ। ଏହା ବେଶ୍ ଭୟଙ୍କର ଥିଲା।
ଅତିଥି ଶ୍ରୀଲଙ୍କା ଟିମ୍ ଲାହୋର ଷ୍ଟାଡିୟମରେ ମ୍ୟାଚ୍ ଖେଳିବାକୁ ଯାଉଥିଲା। ଷ୍ଟାଡିୟମଠାରୁ କିଛି ଦୂରରେ ଆତଙ୍କବାଦୀମାନେ ଦୁଇଟି ଗାଡ଼ିରେ ଆସି ଅତର୍କିତ ଭାବେ ଗୁଳିବର୍ଷା କରିଥିଲେ। ଏହା ଦେଖି ସମସ୍ତ ଖେଳାଳି ସିଟ୍ ତଳେ ଲୁଚି ଯାଇଥିଲେ। ବସ୍ର କାଚ ଭାଙ୍ଗି ଖଣ୍ଡ ଖଣ୍ଡ ହୋଇ ପଡ଼ୁଥିବା ବେଳେ ଲୁହା ରେଲିଂରେ ଗୁଳି ବାଜୁଥିଲା। ଏହି ସମୟରେ ସୁରକ୍ଷାକର୍ମୀମାନେ ପାଲଟା ଆକ୍ରମଣ କରି ଷ୍ଟାଡିୟମ ଭିତରକୁ ଗାଡ଼ି ନେଇଯାଇଥିଲେ। ହେଲେ କିଛି ଖେଳାଳି ଏଥିରେ ଆହତ ହୋଇଥିଲେ। ଆକ୍ରମଣ ଏତେ ଭୟଙ୍କର ଥିଲା ଯେ କିଛି ବି ହୋଇପାରିଥାନ୍ତା। ଏଥିରେ ୨ ଆତଙ୍କବାଦୀ ନିହତ ହୋଇଥିବା ବେଳେ କିଛି ସୁରକ୍ଷାକର୍ମୀଙ୍କ ମୃତ୍ୟୁ ହୋଇଥିଲା। ଘଟଣା ପରେ ମ୍ୟାଚ୍କୁ ତୁରନ୍ତ ରଦ୍ଦ କରି ଦିଆଯାଇଥିଲା।
ରିପୋର୍ଟ ଅନୁଯାୟୀ, ଆକ୍ରମଣରେ ବସ୍ରେ ୩୫ଟି ଗୁଳିର ଚିହ୍ନ ରହିଥିଲା। ସେଥିରୁ ଗୋଟିଏ ମହିଲା ଜୟବର୍ଦ୍ଧନେଙ୍କ ଅତି ପାଖରୁ ଚାଲିଯାଇଥିଲା। ସେହିଭଳି କୁମାର ସାଙ୍ଗାକାରାଙ୍କ କାନ୍ଧରେ ହାଲ୍କା ଆଘାତ ଲାଗିଥିଲା। ହେଲେ ଥରଙ୍ଗା ପରନାବିଥାନାଙ୍କ ଛାତିରେ ଏବଂ ଥିଲନ ସମନବୀରାଙ୍କ ପାଦରେ ଗୁଳି ବାଜିଥିଲା। ଆକ୍ରମଣ ସେତେବେଳ ସମୟରେ ସାରା ବିଶ୍ୱକୁ ଦୋହଲାଇ ଦେଇଥିଲା। ଶ୍ରୀଲଙ୍କା ଟିମ୍ ଗସ୍ତ ବାତିଲ କରି ତୁରନ୍ତ ସ୍ବଦେଶ ଫେରିବାର ନିଷ୍ପତ୍ତି ନେଇଥିଲା। ମଇଦାନରେ ସେନା ହେଲିକପ୍ଟର ଓହ୍ଲାଇଥିଲା। ସେଠାରୁ ଖେଳାଳିମାନେ ଶ୍ରୀଲଙ୍କା ଫେରିଥିଲେ। ତେବେ ଏହି ଘଟଣା ପରେ ଦୁନିଆର ସମସ୍ତ ଟିମ୍ ଏତେ ଡରି ଯାଇଥିଲେ ଯେ ବର୍ଷ ବର୍ଷ ଧରି କେହି ବି ପାକିସ୍ତାନ ଗସ୍ତରେ ଆସି ନ ଥିଲେ। ହେଲେ ବିଗତ ୧-୨ ବର୍ଷ ମଧ୍ୟରେ କିଛି ଟିମ୍ ପାକିସ୍ତାନରେ ଖେଳିବାକୁ ଆସିଛନ୍ତି। ମାତ୍ର ଆଜି ବି ଶ୍ରୀଲଙ୍କାର କିଛି ଖେଳାଳି ଏଥିପାଇଁ ଅମଙ୍ଗ ହୋଇ ନାମ ପ୍ରତ୍ୟାହାର କରିନେଇଥାନ୍ତି।
