ବାରିପଦା,୧୭ା୪(ନୀଳାଦ୍ରି ବିହାରୀ ଦଣ୍ଡପାଟ):ବିବାଦୀୟ ମନ୍ତବ୍ୟ, ଅଶୋଭନୀୟ ଆଚରଣ ସମେତ କାର୍ଯ୍ୟଦକ୍ଷତାର ମାପକାଠିକୁ ଆଧାରକରି ଭାଜପା ଚଳିତ ନିର୍ବାଚନରେ କେତେଜଣ ଏମ୍ପି ଏବଂ କେନ୍ଦ୍ରମନ୍ତ୍ରୀଙ୍କୁ ପ୍ରାର୍ଥୀ ତାଲିକାରୁ ବାଦ୍ ଦେଇଛି। ଏଥିରେ ନୂଆ ସଂସଦ ଭବନରେ ବିକ୍ଷୋଭକାରୀ ପଶିବା ଘଟଣାରେ ବିବାଦୀୟ ହୋଇଥିବା ମହୀଶୂର ଏମ୍ପି ପ୍ରତାପ ସିମ୍ହାଙ୍କ ସମେତ ଭୋପାଳ ଏମ୍ପି ପ୍ରଜ୍ଞା ସିଂ ଠାକୁର, ଦିଲ୍ଲୀର ଏମ୍ପି ପ୍ରବେଶ ବର୍ମା, ପୂର୍ବତନ ସ୍ବାସ୍ଥ୍ୟମନ୍ତ୍ରୀ ଡା. ହର୍ଷବର୍ଦ୍ଧନ, ଏମ୍ପି ମୀନାକ୍ଷୀ ଲେଖୀଙ୍କୁ ଉଦାହରଣ ଭାବେ ନିଆଯାଉଛି। ଏହି ନ୍ୟାୟରେ ମୟୂରଭଞ୍ଜ ଏମ୍ପି ତଥା କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁଙ୍କୁ ମଧ୍ୟ ଦଳ ପ୍ରାର୍ଥୀ କରି ନ ଥିବା ଚର୍ଚ୍ଚା ହେଉଛି। ସରକାରୀ ଅଧିକାରୀଙ୍କୁ ମାଡ଼ ଏବଂ କୁଡୁମୀ ସମ୍ପ୍ରଦାୟ ବିରୋଧୀ ମନ୍ତବ୍ୟ ପାଇଁ ଟୁଡୁ ବିବାଦୀୟ ହୋଇପଡ଼ିଥିଲେ।
କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁଙ୍କୁ ଲୋକ ସଭା ପ୍ରାର୍ଥୀ ତାଲିକାରୁ ଭାଜପା ବାଦ୍ ଦେବା ପରେ ଜିଲାର କୌଣସି ବିଧାନସଭା ଆସନରେ ପ୍ରାର୍ଥୀ କରାଯାଇପାରେ ବୋଲି ଆଲୋଚନା ହେଉଥିଲା। କିନ୍ତୁ ମଙ୍ଗଳବାର ମୟୂରଭଞ୍ଜ ଜିଲାର ବାକି ୪ଟି ଆସନ ସାରସକଣା, ରାଇରଙ୍ଗପୁର, ବାଙ୍ଗିରିପୋଷି ଓ କରଞ୍ଜିଆ ପାଇଁ ଦଳ ପ୍ରାର୍ଥୀ ଘୋଷଣା କରିଥିଲେ ମଧ୍ୟ ଟୁଡୁଙ୍କୁ ସ୍ଥାନ ମିଳିନାହିଁ। ଗତ ୫ବର୍ଷର କାର୍ଯ୍ୟକଳାପରେ ବିଶ୍ୱେଶ୍ୱରଙ୍କ ଉପରେ ଦଳ ଅସନ୍ତୁଷ୍ଟ ଥିବା କୁହାଯାଉଛି। ଆଲୋଚନା ହେଉଛି ଯେ, ସଂଘ ପରିବାର (ଆରଏସ୍ଏସ୍) ସହ ସମ୍ପୃକ୍ତ ବିଶ୍ୱେଶ୍ୱରଙ୍କ ବାର୍ତ୍ତାଳାପକୁ ନେଇ ଜିଲାବାସୀଙ୍କ ସମେତ ଦଳୀୟ କାର୍ଯ୍ୟକର୍ତ୍ତା ଖପ୍ପା ହୋଇ ପଡ଼ିଥିଲେ। ଦଳୀୟ କର୍ମୀ ଓ କର୍ମକର୍ତ୍ତାଙ୍କୁ ଅଣଦେଖା, କୁଡୁମୀ ସମ୍ପ୍ରଦାୟ ବିରୋଧୀ ମନ୍ତବ୍ୟ, ସରକାରୀ ଅଧିକାରୀଙ୍କୁ ମାଡ଼ ମାରିବା ଓ କର୍ମଚାରୀଙ୍କୁ ଗାଳିଗୁଲଜ କରିବା ଭଳି ଆଚରଣ ଯୋଗୁ ସେ ବିଭିନ୍ନ ସମୟରେ ଅଡ଼ୁଆରେ ପଡ଼ିଥିଲା। ଲୋକେ ସମସ୍ୟା ନେଇ ତାଙ୍କ ପାଖକୁ ଅଭିଯୋଗ କରିବାକୁ ଯିବା ସମୟରେ ସେ କଟୁ କଥା କହୁଥିବା ମଧ୍ୟ ଅଭିଯୋଗ ହୋଇଥିଲା। ଏହିସବୁ ଘଟଣା ଦଳର ଶୀର୍ଷ ନେତୃବୃନ୍ଦଙ୍କ ନିକଟରେ ପହଞ୍ଚତ୍ବା ପରେ ତାଙ୍କୁ ଟିକେଟରୁ ବଞ୍ଚତ୍ତ କରାଯାଇଥିବା ନେଇ ଆଲୋଚନା ଜୋର ଧରିଛି। ତେବେ ବିଶ୍ୱେଶ୍ୱର ଦଳରେ ରହି କାର୍ଯ୍ୟ କରିବେ ନା ଦଳ ପରିବର୍ତ୍ତନ କରିବେ ସେନେଇ ମୁହଁ ଖୋଲିନାହାନ୍ତି। ତାଙ୍କ ପ୍ରତିକ୍ରିୟା ଜାଣିବା ପାଇଁ ଚେଷ୍ଟା କରାଯାଇଥିଲେ ମଧ୍ୟ ଯୋଗାଯୋଗ ସମ୍ଭବ ହୋଇପାରିନାହିଁ।
ମୟୂରଭଞ୍ଜ ଲୋକ ସଭା ଆସନ ସମେତ ଏହି ଜିଲାର ୯ଟି ବିଧାନସଭା ନିର୍ବାଚନମଣ୍ଡଳୀ ସକାଶେ ଭାଜପା ପ୍ରାର୍ଥୀ ଘୋଷଣା ଶେଷ ହୋଇଛି। କେନ୍ଦ୍ରମନ୍ତ୍ରୀ ଟୁଡୁଙ୍କ ଭଳି ସାରସକଣା ବିଧାୟକ ଡା. ବୁଢ଼ାନ ମୁର୍ମୁ ମଧ୍ୟ ଭାଜପା ପ୍ରାର୍ଥୀ ତାଲିକାରୁ ବାଦ୍ ପଡ଼ିଛନ୍ତି। ତେବେ ଭାଜପା ଟିକେଟରୁ ବଞ୍ଚତ୍ତ ଆଶାୟୀମାନେ ଦଳ ପରିବର୍ତ୍ତନ କରିବାକୁ ମସୁଧା ଚଳାଇଥିବା ବେଳେ ବିଜେଡି ଘୋଷଣା କରି ନ ଥିବା ଜିଲାର ୩ ବିଧାନସଭା ଆସନ କରଞ୍ଜିଆ, ସାରସକଣା ଓ ବାଙ୍ଗିରିପୋଷି ଉପରେ ସମସ୍ତଙ୍କ ନଜର ରହିଛି।
ମେ ୨୫ରେ ଜିଲାର କରଞ୍ଜିଆ ବିଧାନସଭା କ୍ଷେତ୍ର ଓ ଜୁନ୍ ୧ରେ ଅବଶିଷ୍ଟ ୮ ବିଧାନସଭା ଆସନ ସମେତ ଏମ୍ପି ପ୍ରାର୍ଥୀଙ୍କ ଭାଗ୍ୟ ପରୀକ୍ଷା ହେବ। ମଙ୍ଗଳବାର ଭାଜପା ପକ୍ଷରୁ ପ୍ରକାଶିତ ତାଲିକାରେ ୨ ନୂଆ ଚେହେରାଙ୍କୁୁ ଗୁରୁତ୍ୱ ଦିଆଯାଇଛି। ରାଇରଙ୍ଗପୁର ବିଧାନସଭା ଆସନରୁ ଜୋଲେନ ବରଦା, କରଞ୍ଜିଆ ବିଧାନସଭା କ୍ଷେତ୍ରରୁ ପଦ୍ମଚରଣ ହାଇବୁରୁ, ବାଙ୍ଗରିପୋଷିରୁ ସଞ୍ଜଳି ମୁର୍ମୁଙ୍କୁ ପ୍ରାର୍ଥୀ ଘୋଷଣା କରାଯାଇଛି। ବିଜେଡି ଛାଡ଼ି ଭାଜପାରେ ଯୋଗଦେଇଥିବା ପୂର୍ବତନ ବିଧାୟକ ଭାଦବଙ୍କୁ ଦଳ ସାରସକଣା ଆସନ ପ୍ରାର୍ଥୀ ଚୟନ କରିଛି। ୨୦୦୪ରେ ଭାଦବ ଜେଏମ୍ଏମ୍ରୁ ଜିଲା ପରିଷଦ ସଭାପତି ହୋଇ ରାଜନୀତିରେ ଚର୍ଚ୍ଚିତ ଚେହେରା ଭାବେ ପରିଗଣିତ ହୋଇଥିଲେ। ୨୦୦୯ ବିଧାନସଭା ନିର୍ବାଚନ ହାରିବା ପରେ ୨୦୧୪ରେ ବିଜେଡିରେ ମିଶି ସାରସକଣା ଆସନରୁ ବିଧାୟକ ହୋଇଥିଲେ। ତେବେ ଦଳରେ ତାଙ୍କୁ ଅଣଦେଖା କରାଯିବାରୁ ସେ ବିଜେଡି ଛାଡ଼ି ଭାଜପାରେ ସାମିଲ ହୋଇଥିଲେ। ୨୦୧୯ରେ ସାରସକଣାରୁ ଭାଜପା ଟିକେଟରେ ବିଧାୟକ ହୋଇଥିବା ବୁଢ଼ାନଙ୍କ କାର୍ଯ୍ୟଶୈଳୀ ଓ ଲୋକପ୍ରିୟତା କମିଥିବାରୁ ଏହି ଆସନରେ ପ୍ରାର୍ଥୀ ବଦଳ କରାଯାଇଥିବା କୁହାଯାଉଛି। ସେହିପରି ବାଙ୍ଗିରିପୋଷି ବିଧାନସଭା ଆସନରୁ ପ୍ରାର୍ଥୀ ହୋଇଥିବା ସଞ୍ଜଳିଙ୍କ ବାପା ଶୁକଦା ମୁର୍ମୁ ପୂର୍ବରୁ ନିର୍ବାଚନ ଲଢ଼ି ପରାଜିତ ହୋଇଥିଲେ। ଏଥର ତାଙ୍କ ଝିଅଙ୍କୁ ଭାଜପା ଟିକେଟ ଦେଇଛି। ସେହିପରି କରଞ୍ଜିଆ ଆସନରେ ପରାଜିତ ପ୍ରାର୍ଥୀ ପଦ୍ମଚରଣ ହାଇବୁରୁଙ୍କୁ ପୁନର୍ବାର ପ୍ରାର୍ଥୀ କରାଯାଇଛି। ନୂତନ ଚେହେରା ଭାବେ ରାଇରଙ୍ଗପୁର ନିର୍ବାଚନମଣ୍ଡଳୀରୁ ଜୋଲେନଙ୍କୁ ପ୍ରାର୍ଥୀ କରାଯାଇଥିବା ବେଳେ ଏଠାକାର ବିଧାୟକ ନବଚରଣ ମାଝିଙ୍କୁ ମୟୂରଭଞ୍ଜ ଲୋକ ସଭା ପ୍ରାର୍ଥୀ କରାଯାଇଛି।
