ପ୍ରୟାଗରାଜ,୨୨ ।୪: ଡେରାଡୁନ ଉତ୍ତରାଖଣ୍ଡରୁ ଏକ ବିବାହ କାର୍ଯ୍ୟକ୍ରମରେ ଯୋଗଦେଇ କାର ଯୋଗେ ଫେରୁଥିବା ନୈନି ନିବାସି ଭାରତୀୟ ଜନତା ପାର୍ଟି(ଭାଜପା) ନେତା ଆଦିତ୍ୟ ନାରାୟଣ ମିଶ୍ରଙ୍କର ଏକ ସଡ଼କ ଦୁର୍ଘଟଣାରେ ମୃତ୍ୟୁ ହୋଇଥିବା ଜଣାପଡିଛି । ଏହି ଦୁର୍ଘଟଣାରେ ନୈନିର ଗଙ୍ଗା ପୁରନ ନିବାସୀ ଅଶୋକ ଓରଫ ଚୁଚ୍ଚୁ ପାଣ୍ଡେୟଙ୍କର ବି ମୃତ୍ୟୁ ହୋଇଛି । ଏଥିରେ ଆଦିତ୍ୟଙ୍କ ପୁଅ ହର୍ଷିତ, ଅଶୋକଙ୍କ ପୁଅ ସଚ୍ଚିନ ଓ ଗନର ପୁନିତ ତିୱାରୀ ଗୁରୁତର ରହିଛନ୍ତି । ସୂଚନାଯୋଗ୍ୟ, ଏମାନେ ୧୮ ତାରିଖରେ ଏକ ବିବାହ କାର୍ଯ୍ୟରେ ଯୋଗଦେଇ ପରେ ହରିଦ୍ୱାର ଯାଇଥିଲେ । ସେଠାରୁ ସେମାନେ ଫେରିବା ସମୟରେ ବରେଲିର ଗୌଧି ପୁରା ଥାନା ଅଞ୍ଚଳରେ ସେମାନଙ୍କ ଗାଡିଟି ନିୟନ୍ତ୍ରଣ ହରାଇ ଡିଭାଇଡରରେ ପିଟି ହୋଇ ଯାଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା କି ଆଦିତ୍ୟଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଯାଇଥିଲା । ଅନ୍ୟମାନଙ୍କୁ ଗୁରୁତର ଆହତ ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଥିଲା । ହସ୍ପିଟାଲରେ ଗୁରୁବାର ଅଶୋକଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଆହତଙ୍କ ଚିକିତ୍ସା ଚାଲିଛି ।
ସୂଚନାଯୋଗ୍ୟ, ଦେଶ ବିଦେଶରେ ପରିଚିତ ମହନ୍ତ ନରନ୍ଦ୍ର ଗିରି ଆତ୍ମହତ୍ୟା ମାମଲାରେ ମିଳିଥିବା ସୁଇସାଇଡ ନୋଟରେ ଆଦିତ୍ୟ ନାରାୟଣ ମିଶ୍ରଙ୍କର ନାଁ ଥିଲା । ମହନ୍ତ ତାଙ୍କ ସୁଇସାଇଡ ନୋଟରେ ଆଦିତ୍ୟଙ୍କ ସହ ୨୫ ଲକ୍ଷ ଟଙ୍କା କାରବାର କରିଥିବା କଥା ଲେଖିଥିଲେ । ଏହାକୁ ନେଇ ସିବିଆଇ ଟିମ ତାଙ୍କୁ ପଚରାଉଚରା କରିଥିଲା । ହେଲେ କୌଣସି ପ୍ରମାଣ ନ ମିଳିବାରୁ ଆଦିତ୍ୟଙ୍କୁ ଛାଡି ଦିଆଯାଇଥିଲା ।
