କଟକ ଅଫିସ,୯।୩: ସିଲିଭର ସିଟି କଟକରେ ମେୟର ପଦ ପାଇଁ ବିଜେଡି, କଂଗ୍ରେସ ଓ ବିଜେପି ପ୍ରାର୍ଥୀଙ୍କ ମଧ୍ୟରେ କଡା ଟକ୍କର ଦେଖିବାକୁ ମିଳିପାରେ ବୋଲି ଆକଳନ କରାଯାଉଛି। ଏହାପୂର୍ବରୁ ମେୟର ପ୍ରାର୍ଥୀମାନଙ୍କ ସମ୍ପତ୍ତି ତାଲିକା ପ୍ରକାଶ ପାଇଛି। ଶାସକ ବିଜୁ ଜନତା ଦଳ(ବିଜେଡି) ପକ୍ଷରୁ ମଇଦାନକୁ ଓହ୍ଲାଇଥିବା କଟକର ଶ୍ରମିକ ନେତା ତଥା ରାଜ୍ୟ ସଭା ଏମ୍ପି ସୁବାସ ସିଂ ସବୁଠାରୁ ଧନୀ ବୋଲି ଜଣାପଡ଼ିଛି । ସମ୍ପତ୍ତି ତାଲିକାରେ କଂଗ୍ରେସର ଗିରିବାଳା ବେହେରା ଓ ଭାଜପାର ଶ୍ରୀତମ ଦାସଙ୍କୁ ସେ ପଛରେ ପକାଇ ଦେଇଛନ୍ତି।
ନାମାଙ୍କନ ଦାଖଲ ବେଳେ କରିଥିବା ସତ୍ୟପାଠ ଅନୁସାରେ ସୁବାସ ସିଂଙ୍କ ସମ୍ପତ୍ତି ପରିମାଣ ୫ କୋଟିରୁ ଅଧିକ । ସୁବାସଙ୍କ ନାମରେ ୭୬ ଲକ୍ଷ, ୭୬ ହଜାର ୬୮୯ ଟଙ୍କାର ବ୍ୟାଙ୍କ ଡିପୋଜିଟ୍, ବୀମା ଓ ନିବେଶ ଆଦି ରହିଛି । ସେହିଭଳି ତାଙ୍କ ସ୍ତ୍ରୀଙ୍କ ନାମରେ ୪ କୋଟି ୫୮ ଲକ୍ଷ ୫୪ ହଜାର ୫୯୯ ଟଙ୍କାର ବ୍ୟାଙ୍କ ଡିପୋଜିଟ, ବୀମା ଓ ନିବେଶ ରହିଛି । ସୁବାସଙ୍କ ପାଖରେ ଥିବା ଜମିର ମୂଲ୍ୟ ୭୭ ଲକ୍ଷ, ୧୯ ହଜାର ୯୬ ଟଙ୍କା ବୋଲି ଦର୍ଶାଯାଇଛି । ତାଙ୍କ ନାମରେ ପ୍ରାୟ ୬ ଲକ୍ଷ ଟଙ୍କାର ବ୍ୟାଙ୍କ ଲୋନ ରହିଛି ।
ସେହିଭଳି କଂଗ୍ରେସର ମେୟର ପ୍ରାର୍ଥୀ ଗିରିବାଳା ବେହେରାଙ୍କ ନିକଟରେ ୨୦ ଲକ୍ଷ ୫୦ ହଜାର ଟଙ୍କା, ବୀମା ଓ ନିବେଶ ରହିଛି । ତାଙ୍କ ନିକଟରେ ୭୫ ଲକ୍ଷ ଟଙ୍କା ମୂଲ୍ୟର ଜମି ରହିଛି । ତାଙ୍କ ସ୍ବାମୀଙ୍କର ମଧ୍ୟ ୯୫ ଲକ୍ଷ ଟଙ୍କା ମୂଲ୍ୟର ଜମି ରହିଛି।
ଅପରପକ୍ଷେ ଭାଜପା ଟିକେଟରୁ ନିର୍ବାଚନ ମଇଦାନକୁ ଓହ୍ଲାଇଥିବା ଶ୍ରୀତମଙ୍କର ୩୩ ଲକ୍ଷ ୬୬ ହଜାର ଓ ତାଙ୍କ ପତ୍ନୀଙ୍କ ନାମରେ ୧୩ ଲକ୍ଷ ୬୮ ହଜାର ଟଙ୍କା, ନିବେଶ ଓ ବୀମା ଆଦି ରହିଛି । ଶ୍ରୀତମଙ୍କ ନିକଟରେ ୪୧ ଲକ୍ଷ ୯୦ ହଜାର ଟଙ୍କାର ଘରବା଼ଡ଼ି ଓ ତାଙ୍କ ପତ୍ନୀଙ୍କ ନାଁରେ ୪ ଲକ୍ଷ ୮୫ ହଜାର ଟଙ୍କାର ଘରବାଡ଼ି ରହିଛି । ଶ୍ରୀତମ ୪୪ ଲକ୍ଷ ୫୦ ହଜାର ଟଙ୍କାର ବ୍ୟାଙ୍କ ଲୋନ ରହିଥିବା ସେ ସତ୍ୟପାଠରେ ଦର୍ଶାଇଛନ୍ତି ।
