ପାଟଣା,୧୨ା୩(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକରେ ସୁକାନ୍ତି ନାଏକ ଓ ସାହାରପଡ଼ା ବ୍ଲକରେ ରୀନା ନାଏକ ବ୍ଲକ ଅଧ୍ୟକ୍ଷା ଭାବେ ନିର୍ବାଚିତ ହୋଇଛନ୍ତି। ଶନିବାର କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ବ୍ଲକ ଅଧ୍ୟକ୍ଷା ପଦବୀ ନିର୍ବାଚନ ଆରମ୍ଭ ହୋଇଥିଲା। ଉଭୟ ବ୍ଲକ ଅଧ୍ୟକ୍ଷା ପଦବୀ ଆଦିବାସୀ ମହିଳାମାନଙ୍କ ପାଇଁ ସଂରକ୍ଷିତ ରହିଛି । ପାଟଣା ବ୍ଲକ ବାଉଁଶୁଳି ପଞ୍ଚାୟତର ସମିତିସଭ୍ୟା ସୁକାନ୍ତି ନାଏକ ବ୍ଲକ ଅଧ୍ୟକ୍ଷା ଭାବେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଥିବା ନିର୍ବାଚନ ଅଧିକାରୀ ପ୍ରତିଭା ପୃଷ୍ଟି ଘୋଷଣା କରିଛନ୍ତି। ଅନୁରୂପ ଭାବେ ସାହାରପଡ଼ା ବ୍ଲକରେ ବଡ଼ବିଲ ସମିତିସଭ୍ୟା ରୀନା ନାଏକ ବ୍ଲକ ଅଧ୍ୟକ୍ଷ ଭାବେ ବିଜୟୀ ଘୋଷିତ ହୋଇଥିବା ନିର୍ବାଚନ ଅଧିକାରୀ ବାବୁଲ ପେରେଇ ଘୋଷଣା କରିଛନ୍ତି। ସୁକାନ୍ତିଙ୍କ ବିଜୟ ପରେ ପାଟଣା ବ୍ଲକ ପରିସରରେ ପାଟଣା ବିଧାୟକ ଜଗନ୍ନାଥ ନାଏକ, ପୂର୍ବତନ ବ୍ଲକ ଅଧ୍ୟକ୍ଷ ବିଶ୍ୱନାଥ ନାୟକ, ଜିଲା ବିଜେଡି ସାଧାରଣ ସମ୍ପାଦକ ପ୍ରଶାନ୍ତ ଭଞ୍ଜ, ବରିଷ୍ଠ ନେତା ଦେବା ନନ୍ଦ ପୃଷ୍ଟି, ବୁଲୁ ଭଞ୍ଜ, ନବ ନିର୍ବାଚିତ ୧୯ ସମିତିସଭ୍ୟଙ୍କ ଶହ ଶତାଧିକ ବିଜେଡି କର୍ମୀ ଓ ନେତା ବିଜୟ ଉତ୍ସବ ପାଳିଥିଲେ।
ସୂଚନାନୁଯାୟୀ ପାଟଣା ବ୍ଲକରେ ୨୦ ସମିତି ସଭ୍ୟଙ୍କ ମଧ୍ୟରୁ ୨୦ ସମିତିସଭ୍ୟ ଭୋଟ କେନ୍ଦ୍ରକୁ ପ୍ରବେଶ କରିଥିବା ବେଳେ ସାହାରପଡ଼ା ବ୍ଲକର ୨୦ ସମିତିସଭ୍ୟଙ୍କ ମଧ୍ୟରୁ ୧୪ଜଣ ସମିତିସଭ୍ୟ ନିର୍ବାଚନ ପ୍ରକ୍ରିୟାରେ ଅଂଶଗ୍ରହଣ କରିଥିଲେ।
