ଭୁବନେଶ୍ୱର,୧୧ା୩(ଜିତେନ୍ଦ୍ର କୁମାର ନାୟକ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ୫-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ସ୍ବଳ୍ପ ସମୟର ଭିଡିଓ ଯେଉଁଭଳି ଭାବେ ହୋଇଥିଲା, ତାହା ରାଜ୍ୟର ରାଜନୈତିକ ଉଷ୍ମତା ସମ୍ପର୍କରେ ଅନେକ ସୂଚନା ଦେଉଛି। ଭିଡିଓରେ ଯେପରି ଭାବେ ପାଣ୍ଡିଆନ ପ୍ରଶ୍ନ କରିଛନ୍ତି ଏବଂ ନବୀନ ତାଙ୍କୁ ଉତ୍ତର ଦେଇଛନ୍ତି, ସେଥିରେ ଅନେକ ଭାବିଲେ ଯେ ରାଜନୀତିରେ ଗୁଜବ ଏବଂ ମିଥ୍ୟା ସବୁଠାରୁ ଗର୍ହିତ। ଏଥିରେ ଯାହା କୁହାଯାଇଛି, ତାହା ନିଶ୍ଚିତ ଭାବେ ସତ୍ୟ ହୋଇଥିବାବେଳେ ସାମ୍ପ୍ରତିକ ରାଜ୍ୟ ରାଜନୈତିକ ପରିସ୍ଥିତି ସହିତ ଖାପ ଖାଉଛି। ରାଜନୈତିକ ମହଲରେ ଏହାକୁ ଅନେକ ରଙ୍ଗ ଦିଆଯାଇଛି। ତନ୍ମଧ୍ୟରୁ ଅଧିକଙ୍କ ମତ ହେଉଛି ଯେ, ବିଜେଡି ସୁପ୍ରିମୋ ସିଧାସଳଖ କହିବା ପରିବର୍ତ୍ତେ ଇଙ୍ଗିତ କରିଛନ୍ତି ଯେ, ବିଜୁ ଜନତା ଦଳ ସହିତ ଭାରତୀୟ ଜନତା ପାର୍ଟିର ମେଣ୍ଟ ସମ୍ପର୍କିତ ଆଲୋଚନା ଗୁଜବ ଏବଂ ମିଥ୍ୟା। ଅନ୍ୟପଟେ ସମସ୍ତେ ଜାଣନ୍ତି ଯେ, ନିର୍ବାଚନ ପୂର୍ବରୁ, ବିଶେଷକରି ୨୦୨୪ ନିର୍ବାଚନ ଯେଉଁଭଳି ଭାବେ ଉଭୟ ମୋଦି ଏବଂ ନବୀନଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ; ସେଥିନେଇ କୌଣସି ଦଳ ଅତିଶୀଘ୍ର ନିଜର ତାସପାଲି ଜନତାଙ୍କ ସମ୍ମୁଖରେ ରଖିବାକୁ ଚାହାନ୍ତି ନାହିଁ। ଓଡ଼ିଶାର ଭୋଟର ଏବେ ସମ୍ପୂର୍ଣ୍ଣ ଭାବେ ଦ୍ୱନ୍ଦ୍ୱରେ ପଡ଼ିଛନ୍ତି। ଅଧିକ ଭୋଟରଙ୍କ ମୁହଁରୁ ମେଣ୍ଟ ବିରୋଧୀ ମନ୍ତବ୍ୟ ଶୁଣିବାକୁ ମିଳୁଛି। ଅନ୍ୟପଟେ ବିରୋଧୀ କଂଗ୍ରେସ ତା’ର ପ୍ରଚାର ଆରମ୍ଭ କରି ପୋଷ୍ଟରରେ ‘କଂଗ୍ରେସ ଆସୁଛି’ ବୋଲି ଲେଖିଥିବାବେଳେ ଆମ୍ ଆଦ୍ମୀ ପାର୍ଟି (ଆପ୍)ର ଦାୟିତ୍ୱରେ ଥିବା ନେତାମାନେ ଯୋଜନା କରୁଛନ୍ତି ଯେ, ମେଣ୍ଟ ପରେ ଯେଉଁ ବିଦ୍ରୋହୀ ପ୍ରାର୍ଥୀମାନେ ପ୍ରାୟ ସବୁ ନିର୍ବାଚନମଣ୍ଡଳୀରେ ଛିଡ଼ା ହେବେ, ସେମାନଙ୍କୁ ଆପ୍ ଟିକେଟ୍ ଯଚାଯାଇପାରିବ।
