ବ୍ରଜରାଜନଗର,୮ା୪ (ଡି.ଏନ.ଏ.): ଝାରସୁଗୁଡାର ଏକ ହୋଟେଲରେ ଶୁକ୍ରବାର ଦଳୀୟ କର୍ମକର୍ତ୍ତାଙ୍କୁ ନେଇ ବିଜେଡି ପକ୍ଷରୁ ଏକ ରୁଦ୍ଧଦ୍ୱାର ବୈଠକ ଅନୁଷ୍ଠିତ ହୋଇଥିଲା। ଏଥିରେ ଦଳର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ଜିଲା ପର୍ଯ୍ୟବେକ୍ଷକ ସାରଦା ନାୟକ, ପୂର୍ବତନ ମନ୍ତ୍ରୀ ପ୍ରସନ୍ନ ଆଚାର୍ଯ୍ୟ, ଉପସଭାପତି ଦେବୀପ୍ରସାଦ ମିଶ୍ର, ଝାରସୁଗୁଡା ଉପନିର୍ବାଚନ ଲାଗି ପ୍ରାର୍ଥୀ ହୋଇଥିବା ଦୀପାଳି ଦାସ ପ୍ରମୁଖ ଯୋଗଦେଇ ଦଳର ସ୍ଥିତି ସମ୍ପର୍କରେ ସମୀକ୍ଷା କରିଥିଲେ। ଜିଲାର ଲଇକେରା, କୋଲାବିରା, କିର୍ମିରା ଓ ଝାରସୁଗୁଡା ବ୍ଲକର ଅଧ୍ୟକ୍ଷ, ଉପାଧ୍ୟକ୍ଷ, ୱାର୍ଡମେମ୍ବର, ବ୍ରଜରାଜନଗର, ବେଲପାହାଡ଼ ଅଞ୍ଚଳର ଅଧ୍ୟକ୍ଷଙ୍କୁ ଡକାଯାଇ ସେମାନଙ୍କ ମତାମତ ନିଆଯାଇଥିଲା। ବିଶେଷକରି ସ୍ବର୍ଗତ ନବ ଦାସ ଓ କିଶୋର ମହାନ୍ତିଙ୍କ ଯେଉଁ ଗୋଷ୍ଠୀ ସବୁ ରହିଛି ସମସ୍ତଙ୍କୁ ଗୋଟିଏ ଛାତ ତଳେ ବସାଇ ଦଳ ପାଇଁ କାର୍ଯ୍ୟ କରିବା ଉପରେ ଦଳୀୟ ପଦାଧିକାରୀ ଗୁରୁତ୍ୱ ଦେଇଥିଲେ। ନାମାଙ୍କନପତ୍ର ଦାଖଲ ପୂର୍ବରୁ ପ୍ରତ୍ୟେକ ପଞ୍ଚାୟତରେ ସଭା କରି କର୍ମୀମାନଙ୍କୁ ଏକତ୍ରିତ କରାଇବା ପାଇଁ ନିର୍ବାଚିତ ପ୍ରତିନିଧିଙ୍କୁ ପରାମର୍ଶ ଦେଇଥିଲେ।
