ହୁମା, ୫।୯(ବିଦ୍ୟାଧର ସାହୁ): ଗଞ୍ଜାମ ବ୍ଲକ ଅନ୍ତର୍ଗତ ହୁମା ଅଞ୍ଚଳରେ ବାଇକ୍ ଚୋରିର ଆତଙ୍କ ଖେଳିଯାଇଛି। କିଛି ଦିନର ବ୍ୟବଧାନ ପରେ ପୁଣି ଥରେ ସକ୍ରିୟ ହୋଇଉଠିଛନ୍ତି ଚୋର। ଗୋଟିଏ ରାତିରେ ହୁମା ବଜାରରୁ ୩ଟି ବାଇକ୍ ଚୋରି ହୋଇଥିବା ଅଭିଯୋଗ ହୋଇଛି, ଯାହା ସ୍ଥାନୀୟ ଅଞ୍ଚଳବାସୀଙ୍କୁ ଚିନ୍ତାରେ ପକାଇଦେଇଛି। ପୋଲିସକୁ ଖାତିର ନକରି ଚୋରମାନେ ଖୁଲମ୍ଖୁଲା ଚୋରି କରୁଥିବା ନେଇ ଅସନ୍ତୋଷ ପ୍ରକାଶ ପାଇଛି।
ସୂଚନାଯୋଗ୍ୟ, ହୁମା ୧୬ ନମ୍ବର ଜାତୀୟ ରାଜପଥ କଡ଼ରେ ଥିବା ହୁମା ବଜାରରୁ ଗୋଟିଏ ପରେ ଗୋଟିଏ ବାଇକ୍ ଗାଏବ ହେବାରେ ଲାଗିଛି। ପୂର୍ବରୁ ଏଠାରୁ ସୁନା ଚୋରି ହୋଇଥିବା ବେଳେ ଏବେ ବାଇକ୍ ଚୋରି ବଢ଼ିବାରେ ଲାଗିଛି। କିଛି ଦିନ ପୂର୍ବରୁ ଆସ୍କା ରୋଡ ବଜାରରୁ ଦିନ ଦିପହରେ ଗୋଟିଏ ନୀଳ ରଙ୍ଗର ଗ୍ଲାମର ଚୋରି ହୋଇଥିଲା, ଯାହାର ଏପର୍ଯ୍ୟନ୍ତ କୌଣସି ପତ୍ତା ମିଳିନାହିଁ। ପୁଣି ଶୁକ୍ରବାର ରାତିରେ ଗୋଟିଏ ନୀଳ ରଙ୍ଗର ପଲସର ଟି ଟେଣ୍ଟୀ ବାଇକ୍ ଚୋରି ହୋଇଥିବା ଅଭିଯୋଗ ହୋଇଛି। ଏହାପରେ ଶନିବାର ଭୋର ୫ଟା ବେଳେ ହୁମା ୧୬ ନମ୍ବର ଜାତୀୟ ରାଜପଥ କଡ଼ରେ ଥିବା ଭିକି କିଚେନ୍ ରୁ ଆର ୱାନ ୫ (OD 07 AS 8004) ବାଇକ୍ ଚୋରି ହୋଇଛି। ବିଶେଷ କଥା ହେଉଛି, ଚୋରି ହୋଇଥିବା ସ୍ଥାନରେ ସିସିଟିଭି କ୍ୟାମେରା ଥିଲେ ମଧ୍ୟ ଚୋରମାନେ ସେଥିକୁ ଖାତିର ନକରି ବାଇକ୍ ଚୋରି କରିବାରେ ସଫଳ ହୋଇଛନ୍ତି।
ଏହି ବାଇକ୍ ଚୋରି ଘଟଣା ଏବେ ହୁମା ବଜାରରେ ଆତଙ୍କ ସୃଷ୍ଟି କରିଛି। ଅଞ୍ଚଳବାସୀ ଏବେ ବାଇକ୍ ବାହାରେ ରଖିବାକୁ ଭୟ କରୁଛନ୍ତି। ବାଇକ୍ ଚୋରଙ୍କୁ ତୁରନ୍ତ ଧରିବା ପାଇଁ ଏବଂ ଅଞ୍ଚଳରେ ଚୋରି ରୋକିବା ପାଇଁ ପୋଲିସ ପକ୍ଷରୁ ଦୃଢ଼ ପଦକ୍ଷେପ ନେବାକୁ ଦାବି ହୋଇଛି।
