ମୁମ୍ବାଇ: ଯାହା ଅନୁମାନ କରାଯାଉଥିଲା ତାହା ହିଁ ହେଲା। କଲର୍ସ ଟେଲିଭିଜନ୍ରେ ପ୍ରସାରିତ ବିଗ୍ବସ୍ ସିଜନ୍ ୧୪ରେ ବାଜି ମାରିଛନ୍ତି ଲୋକପ୍ରିୟ ଟିଭି ଆକ୍ଟ୍ରେସ୍ ରୁବିନା ଦିଲୈକ୍। ‘ଅବ୍ ସିନ୍ ପଲ୍ଟେଗା’ ନାମରେ ପରିଚିତ ଏହି ରିୟଲିଟି ଟିଭି ସିରିଜ୍ରେ ସମସ୍ତ ପ୍ରତିଯୋଗୀଙ୍କୁ ପଛରେ ପକାଇଦେଇଛନ୍ତି ହିମାଚଳ ପ୍ରଦେଶର ୩୩ ବର୍ଷୀୟା ରୁବିନା। ଇଣ୍ଡିଆ ଡଟ୍ କମ୍ ପୋଲ ଅନୁସାରେ ରୁବିନାଙ୍କୁ ସର୍ବାଧିକ ଭୋଟ ମିଳିଛି। ସେ ୭୨.୨% ଭୋଟ ପାଇଥିବାବେଳେ ଫାଷ୍ଟ ରନର ରାହୁଲ ବୈଦ୍ୟଙ୍କୁ ଦର୍ଶକେ ୧୪.୯% ଭୋଟ ଦେଇଛନ୍ତି। ସେହିପରି ସେକେଣ୍ଡ ରନର ଏଲି ଗୋନିଙ୍କୁ ୩.୨% ଭୋଟ ମିଳିଥିବା ଜଣାପଡ଼ିଛି। ରୁବିନା ବିଜୟୀ ହେବା ପରେ ତାଙ୍କ ନିକଟକୁ ଅଭିନନ୍ଦନର ସୁଅ ଛୁଟିବାରେ ଲାଗିଛି।
ବିବାଦୀୟ ରିୟଲିଟି ଶୋ’ ବିଗ୍ ବସ୍ ଗ୍ରାଣ୍ଡ ଫିନାଲେର ଏହି ସିଜନରେ ଘରକୁ କିଏ ଟ୍ରଫି ନେଇଯିବେ ବୋଲି ସମସ୍ତେ ଚାହିଁ ବସିଥିଲେ। ଏଲି ଗୋନି ବାଦ୍ ପଡ଼ିବା ପରେ ଟପ୍ ୩ ଫାଇନାଲିଷ୍ଟ ନିକ୍କି ତାମ୍ବୋଲି, ରୁବିନା ଦିଲୈକ ଓ ରାହୁଲ ବୈଦ୍ୟଙ୍କ ଉପରେ ସଭିଙ୍କ ନଜର ରହିଥିଲା। ଶେଷରେ ରୁବିନା ପିନ୍ଧିଛନ୍ତି ବିଜୟୀ ମୁକୁଟ। ଆଇଭୋରି କଲର ଗାଉନ୍ରେ ରୁବିନା କୌଣସି ରାଜକୁମାରୀଠାରୁ କମ୍ ମନେହେଉ ନ ଥିଲେ। ତାଙ୍କର ଏହି ଲୁକ୍କୁ ପ୍ରଶଂସାରେ ପୋତିଦେଇଛନ୍ତି ପ୍ରଶଂସକ। ଫ୍ୟାନ୍ମାନେ ଅଭିନେତ୍ରୀଙ୍କ ଫଟୋ ସୋସିଆଲ ମିଡିଆରେ ଶେୟାର କରିବାରେ ଲାଗିଛନ୍ତି। ବାସ୍ତବରେ ଦେଖିଲେ ରୁବିନା ହେଉଛନ୍ତି ବିବି ୧୪ ହାଉସ୍ର ମୋଷ୍ଟ ଷ୍ଟାଇଲିଷ୍ଟ କଣ୍ଟେଷ୍ଟାଣ୍ଟ। ସେ କେବଳ ନିଜର ହେଡ୍ଷ୍ଟ୍ରଙ୍ଗ୍ ପର୍ସନାଲିଟି ପାଇଁ ନୁହେଁ, ବରଂ ଗ୍ଲାମରସ୍ ଲୁକ୍କୁ ନେଇ ଚର୍ଚ୍ଚିତ। ପାରମ୍ପରିକ ଶାଢ଼ି ହେଉ ଅଥବା ଜୁଏଲେରି ସହ ଫେସନେବୁଲ୍ ଲୁକ୍କୁ ଫ୍ୟାନ୍ମାନେ ଖୁବ୍ ପସନ୍ଦ କରିଥାଆନ୍ତି।
ପ୍ରକାଶ ଯେ, ୨୦୨୦ ଅକ୍ଟୋବର ୩ରେ ଆରମ୍ଭ ହୋଇଥିବା ବିଗ୍ ବସ୍ ସିଜନ୍ ୧୪ରେ ଅଭିନେତା ସଲମାନ୍ ଖାନ୍ ୧୧ ଥର ପାଇଁ ହୋଷ୍ଟ କରୁଥିଲେ। ୧୯୮୭ ଅଗଷ୍ଟ ୨୬ରେ ହିମାଚଳ ପ୍ରଦେଶ ରାଜଧାନୀ ଶିମ୍ଲାରେ ରୁବିନା ଦିଲୈକ୍ଙ୍କ ଜନ୍ମ। ବାପାଙ୍କ ନାମ ଗୋପାଳ ଦିଲୈକ ଓ ମାତା ଶକୁନ୍ତଳା ଦେବୀ। ରୁବିନା ଆଇଏଏସ୍ ହେବାକୁ ଚାହୁଁଥିଲେ। କିନ୍ତୁ ତାଙ୍କ ଭାଗ୍ୟରେ ଅଭିନେତ୍ରୀ ହେବା ଲେଖାଥିଲା। ୨୦୦୮ରେ ଅଭିନୟ ଆରମ୍ଭ କରିଥିବା ଏହି ସୁନ୍ଦରୀଙ୍କୁ ଜି ଟିଭିର ଛୋଟିବୋହୂ ଧାରାବାହିକର ରାଧିକ ଚରିତ୍ର ଲୋକପ୍ରିୟତା ଆଣିଦେଇଥିଲା। କଲର୍ସର ଦେବୋ କା ଦେବ ମହାଦେବରେ ମଧ୍ୟ ରୁବିନା ସୀତା ଚରିତ୍ରରେ ଅଭିନୟ କରିଛନ୍ତି।
