ଭୁବନେଶ୍ୱର,୧୯।୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବୁଧବାର ଅନୁଷ୍ଠିତ ଅର୍ଥନୈତିକ ବ୍ୟାପାର ସଂକ୍ରାନ୍ତ କ୍ୟାବିନେଟ କମିଟି (CCEA) ବୈଠକରେ ପ୍ରାୟ ୯,୪୫୦ କୋଟି ଟଙ୍କା ବ୍ୟୟବରାଦରେ ୪ଟି ରେଳ ପ୍ରକଳ୍ପକୁ ମଞ୍ଜୁରୀ ମିଳିଛି। ଏହା ମଧ୍ୟରେ ଓଡ଼ିଶାର ଦୁଇଟି ମୁଖ୍ୟ ରେଳ ଲାଇନ ବହୁମୁଖୀକରଣ (ମଲ୍ଟି-ଟ୍ରାକିଂ) ପ୍ରକଳ୍ପ ରହିଛି ୭୫ କିଲୋମିଟର ଦୀର୍ଘ ଭଦ୍ରକ-ହରିଦାସପୁର ଚତୁର୍ଥ ଲାଇନ ଏବଂ ୭୨ କିଲୋମିଟର ଦୀର୍ଘ କଟକ-ପାରାଦୀପ (ବଡ଼ବନ୍ଧ) ତୃତୀୟ ଓ ଚତୁର୍ଥ ଲାଇନ।
ଓଡ଼ିଶା, ପଶ୍ଚିମବଙ୍ଗ, ଆନ୍ଧ୍ରପ୍ରଦେଶ ଏବଂ ତାମିଲନାଡୁରେ ବିସ୍ତୃତ ଏହି ୪ଟି ପ୍ରକଳ୍ପ ଦ୍ୱାରା ଭାରତୀୟ ରେଳ ନେଟୱାର୍କରେ ପ୍ରାୟ ୪୧୦ କିଲୋମିଟର ନୂଆ ଲାଇନ ଯୋଡ଼ିହେବ। ଏହାର ମୁଖ୍ୟ ଲକ୍ଷ୍ୟ ହେଉଛି ରେଳ ଲାଇନ୍ର କ୍ଷମତା ବୃଦ୍ଧି କରିବା, ଭିଡ଼ କମ କରିବା ଏବଂ ଯାତ୍ରୀ ଓ ମାଲ ପରିବହନ ସେବାକୁ ଅଧିକ ସୁଗମ କରିବା।
କ୍ୟାବିନେଟ ଅନୁମୋଦନ କରିଥିବା ଅନ୍ୟ ଦୁଇଟି ପ୍ରକଳ୍ପ ହେଲା ପଶ୍ଚିମବଙ୍ଗ ଓ ଓଡ଼ିଶାକୁ ଯୋଡ଼ୁଥିବା ୧୭୩ କିଲୋମିଟର ଦୀର୍ଘ ଖଡ଼ଗପୁର-ଭଦ୍ରକ (ରାଣୀତାଲ) ଚତୁର୍ଥ ଲାଇନ ଏବଂ ଆନ୍ଧ୍ରପ୍ରଦେଶ ଓ ତାମିଲନାଡୁ ମଧ୍ୟରେ ୯୦ କିଲୋମିଟର ଦୀର୍ଘ ଗୁମ୍ମିଡିପୁଣ୍ଡି-ଗୁଡୁର ତୃତୀୟ ଓ ଚତୁର୍ଥ ଲାଇନ।
ଏହି ରେଳ ସମ୍ପ୍ରସାରଣ ଦ୍ୱାରା ଓଡ଼ିଶାରେ, ବିଶେଷ କରି ଶିଳ୍ପ ଏବଂ ମାଲ ପରିବହନ କରିଡରଗୁଡ଼ିକରେ ସଂଯୋଗୀକରଣ ଅଧିକ ସୁଦୃଢ଼ ହେବ। ପାରାଦୀପ ଅଞ୍ଚଳକୁ ବିଭିନ୍ନ ସାମଗ୍ରୀ ପରିବହନ ପାଇଁ କଟକ-ପାରାଦୀପ କରିଡରର ରଣନୈତିକ ଗୁରୁତ୍ୱ ରହିଥିବା ବେଳେ ଭଦ୍ରକ-ହରିଦାସପୁର ସେକ୍ସନ ରାଜ୍ୟର ଏକ ଗୁରୁତ୍ୱପୂର୍ଣ୍ଣ ରେଳପଥର କ୍ଷମତା ବୃଦ୍ଧି କରିବ।
କେନ୍ଦ୍ର ସରକାରଙ୍କ ଅନୁଯାୟୀ, ରେଳ ଲାଇନର କ୍ଷମତା ବୃଦ୍ଧି ପାଇବା ଦ୍ୱାରା ରେଳ ସେବାର କାର୍ଯ୍ୟଦକ୍ଷତା ଏବଂ ବିଶ୍ୱସନୀୟତା ବୃଦ୍ଧି ପାଇବ। ଏହି ବହୁମୁଖୀ ପ୍ରକଳ୍ପଗୁଡ଼ିକ ଟ୍ରେନ ଚଳାଚଳକୁ ସୁଗମ କରିବା ସହ ବିଦ୍ୟମାନ ରୁଟଗୁଡ଼ିକରେ ଭିଡ଼ କମାଇବାରେ ସାହାଯ୍ୟ କରିବ।
ଏହି ୪ଟି ପ୍ରକଳ୍ପ ୪ଟି ରାଜ୍ୟର ୮ଟି ଜିଲ୍ଲାକୁ ଆଚ୍ଛାଦିତ କରିବ ଏବଂ ଏହାଦ୍ୱାରା ପ୍ରାୟ ୬୦ ଲକ୍ଷ ଜନସଂଖ୍ୟା ବିଶିଷ୍ଟ ପ୍ରାୟ ୬,୪୪୮ଟି ଗାଁ ଲାଭବାନ ହେବେ।
ଏହି ପ୍ରକଳ୍ପଗୁଡ଼ିକ ଓଡ଼ିଶା ଏବଂ ଅନ୍ୟାନ୍ୟ ରାଜ୍ୟର କେତେକ ପର୍ଯ୍ୟଟନ, ଧାର୍ମିକ ଏବଂ ଐତିହ୍ୟ ସ୍ଥଳକୁ ରେଳ ସଂଯୋଗୀକରଣରେ ସୁଧାର ଆଣିବ। ଏହା ମଧ୍ୟରେ କୁଲଡ଼ିହା ବନ୍ୟପ୍ରାଣୀ ଅଭୟାରଣ୍ୟ, ଭିତରକନିକା ଜାତୀୟ ଉଦ୍ୟାନ, ମା’ ଭଦ୍ରକାଳୀ ମନ୍ଦିର, ମା’ ଧାମରାଇ ମନ୍ଦିର, ପଞ୍ଚଲିଙ୍ଗେଶ୍ୱର ମନ୍ଦିର, ତାଳସରୀ-ଉଦୟପୁର, ଚାନ୍ଦିପୁର ବେଳାଭୂମି, ଗଡ଼ କୁଜଙ୍ଗ ଜଗନ୍ନାଥ ମନ୍ଦିର, ସାରଳା ମନ୍ଦିର, ଧବଳେଶ୍ୱର ମନ୍ଦିର ଏବଂ ଲଳିତଗିରି ଅନ୍ତର୍ଭୁକ୍ତ।
