ଛତ୍ରପୁର, ୨୯।୭ (ଦିଲ୍ଲୀପ ସାମଲ/ଦ୍ୱାରକା ପଟ୍ଟନାୟକ) : ଭାରତବର୍ଷରେ ପ୍ରଶାସନିକ ସେବା ଗୌରବମୟ ଏବଂ ଉଚ୍ଚକୋଟୀ ଚାକିରି ଭାବେ ପରିଚିତ ଅଟେ। ଏହାକୁ ପାଇବାକୁ ହେଲେ ଆଶାୟୀ ପରୀକ୍ଷାର୍ଥୀ ଅକ୍ଲାନ୍ତ ପରିଶ୍ରମ ଏବଂ ଜ୍ଞାନକୌଶଳରେ ପରୀକ୍ଷା ଉତ୍ତୀର୍ଣ୍ଣ କରିଥାନ୍ତି। ପ୍ରଶାସନିକ ସେବା ପାଇବାର ଆଶା ରଖିଥିବା ଯୁବକଙ୍କୁ ଜିଲାରେ ବ୍ରହ୍ମପୁର, ଛତ୍ରପୁର ଓ ଭଞ୍ଜନଗରରେ ଗଞ୍ଜାମ ଲକ୍ଷ୍ୟ ନିକେତନ କେନ୍ଦ୍ର ଖୋଲାଯାଇ ମାଗଣାରେ ଭାରତୀୟ ପ୍ରଶାସନିକ ସେବା, ଓଡ଼ିଶା ପ୍ରଶାସନିକ ସେବା ଏବଂ ଅନ୍ୟାନ୍ୟ ପ୍ରତିଯୋଗିତାମୂଳକ ପରୀକ୍ଷା ପାଇଁ ଉଚ୍ଚମାନର ପ୍ରଶିକ୍ଷଣ ପ୍ରଦାନ କରାଯାଉଛି ବୋଲି ଗଞ୍ଜାମ ଜିଲାପାଳ ଭି. କିର୍ତ୍ତୀ ଭାସନ କହିଛନ୍ତି। ଏହାର ସଫଳତା ପରେ ତାଲିମକୁ ବ୍ୟାପକ କରିବା ପାଇଁ ଆଗାମୀ ଦିନରେ ପ୍ରତି ପଞ୍ଚାୟତରେ ସାଧନା କେନ୍ଦ୍ର ଖୋଲିବା ପାଇଁ ନିଷ୍ପତ୍ତି ନିଆଯାଇଛି। ଏହି ପରିପ୍ରେକ୍ଷିରେ ଜିଲା ପ୍ରଶାସନ ଏକ ପ୍ଲାନ ପ୍ରସ୍ତୁତ କରିଥିବା ଜିଲାପାଳ ସୂଚନା ଦେଇଛନ୍ତି।
ପ୍ରତି ସାଧନା କେନ୍ଦ୍ରରେ ୫୦ଟି ଛାତ୍ରୀଛାତ୍ରଙ୍କୁ ବିଭିନ୍ନ କ୍ଷେତ୍ରରେ ତାଲିମ ଦିଆଯିବ। ଯେଉଁ ଆଶାୟୀ ବୟସ ଅଧିକ ହୋଇଯାଇଥିବା କାରଣରୁ ସ୍କୁଲ ନଯାଇ ଡ୍ରପ ଆଉଟ ହେଉଛନ୍ତି, ସେମାନଙ୍କୁ ଓପେନ ସ୍କୁଲ ଜରିଆରେ ଦଶମ କିମ୍ବା ଦ୍ୱାଦଶ ଶ୍ରେଣୀ ପରୀକ୍ଷା ଉତ୍ତୀର୍ଣ୍ଣ ହେବା ପରେ ପ୍ରମାଣପତ୍ର ପ୍ରଦାନ କରାଯିବ। ଏହି ସାଧନା କେନ୍ଦ୍ର ଗୁଡ଼ିକ ଲକ୍ଷ୍ୟ ନିକେତନ ଅଧୀନରେ ରହିବ ବୋଲି ଜିଲାପାଳ କହିଛନ୍ତି।
ଗ୍ରାମାଞ୍ଚଳ ଓ ଅନଗ୍ରସର ବର୍ଗର ମେଧାବୀ ଛାତ୍ରୀଛାତ୍ରମାନେ ଅର୍ଥାଭାବରୁ ଉଚ୍ଚ ଶିକ୍ଷାରୁ ବଞ୍ଚିତ ନ ହୋଇ ମୁଖ୍ୟସ୍ରୋତରେ ସାମିଲ ହୋଇପାରିବେ। ଶିକ୍ଷା ଓ ଦକ୍ଷତାର ଏହି ଦ୍ୱିମୁଖୀ ବିକାଶ ମୋଡେଲ ଓ ଯୁବସମାଜକୁ ଆତ୍ମନିର୍ଭରଶୀଳ କରିବା ସହ ରାଜ୍ୟର ସାମଗ୍ରିକ ଅଭିବୃଦ୍ଧିରେ ଏକ ନୂତନ ମାଇଲଖୁଣ୍ଟ ସାବ୍ୟସ୍ତ ହେବ ବୋଲି ଜିଲାପାଳ ଦୃଢୋକ୍ତି ପ୍ରକାଶ କରିଛନ୍ତି।
ଗ୍ରାମାଞ୍ଚଳରେ ଅନେକ ପ୍ରତିଭାବାନ ଛାତ୍ରୀଛାତ୍ର ଅଛନ୍ତି ଯେଉଁମାନଙ୍କୁ ସଠିକ୍ ମାର୍ଗ ଦର୍ଶନ, ଭାଷାଗତ ଦକ୍ଷତା ଏବଂ ଆଧୁନିକ ପ୍ରଯୁକ୍ତିବିଦ୍ୟାର ସୁଯୋଗ ପ୍ରଦାନ କରାଗଲେ ସଫଳତା ହାସଲ କରିପାରିବେ। ଏହି ଅବସରରେ ମୈାଳିକ ଦକ୍ଷତା ହାସଲ କରିବା ଦ୍ୱାରା ଯୁବପିଢିଙ୍କ ପାଇଁ ନିଯୁକ୍ତିର ଅନେକ ନୂଆ ଦ୍ୱାର ଖୋଲିଯିବ। ଏହି ଦକ୍ଷତା ଅଭିଯାନ ସମଗ୍ର ଓ ଯୁବସମାଜକୁ ଆତ୍ମନିର୍ଭରଶୀଳ କରିବା ପାଇଁ ରାଜ୍ୟକୁ ଏକ ନୂତନ ସମୃଦ୍ଧି ଆ ନେଇଯିବାରେ ନିଶ୍ଚିତ ଭାବେ ସହାୟକ ହେବ ବୋଲି ଜିଲାପାଳ ବିଶ୍ବାସ ରଖିଛନ୍ତି।
