ବରଗଡ଼,୯।୯(ପ୍ରେମାନନ୍ଦ ଖମାରୀ):ବରଗଡ଼ ଜିଲା ଭେଡେନ୍ ବ୍ଲକ ରେମଣ୍ଡା ହରିଜନପଡ଼ା ନିବାସୀ ଭୂଷଣ ଭାଏନାଙ୍କ ଜୀବନଯାପନ ଦୁର୍ବିଷହ ହୋଇ ପଡ଼ିଛି। ସେ ୨୦୨୪ରେ ସଂକ୍ରମଣ ହେବା କାରଣରୁ ତାଙ୍କ ଗୋଡ଼ କାଟିବାକୁ ପଡ଼ିଥିଲା। ଫଳରେ ସେ ଦିବ୍ୟାଙ୍ଗ ହୋଇ ପଡ଼ିଛନ୍ତି। ଅନ୍ୟପଟେ ତାଙ୍କ ସ୍ତ୍ରୀଙ୍କ ମଧ୍ୟ ଦେହାନ୍ତ ହୋଇଥିଲା। ଫଳରେ ବୃଦ୍ଧା ମା’, ବାପାଙ୍କ ସମେତ ଶିଶୁପୁତ୍ର ପ୍ରିୟାଂଶୁ(୮) ଓ ଶିଶୁକନ୍ୟା ପ୍ରିୟାଂଶୀ ଭାଏନା (୬)ଙ୍କ ବୋଝ ଭୂଷଣଙ୍କ ଉପରେ ପଡ଼ିଛି। ସେ ନିଜେ ଦିବ୍ୟାଙ୍ଗ ହୋଇଥିବାରୁ ପରିବାର ପୋଷଣ କଷ୍ଟସାଧ୍ୟ ହୋଇ ପଡିଥିବା ସେ କହିଛନ୍ତି। ତାଙ୍କୁ କେବଳ ଦିବ୍ୟାଙ୍ଗ ଭତ୍ତା ମିଳୁଛି। ଅନ୍ୟ କୌଣସି ସ୍ଥାୟୀ ଆୟ ନଥିବାରୁ ପରିବାର ଚଳାଇବାରେ ବହୁବିଧ ଅସୁବିଧାର ସମ୍ମୁଖୀନ ହେଉଛି ବୋଲି ଭୂଷଣ କହିଛନ୍ତି। ଏଭଳି ସ୍ଥିତିରେ ସେ ଥିବାବେଳେ ପ୍ରାୟ ୩୫ ଦିନ ପୂର୍ବରୁ ବର୍ଷାରେ ତାଙ୍କ ଘର ମଧ୍ୟ ଭାଙ୍ଗିଯାଇଛି ବୋଲି ସେ କହିଛନ୍ତି। ଫଳରେ ପରିବାର ସହିତ ସୁରକ୍ଷିତ ଭାବେ ରହିବା ପାଇଁ ମଧ୍ୟ ବହୁତ ଅସୁବିଧା ହେଉଛି। ଏଭଳି ସ୍ଥିତିରେ ତାଙ୍କୁ ଘର ମରାମତି ତଥା ପୁନଃ ନିର୍ମାଣ ସହାୟତା କିମ୍ବା ଏକ ସୁରକ୍ଷିତ ଆବାସ ଯୋଗାଇଦେବା, ଏକ ଇ-ରିକ୍ସା କିମ୍ବା ଅନୁରୂପ ଗାଡ଼ି ପ୍ରଦାନ, ପରିବାରର ଆର୍ଥିକ ଅସୁବିଧାକୁ ବିଚାର କରି ସରକାରଙ୍କ ପ୍ରଚଳିତ ସରକାରୀ ଯୋଜନାରେ ୨ ଶିଶୁ ସନ୍ତାନଙ୍କୁ ସୁବିଧା ସୁଯୋଗ ଯୋଗାଇ ଦେବା ପାଇଁ ଭୂଷଣ ଜିଲାପାଳଙ୍କୁ ନିବେଦନ କରିଛନ୍ତି। ଅତିରିକ୍ତ ଜିଲାପାଳ ମଧୁଛନ୍ଦା ସାହୁ ଦାବିପତ୍ର ଗ୍ରହଣ କରିଥିଲେ ଏବଂ ଆବଶ୍ୟକ ସହାୟତା ଯୋଗାଇ ଦିଆଯିବ ବୋଲି କହିଥିଲେ। ଦାବିପତ୍ର ପ୍ରଦାନ ସମୟରେ ଛାତ୍ର କଂଗ୍ରେସ ନେତା ଗୌରବ ପତି ଆଜାଦ ଉପସ୍ଥିତ ଥିଲେ।
Dharitri – Odisha’s No.1 Odia Daily
