ନୂଆଦିଲ୍ଲୀ,୨୫।୨: ଫେବୃୟାରୀ ୨୬ରେ ସର୍ବଭାରତୀୟ ବ୍ୟବସାୟୀ ମହାସଂଘ (ସିଏଆଇଟି) ପକ୍ଷରୁ ଭାରତବନ୍ଦ ଡାକରା ଦିଆଯାଇଛି। ଜିଏସ୍ଟିରେ ହୋଇଥିବା କେତେକ ସଂଶୋଧନ ବିରୋଧରେ ୮ କୋଟିରୁ ଅଧିକ ବ୍ୟବସାୟୀ ଏହି ବନ୍ଦରେ ସାମିଲ ହେବେ। ଏକ କୋଟିରୁ ଅଧିକ ପରିବହନକାରୀ ସଂସ୍ଥା ମଧ୍ୟ ବନ୍ଦରେ ଯୋଗଦେବେ। ଫଳରେ ଦେଶବ୍ୟାପୀ ପରିବହନ ବ୍ୟବସ୍ଥା ସହିତ ବିଭିନ୍ନ ଲଘୁ ଉଦ୍ୟୋଗ ତଥା ବ୍ୟବସାୟ ସହିତ ଜଡ଼ିତ ଥିବା ସମସ୍ତ ସଂଗଠନ ଶୁକ୍ରବାର ବନ୍ଦ ରହିବ ବୋଲି ସର୍ବଭାରତୀୟ ବ୍ୟବସାୟୀ ମହାସଂଘର ପ୍ରମୁଖ ପ୍ରବୀଣ ଖଣ୍ଡେଲଓ୍ବାଲ ସୂଚନା ଦେଇଛନ୍ତି। ସର୍ବଭାରତୀୟ ବ୍ୟବସାୟୀ ମହାସଂଘ ଦ୍ୱାରା ବାର୍ଷିକ ୮୦ ଲକ୍ଷ କୋଟି ଟଙ୍କାରୁ ଅଧିକ କାରବାର ହୋଇଥାଏ। ଏହା ଦ୍ୱାରା ଦେଶର ୪୦ କୋଟିରୁ ଅଧିକ ଲୋକଙ୍କୁ ପ୍ରତ୍ୟକ୍ଷ ଏବଂ ପରୋକ୍ଷ ନିଯୁକ୍ତି ମିଳିଥାଏ। ଏପରିସ୍ଥଳେ ଏହି କ୍ଷେତ୍ରକୁ ଅଣଦେଖା କରିବା ଦ୍ୱାରା ଦେଶର ରାଜସ୍ବରେ ହାନୀ ହେବ। ଭାରତ ବନ୍ଦ ଡାକରା ମାଧ୍ୟମରେ ସରକାରଙ୍କ ନିଷ୍ପତ୍ତି ପ୍ରତି ସଂଘ ଅସନ୍ତୋଷ ବ୍ୟକ୍ତ କରିବାକୁ ଚାହୁଁଥିବା ସେ କହିଛନ୍ତି।
