ଭଞ୍ଜନଗର ସହରରେ ରିଙ୍ଗ୍‌ ରୋଡ଼ ପାଇଁ ବାଟ ଫିଟିଲା
8:23 amMay 21, 2023May 21, 2023 / 08

ଭଞ୍ଜନଗର,୨୧ା୫(ଡି.ଏନ.ଏ): ଭଞ୍ଜନଗର ବ୍ଲକର ବିଭିନ୍ନ ସ୍ଥାନରେ ଥିବା ମେଗା ପ୍ରକଳ୍ପରୁ ବର୍ତ୍ତମାନ କେବଳ ଖରିଫ୍‌ ଋତୁରେ ହିଁ ଜମିକୁ ପାଣି ଦିଆଯାଉଛି। ରବି ଋତୁରେ ଚାଷୀଙ୍କୁ ଏହି ସୁବିଧା ମିଳୁନାହିଁ। କିଛିଦିନ ପୂର୍ବେ ଭଞ୍ଜନଗର ବ୍ଲକ ବୁଦୁଲି ଗ୍ରାମର ଚାଷୀମାନେ ଗଣ୍ଡିଶୁଳାରେ ଥିବା ମେଗା ଉଠା ଜଳସେଚନ ପ୍ରକଳ୍ପରୁ ପାଣି ଛାଡ଼ିବା ପାଇଁ ଦାୟିତ୍ୱରେ ଥିବା ଅଧିକାରୀମାନଙ୍କୁ ଅନୁରୋଧ କରିଥିଲେ। କିନ୍ତୁ ଉପରୁ ଏ ନେଇ କୌଣସି ନିର୍ଦ୍ଦେଶନାମା ନାହିଁ । ତେଣୁ ରବିରେ ପାଣି ଛଡ଼ାଯାଇପାରିବ ନାହିଁ ବୋଲି ଉକ୍ତ କର୍ମଚାରୀମାନେ କହିଥିଲେ। ଫଳରେ ଚାଷୀ ନିରାଶ ହୋଇ ଫେରିଯାଇଥିଲେ। ବୁଦୁଲି ହେଉଛି ବାଇଗଣ ଚାଷ ପାଇଁ ପ୍ରସିଦ୍ଧ । ଏଠାରୁ ରାଜ୍ୟ ଓ ରାଜ୍ୟ ବାହାରକୁ ପନିପରିବା ରପ୍ତାନୀ ହେଉଛି । ଖରିଫରେ ମଧ୍ୟ ମେଗା ପ୍ରକଳ୍ପରୁ ପାଣି ଛଡ଼ାଯିବା ବ୍ୟବସ୍ଥା କରାଗଲେ ଚାଷୀମାନେ ବିଶେଷ ଲାଭବାନ ହେବେ। ଏଥିପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବା ପାଇଁ ଚାଷୀମାନେ ଦାବି କରିଛନ୍ତି। ଅପରପକ୍ଷେ ଭଞ୍ଜନଗର ଜଳସମ୍ପଦ ବିଭାଗ ପକ୍ଷରୁ ଅଧିକ ଅଞ୍ଚଳକୁ କିଭଳି ଜଳସେଚନ ହେବ ସେ ନେଇ ମଧ୍ୟ କୌଣସି ନୂତନ ପଦକ୍ଷେପ ଆଜକୁ ବହୁବର୍ଷ ହେବ ନିଆଯାଇନାହିଁ । ବର୍ତ୍ତମାନ ବିଭାଗ ପକ୍ଷରୁ କେବଳ ପୁରୁଣା କେନାଲଗୁଡ଼ିକୁ କଂକ୍ରିଟ କରାଯାଉଛି । ଭଞ୍ଜନଗର ସହରଦେଇ ଯାଇଥିତ୍ବା ଲୋହରାଖଣ୍ଡି ନଦୀ ଉପରେ ରିଙ୍ଗ୍‌ ରୋଡ଼ କରିବା ରାସ୍ତା ଇତି ମଧ୍ୟରେ ଖୋଲିଛି । ବାଇପାସ୍‌ ରୋଡ଼ ସେତୁ ଠାରୁ ଗାମୁଣ୍ଡି ସେତୁ ପର୍ଯ୍ୟନ୍ତ ସହରକଡ଼ ଆଡ଼ି ବନ୍ଧର ପୁନରୁଦ୍ଧାର କରାଯିବ। ପ୍ରାୟ ୧୫ ଫୁଟ ଚଉଡ଼ା ଆଡ଼ିବନ୍ଧ ହେବ। ପୂର୍ବତନ ବାଚସ୍ପତି ବିକ୍ରମ କେଶରୀ ଆରୁଖଙ୍କ ଉଦ୍ୟମ କ୍ରମେ ଇତିମଧ୍ୟରେ ୫ କୋଟିରୁ ଊର୍ଦ୍ଧ୍ୱ ଟଙ୍କା ଅନୁମୋଦନ ହୋଇଛି । ତାହାର କାମ ଖୁବ୍‌ଶୀଘ୍ର ଆରମ୍ଭ ହେବ। ଆଡ଼ିବନ୍ଧ କାମ ସରିଲେ ଲୋକେ ଚଳପ୍ରଚଳ କରିବା ସୁବିଧା ହେବ । କିନ୍ତୁ ବର୍ତ୍ତମାନ ପରିସ୍ଥିତିରେ ପକ୍କା ରାସ୍ତା ହେବା ଯୋଜନା ନାହିଁ । ସେହିଭଳି ଜାନିବିଲି ଠାରୁ ପଦ୍ମପୁର ପର୍ଯ୍ୟନ୍ତ ୬ଟି ଫେଜ୍‌ରେ ପ୍ରାୟ ୧୫ କିମି କେନାଲକୁ ୬୦ କୋଟି ଟଙ୍କା ବ୍ୟୟରେ କଂକ୍ରିଟ କରାଯାଉଛି। ବୁଗୁଡ଼ା ସେକ୍ସନର ପ୍ରାୟ ୩୦ କିମି କେନାଲକୁ ୪୦ କୋଟି ଟଙ୍କା ବ୍ୟୟରେ କଂକ୍ରିଟ କରାଯାଉଛି । ୧୩୦ ବର୍ଷ ପୁରୁଣା ଜାନିବିଲି ଆନ୍ନିକଟ ଠାରେ ନୂଆ ଆନ୍ନିକଟ ନିର୍ମାଣ ହେବ । ଏ ବାବଦରେ ୧୦୦ କୋଟି ଟଙ୍କା ଖର୍ଚ୍ଚ ହେବ। ତାହାର ଟେଣ୍ଡର ସରିଛି । ଡ଼ହ ସେକ୍ସନରେ ପ୍ରାୟ ୬ କୋଟି ଟଙ୍କା ବ୍ୟୟରେ ବିଭିନ୍ନ କେନାଲକୁ କଂକ୍ରିଟ କରାଯାଉଛି । ଏଥିସହ ଅନ୍ୟାନ୍ୟ କାମ ଉକ୍ତ ସେକ୍ସନରେ ଚାଲିଛି। ଭଞ୍ଜନଗର ସେକ୍ସନରେ ଢ଼ୋଲପିଟା ଠାରେ ବୃହତ ଉଠା ଜଳସେଚନକୁ ପାଣି ଯୋଗାଣ ପାଇଁ ୨୫ କୋଟି ଟଙ୍କା ବ୍ୟୟରେ ଏକ ଆନିକଟ ହେଉଛି । ବଡ଼ନଦୀର ବିଭିନ୍ନ ସ୍ଥାନରେ ଆଡ଼ିବନ୍ଧର ଉନ୍ନତିକରଣ ପାଇଁ ୧୪ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟ ହେଉଛି। ସୋରଡ଼ା କବିରାଜପୁର ଠାରେ ଋଷିକୁଲ୍ୟା ନଦୀର ଗାର୍ଡ଼ ୱାଲ ନିର୍ମାଣ ପାଇଁ ୪କୋଟି ୫୦ ଲକ୍ଷ ଟଙ୍କା ବ୍ୟୟ ହେଉଛି । ଏଥିସହ ଶେରଗଡ଼ ଅଞ୍ଚଳ ନନ୍ଦିନୀ ନଦୀର ୫ଟି ସ୍ଥାନରେ ଗାର୍ଡ଼ୱାଲ କରାଯାଉଛି । ଏ ବାବଦରେ ୧୫ କୋଟିରୁ ଊର୍ଦ୍ଧ୍ୱ କୋଟି ଟଙ୍କା ଖର୍ଚ୍ଚ ହେଉଛି। ଭଞ୍ଜନଗର ନୂଅଁାଗା କେନାଲ କାର୍ଯ୍ୟ ଚଳିତ ଆର୍ଥତ୍କ ବର୍ଷରେ କାମ ଶେଷ ହେବ। ବର୍ତ୍ତମାନ ୫ କିମି କେନାଲ ପର୍ଯ୍ୟନ୍ତ ଚାଷୀମାନେ ପାଣି ପାଇପାରୁଛନ୍ତି। ବଳକା ୧୦ କିମି କାମ ଚଳିତ ବର୍ଷ ଶେଷ ହେବ । କାମ ପୂର୍ଣ୍ଣାଙ୍ଗ ହେଲେ ୨ହଜାରରୁ ଊର୍ଦ୍ଧ୍ୱ ହେକ୍ଟର ନୂତନ ଜମିକୁ ଜଳସେଚନ ହେବ । ଏ ବାବଦରେ ୭୨ କୋଟି ଟଙ୍କା ବ୍ୟୟ ହେଉଛି । ଭଞ୍ଜନଗର ଡ଼ିଭିଜନ ଅଧିନରେ ଏହା ଏକ ମାତ୍ର ନୂଆ କେନାଲ କାମ ଚାଲିଛି । ବର୍ତ୍ତମାନ ଡ଼ହ ଜଳଭଣ୍ଡାରରୁ ୬୫୮୦ ହେକ୍ଟର ଜମିକୁ ଜଳସେଚନ ହେଉଛି। ବାଘୁଆରୁ ୮୩୬୭, ଋଷିକୁଲ୍ୟା ଯୋଜନାରେ ୧୮ ହଜାର ୫୯୭ ହେକ୍ଟର ଜମିକୁ ଜଳସେଚନ ହେଉଛି । ଏନେଇ ଭଞ୍ଜନଗର ଜଳସମ୍ପଦ ବିଭାଗ ଅଧୀକ୍ଷଣଯନ୍ତ୍ରୀ ଇଂ ଗୋକୁଳ ଚନ୍ଦ୍ର ପାଢ଼ୀଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ ନୂତନ ପ୍ରକଳ୍ପ ନିର୍ମାଣ ପାଇଁ ବର୍ତ୍ତମାନ କୌଣସି ପ୍ରସ୍ତାବ ନାହିଁ । ପୁରୁଣା କେନାଲ ଗୁଡ଼ିକ କିଭଳି ସୁରକ୍ଷିତ ରହିପାରିବ ସେଥିପାଇଁ ପଦକ୍ଷେପ ନିଆଯାଉଛି ।