ଭଦ୍ରକ,୫।୬(ସନାତନ ରାଉତ): ଭଦ୍ରକ ଗ୍ରାମାଞ୍ଚଳ ଥାନା ବନ୍ଧଗାଁ ପଞ୍ଚାୟତରେ ପୁଣି ଏକ ହତ୍ୟାକାଣ୍ଡ ଘଟିଛି। ୬ ମାସ ପରେ ଆଉ ଏକ ହତ୍ୟାକାଣ୍ଡ ଅଞ୍ଚଳରେ ଚାଞ୍ଚଲ୍ୟ ଖେଳି ଯାଇଛି। ଗରମ ପାଣି ଢାଳି ଜଣେ ଯୁବକଙ୍କୁ ହତ୍ୟା କରାଯାଇ ଥିବା ଅଭିଯୋଗ ହୋଇଛି । ଅଭିଯୋଗକୁ ଭିତ୍ତି କରି ପୋଲିସ ୩ଜଣକୁ ଅଟକ ରଖି ପଚରାଉଚରା କରୁଛି। ମୃତ ଯୁବକ ହେଉଛନ୍ତି ବନ୍ଧଗାଁ ଗ୍ରାମର ଭାଗୀରଥି ମଳିକଙ୍କ ପୁଅ ଗଗନ ମଳିକ।
ମିଳିଥିବା ସୂଚନା ମୁତାବକ, ଗଗନଙ୍କୁ ଗାଁର ଜଣେ ବ୍ୟକ୍ତି ଦିନ ମଜୁରିଆ ଭାବେ କାମ କରିବାକୁ ଡାକିଥିଲେ। ପରେ ତାଙ୍କୁ ଦେଶୀ ମଦ ପିଇବାକୁ ଦେଇଥିଲେ। ପରବର୍ତ୍ତୀ ସମୟରେ ଘର ମାଲିକ ଏବଂ ଗଗନଙ୍କ ଭିତରେ କୌଣସି କଥାକୁ ନେଇ ଯୁକ୍ତିତର୍କ ଓ ପରେ ଗଣ୍ଡଗୋଳ ହୋଇଥିଲା । ଯାହାକୁ ନେଇ ଗଗନ ଉପରେ ଏକ ଚିକେନ ଦୋକାନରେ ଫୁଟୁଥିବା ଗରମ ପାଣି ଢାଳି ଦେଇଥିଲେ। ସ୍ଥାନୀୟ ଲୋକେ ଗଗନଙ୍କୁ ଅଚେତ ଅବସ୍ଥାରେ ଭଦ୍ରକ ମେଡିକାଲନେଇଥିଲେ, ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ଅପରପକ୍ଷେ ଗ୍ରାମାଞ୍ଚଳ ପୋଲିସ ଏହି ଘଟଣାରେ ୩ଜଣଙ୍କୁ ଅଟକ ରଖିଛି।
ଗତ ୬ ମାସ ତଳେ ଉକ୍ତ ଗ୍ରାମର ଚିତରଞ୍ଜନ ରାଉତଙ୍କୁ ହତ୍ୟା କରାଯାଇଥିଲା, ବିଜେଡି ନେତା ଚିତ ହତ୍ୟାକୁ ୬ ମାସ ନ ପୁରୁଣ ପୁଣି ଏକ ହତ୍ୟା ସ୍ଥାନୀୟ ପଞ୍ଚାୟତରେ ଭୟର ବାତାବରଣ ସୃଷ୍ଟି କରିଛି।
