ଅନୁଗୋଳ ଅଫିସ୍, ୧୧ା୭ – ଅନୁଗୋଳ ଜିଲାରେ ଏବେ ମାଓବାଦୀଙ୍କ ଚଳପ୍ରଚଳ ନାହିଁ। ଗତ ଦୁଇ ବର୍ଷ ମଧ୍ୟରେ ମାଓବାଦୀଙ୍କ ସମ୍ପର୍କରେ କୌଣସି ସୂଚନା ମିଳିନାହିଁ। ତେଣୁ ମାଓପ୍ରବଣ ଜିଲା ତାଲିକାରୁ ଅନୁଗୋଳକୁ ସରକାର ମୁକ୍ତ କରିଛନ୍ତି। ଓଡ଼ିଶା ପୋଲିସ ଓ ଅନୁଗୋଳ ପୋଲିସ ପାଇଁ ଏହା ଗର୍ବର ବିଷୟ। ତଥାପି ଏହାକୁ ଖାମଖିଆଲି ଭାବେ ନ ନେଇ ସତର୍କ ରହିବା ବୋଲି ଜିଲା ପୋଲିସ ମୁଖ୍ୟାଳୟରେ ଏକ ଖବରଦାତା ସମ୍ମିଳନୀରେ ଏସ୍ପି ଜଗମୋହନ ମୀନା ପ୍ରକାଶ କରିଛନ୍ତି।
ଏସ୍ପି କହିଛନ୍ତି, ଅନୁଗୋଳ ଜିଲାରେ ଗତ ୫ ବର୍ଷରେ ୯ ଥର ମାଓବାଦୀ କାର୍ଯ୍ୟକଳାପ ଦେଖାଦେଇଛି। ସେଥିମଧ୍ୟରୁ ୬ ଥର ପୋଲିସ ଓ ମାଓବାଦୀଙ୍କ ମଧ୍ୟରେ ଗୁଳିବିନିମୟ ହୋଇଛି। ୨୦୧୩ରେ ଛେଣ୍ଡିପଦା ଥାନା ପାତ୍ରପଡ଼ା ନିକଟରେ ପ୍ରଥମେ ମାଓବାଦୀଙ୍କ ସହ ପୋଲିସର ମୁହଁ।ମୁହିଁ ହୋଇଥିଲା। ୨୦୧୬ ଜାନୁୟରୀ ୨୪ରେ ପାଲଲହଡ଼ା ଥାନା ଅଧୀନରେ କଳଙ୍ଗ ଡିଭିଜନ୍ର ସୁନୀଲ ଓରଫ ପି. କୁମାରସ୍ବାମୀ ଓ ତାଙ୍କ ସ୍ତ୍ରୀ ସୋନିଙ୍କୁ ଏସ୍ଓଜି ଟିମ୍ ଏନ୍କାଉଣ୍ଟର କରିଥିଲେ। ୨୦୧୫ ଫେବୃୟାରୀ ୧୨ରେ ପାଲଲହଡ଼ା ଥାନା ପଟାମୁଣ୍ଡା ଗାଁର ସାମୁଏଲ ବୋଡ଼ରାକୁ ମାଓବାଦୀ ହତ୍ୟା କରିଥିଲେ। ସେହିବର୍ଷ ସେପ୍ଟେମ୍ବର ୨୯ରେ ପୁରୁଣାକୋଟ ଥାନା ଫରେଷ୍ଟ ବିଟ୍ ହାଉସ୍ ଉପରେ ଅତର୍କିତ ଗୁଳିଚାଳନା କରିଥିଲେ। ୩୦ ତାରିଖରେ ଟୁଲୁକା ଫରେଷ୍ଟ ବିଟ୍ ହାଉସ୍କୁ ଅଗ୍ନି ସଂଯୋଗ କରିଥିଲେ। ଶେଷଥର ପାଇଁ ୨୦୧୮ ଅଗଷ୍ଟ ୧୨ରେ ଗୁଳି ବିନିମୟ ହୋଇଥିଲା। ମାଓବାଦୀ ପ୍ରବଣ ଜିଲା ତାଲିକାରୁ ମୁକ୍ତ ହୋଇଥିଲେ ବି ଗୋଇନ୍ଦା ବିଭାଗ ଓ ଅନୁଗୋଳ ପୋଲିସ ଦୃଷ୍ଟି ରଖିବ। ଆବଶ୍ୟକ ପଡିଲେ ଏସ୍ଓଜି ରିକ୍ୟୁସନ କରାଯିବ ବୋଲି ଏସ୍ପି ପ୍ରକାଶ କରିଛନ୍ତି।
ଆତ୍ମସମର୍ପଣ କରିଛନ୍ତି ୬ ମାଓବାଦୀ
ଅନୁଗୋଳ ଜିଲାରେ ମାଓବାଦୀ କାର୍ଯ୍ୟକଳାପ ଦେଖାଦେବା ପରଠାରୁ ଅଦ୍ୟାବଧି ୬ ଜଣ ମାଓବାଦୀ ଆତ୍ମସମର୍ପଣ କରିଛନ୍ତି। ୨୦୧୫ ଡିସେମ୍ବରରେ ସମ୍ବଲପୁର-ଦେବଗଡ଼-ସୁନ୍ଦରଗଡ଼(ଏସ୍ଡିଏସ୍) କ୍ୟାଡରର ମାଧବ, ୨୦୧୬ ଏପ୍ରିଲ ୬ରେ ପୁରୁଣାକୋଟ ଥାନା ସିଟିକୋଇଲି ଅଞ୍ଚଳର ପିଣ୍ଟୁ ଓ ୨୦୧୭ ଡିସେମ୍ବରରେ ଝାଡ଼ଖଣ୍ଡ ଅଞ୍ଚଳର ଜଣେ, ଏସ୍ଡିଏସ୍ କ୍ୟାଡରର ଜଣେ, ୨୦୧୮ ଏପ୍ରିଲରେ ରାଞ୍ଚି ଅଞ୍ଚଳର ଛୋଟୁ ଗଞ୍ଜୁ ଓ ଏସ୍ଡିଏସ୍ କ୍ୟାଡରର ଜଣେ ଅନୁଗୋଳ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି।
ପରିଶ୍ରମର ଫଳ ମିଳିଛି: ଆଇଜି
ଉତ୍ତର-କେନ୍ଦ୍ରାଞ୍ଚଳ ରେଞ୍ଜ ଆଇଜି ନରସିଂହ ଭୋଳ କହିଛନ୍ତି, ପୋଲିସ କର୍ମଚାରୀଙ୍କ ପରିଶ୍ରମର ଫଳ ମିଳିଛି। ଅନୁଗୋଳ ମାଓବାଦୀ ଜିଲା ତାଲିକାରୁ ମୁକ୍ତ ହୋଇଥିବାରୁ ସରକାର ଏବେ ଅନ୍ୟ ଜିଲାର ମାଓବାଦୀଙ୍କ ଉପରେ ଅଧିକ ଧ୍ୟାନ ଦେଇପାରିବେ। ୨୦୧୬ରେ ପୋଲିସ ଏନ୍କାଉଣ୍ଟର ପରେ କଳିଙ୍ଗନଗର ମାଓବାଦୀ କ୍ୟାଡର ଗତିବିଧି ସମ୍ପୂର୍ଣ୍ଣ ଭାବେ ବନ୍ଦ ହୋଇଯାଇଥିଲା। ଏହାପରେ ଜଣେ ପରେ ଜଣେ ମାଓଦାବୀ ଆତ୍ମସମର୍ପଣ କରିଥିଲେ। ଗୋଇନ୍ଦା ବିଭାଗର ଉଦ୍ୟମ ଯୋଗୁ ଏସବୁ ସମ୍ଭବ ହୋଇଛି।
