ନୂଆଦିଲ୍ଲୀ,୧୦।୧୦ : ଦେଶର ବିଭିନ୍ନ ସହରରେ ୫ ସେବା ଆରମ୍ଭ ହୋଇଛି। ୮ ଟି ସହରରେ ଏୟାରଟେଲ (ଭାରତୀ ଏୟାରଟେଲ) ଏବଂ ଜିଓ (ରିଲାଏନ୍ସ ଜିଓ) ୫ ନେଟୱାର୍କ ଉପଲବ୍ଧ କରାଯାଇଛି। ଏହି ରୋଲ ଆଉଟ ସହିତ ୫ ଜି ନାମରେ ଠକେଇ ଆରମ୍ଭ ହୋଇଛି। ସ୍କାମରମାନେ ସମଗ୍ର ଦେଶରେ ସକ୍ରିୟ ହୋଇସାରିଛନ୍ତି। ସେମାନେ ୫ ଜି ନାମରେ ଲୋକଙ୍କ ସହ ଅନଲାଇନ ଠକେଇ କରୁଛନ୍ତି। ଲୋକମାନଙ୍କୁ ୫ ଜି ଅପଗ୍ରେଡ ନାମରେ ପ୍ରତାରଣା କରାଯାଇଥିବା ଏପରି କିଛି ଘଟଣା ଘଟିଛି। ଏହି ପ୍ରସଙ୍ଗରେ ହାଇଦ୍ରାବାଦ ପୋଲିସ ମଧ୍ୟ ଏକ ସତର୍କ ସୂଚନା ଜାରି କରିଛି।
ହାଇଦ୍ରାବାଦ ପୋଲିସର ସତର୍କ ସୂଚନାରେ କୁହାଯାଇଛି ଯେ ଉପଭୋକ୍ତାମାନେ ମୋବାଇଲ ଫୋନରେ ମିଳୁଥିବା କୌଣସି ୟୁଆରଏଲ ଉପରେ କ୍ଲିକ କରିବା ଉଚିତ ନୁହେଁ। ଏଭଳି କଲେ କ୍ଷତି ସହିବାକୁ ପଡିପାରେ।
ଉପଭୋକ୍ତାମାନେ ଅଭିଯୋଗ କରିଛନ୍ତି ଯେ ମୋବାଇଲରେ ଅନେକ ୟୁଆରଏଲ ମିଳିଛି, ଯାହା ବ୍ୟାଙ୍କ ଠକେଇର କାରଣ ପାଲଟିଛି।
ଯଦି ୫ ଜିକୁ ଅପଗ୍ରେଡ କରିବାକୁ ୟୁଆରଏଲ ଫୋନରେ ମିଳିଥାଏ, ତେବେ ସେହି ୟୁଆରଏଲ କ୍ଲିକ କରାଯିବା ଉଚିତ ନୁହେଁ।
ଯଦି ଫୋନରେ ୪ ଜି ରୁ ୫ ଜି ସିମକୁ ଅପଗ୍ରେଡ କରିବାକୁ ଏକ ଲିଙ୍କ ମିଳେ ତେବେ ଏହାକୁ ଅଣଦେଖା କରନ୍ତୁ ଏବଂ ଡିଲିଟ୍ କରିବା ଜରୁରୀ ବୋଲି ସତର୍କ ସୂଚନାରେ ଉଲ୍ଲେଖ କରାଯାଇଛି।
ଅପଗ୍ରେଡ କରିବାକୁ ଉପଭୋକ୍ତାମାନଙ୍କୁ କୌଣସି ବାହ୍ୟ ଲିଙ୍କ ଉପରେ କ୍ଲିକ କରିବାର ଆବଶ୍ୟକତା ନାହିଁ। ଯଦି ଆପଣଙ୍କର ଡିଭାଇସ ୫ ଜି ପାଇଁ ସକ୍ଷମ ଏବଂ ଆପଣଙ୍କର ଡିଭାଇସ ନିର୍ମାତାଙ୍କ ଦ୍ୱାରା ୫ ଜି ସଫ୍ଟୱେର୍ ଅପଡେଟ ଜାରି କରାଯାଇଛି, ତେବେ ଆପଣଙ୍କୁ କୌଣସି ଚଲିଙ୍କରେ କ୍ଲିକ କରିବାର ଆବଶ୍ୟକତା ନାହିଁ । ଯେତେବେଳେ ଆପଣଙ୍କ ଅଞ୍ଚଳରେ ୫ ଜି ନେଟୱାର୍କ ଉପଲବ୍ଧ, ଆପଣ ନିକଟତମ ପଞ୍ଜୀକୃତ ଟେଲିକମ ଅପରେଟରଙ୍କଠାରୁ ଏନେଇ ଏକ ବାର୍ତ୍ତା ପାଇବେ ।
