ଭୁବନେଶ୍ୱର,୩।୬(ବ୍ୟୁରୋ): ସ୍ମାର୍ଟସିଟି ଭୁବନେଶ୍ୱରର ବିଭିନ୍ନ ମଲ୍ରେ ସ୍ମାର୍ଟ ଉପାୟରେ ଚୋରି କରୁଥିଲା ବଙ୍ଗୀୟ ମହିଳା ଗ୍ୟାଙ୍ଗ୍। ଲଜ୍ ଓ ହୋଟେଲରେ ରହିବା ସହ ମଲ୍ରୁ ମଲ୍ ବୁଲି ଚତୁରତାର ସହ ଲକ୍ଷ ଲକ୍ଷ ଟଙ୍କାର ଜିନିଷ ଚୋରାଇ ନେଉଥିବା ଏହି ଆନ୍ତଃରାଜ୍ୟ ର଼୍ୟାକେଟ ଶେଷରେ ଧରାପଡିଛି। ୧୩ଜଣିଆ ଗ୍ୟାଙ୍ଗ୍ର ୯ଜଣଙ୍କୁ କମିଶନରେଟ ପୋଲିସ ଗିରଫ କରିବା ପରେ ର଼୍ୟାକେଟର ପର୍ଦ୍ଦଫାଶ ହୋଇଛି। ଗିରଫ ଅଭିଯୁକ୍ତମାନେ ହେଲେ ପଶ୍ଚିମବଙ୍ଗ ଉତ୍ତର ୨୪ ପ୍ରଗଣା ଜିଲା ବିଜାପୁର ଥାନା ଅନ୍ତର୍ଗତ ହାଲିସର ଗ୍ରାମର ଲବୁନି ସମନ୍ଦର (୩୪), ଶୁକ୍ଳା ବଣିକ (୩୦), ମଞ୍ଜରୀ ଚକ୍ରବର୍ତ୍ତୀ (୩୨), ଅମ୍ରିତା ରଏ (୪୦), ବୈଶାଖୀ ମିର୍ଦ୍ଧା (୨୩), ପୁତୁଲ ଦେବ ମହାନ୍ତି (୩୫), ମାଳତି ଦାସ (୩୪), ରୂପା ମିର୍ଦ୍ଧା (୩୨) ଓ ମୌସୁମୀ ଦତ୍ତ (୩୧)। ସେମାନଙ୍କ ନିକଟରୁ ପୋଲିସ ପ୍ରାୟ ୨ ଲକ୍ଷ ଟଙ୍କାର ହର୍ଲିକ୍ସ, ବିଭିନ୍ନ ପ୍ରକାର କସ୍ମେଟିକ୍ ଆଦି ସାମଗ୍ରୀ ଜବତ କରିଛି। ଗୁରୁବାର ରାତିରେ ଗିରଫ ପରେ ଅଭିଯୁକ୍ତଙ୍କୁ ଶୁକ୍ରବାର କୋର୍ଟ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ ଏହି ଗ୍ୟାଙ୍ଗର ଆଉ ୪ଜଣ ଫେରାର ଥିବାରୁ ସେମାନଙ୍କୁ ଧରିବାକୁ ପ୍ରୟାସ କରାଯାଉଥିବା ଜୋନ-୫ ଏସିପି ସଞ୍ଜୀବ ଶତପଥୀ କହିଛନ୍ତି। ଏଥିସହ ଏହି ମହିଳାମାନେ ଯଦି ଅନ୍ୟ କୌଣସି ମଲ୍ରେ ଚୋରି କରିଥିବା ପ୍ରମାଣ ଥିବ ତା’ହେଲେ ଏତଲା ଦେବାକୁ ସେ ଅପିଲ କରିଛନ୍ତି।
ସାୟାରେ ପ୍ୟାକେଟ୍, ସ୍ମାର୍ଟ ତରିକାରେ ଚୋରି
ଗିରଫ ମହିଳାମାନେ ଶାଢ଼ି, ଲେଗିନ୍ସ, କୁର୍ତି ଆଦି ପୋଷାକ ପିନ୍ଧି ଚୋରି କରିବାକୁ ଯାଆନ୍ତି। ଅଧିକାଂଶ ମହିଳା ଶାଢ଼ି ପିନ୍ଧି ଚୋରି କରିବାକୁ ପସନ୍ଦ କରିଥାନ୍ତି। ଏଥିପାଇଁ ସେମାନେ ପିନ୍ଧୁଥିବା ସାୟା ଓ ଅନ୍ୟ ପୋଷାକରେ ବ୍ୟାଗ୍ ଭଳି ପ୍ୟାକେଟ କରିଥାନ୍ତି। ସେମାନେ ଚୋରି କରୁଥିବା ସାମଗ୍ରୀକୁ ଉକ୍ତ ପ୍ୟାକେଟ୍ରେ ଭର୍ତ୍ତି କରିଦିଅନ୍ତି। ଲେଗିନ୍ସ ପିନ୍ଧିଥିବା ମହିଳାମାନେ ଅଣ୍ଟାରେ ଭିଡିଦିଅନ୍ତି ଚୋରି ସାମଗ୍ରୀ। ଏପରିକି କିଛି ମହିଳା ଜଙ୍ଘ ମଝିରେ ମଧ୍ୟ ସାମଗ୍ରୀକୁ ଜାକି ଦିଅନ୍ତି। ସେମାନେ ଲମ୍ବା ଶାଢ଼ିକୁ ଚତୁରତାର ସହ ଘୋଡ଼େଇ ସମସ୍ତ କର୍ମଚାରୀଙ୍କ ଆଗରେ ନେଇଯାଆନ୍ତି। ସେମାନେ ଚୋରୁ କରୁଥିବା ମଲ୍ରୁ ଅଳ୍ପ ଟଙ୍କାର ସାମଗ୍ରୀ କିଣିଥାନ୍ତି। ତାହାର ବିଲ୍ ସିକ୍ୟୁରିଟି ଗାର୍ଡଙ୍କୁ ଜଣେ ଦେଖାଇବା ସମୟରେ ଅନ୍ୟମାନେ ଖସି ଆସନ୍ତି।
