ଚଣ୍ଡିଖୋଲ,୧୪ା୧(ଡି.ଏନ୍.ଏ.): ଚାଉଳକୁ ନେଇ ରାଜନୀତିକରଣ କରାଯାଉଛି। ଭାଜପା ଓ ବିଜେଡି ଚାଉଳ କାହାର, କିଏ ଦଉଛି ସେଥିନେଇ କଳି ଲାଗିବାରେ ବ୍ୟସ୍ତ। ଏପଟେ ପ୍ରକୃତ ହିତାଧିକାରୀ ଖାଦ୍ୟ ସୁରକ୍ଷା ଯୋଜନାରେ ଚାଉଳ ଓ ଗହମ ପାଉଛନ୍ତି କି ନାହିଁ ସେଥିପ୍ରତି କେହି ଦୃଷ୍ଟି ଦେଉନାହାନ୍ତି କିମ୍ବା ଏହାର ତଦାରଖ କରାଯାଉନାହିଁ। ୨୦୨୨ମେ’ରୁ ଗହମ ଆସିବା ବନ୍ଦ ହେବା ପରେ ଯେଉଁ ହିତାଧିକାରୀଙ୍କ ରାଶନକାର୍ଡରେ ଗହମ ଉଲ୍ଲେଖ ରହିଛି ସେମାନେ ଅଦ୍ୟାବଧି ମେ’ ଓ ଜୁନ୍ ୨ ମାସର ଗହମ କି ଚାଉଳ ପାଇନାହାନ୍ତି। ସେ ଗହମ କୁଆଡ଼େ ଗଲା ସେ ସମ୍ପର୍କରେ ମଧ୍ୟ ଖୋଜ ଖବର ନାହିଁ। ଯୋଗାଣ ବିଭାଗର ଅଧିକାରୀମାନେ ସ୍ପଷ୍ଟଭାବେ କହି ପାରୁନାହାନ୍ତି ହିତାଧିକାରୀଙ୍କୁ ଗହମ ମିଳିବ କି ନାହିଁ। ଏଥି ସହିତ ଡିସେମ୍ବର ମାସର ଚାଉଳ ମଧ୍ୟ ଏପର୍ଯ୍ୟନ୍ତ ଦିଆଯାଇ ନ ଥିବା ସୂଚନା ମିଳିଛି। ଯାଜପୁର ଜିଲା ବଡ଼ଚଣା ବ୍ଲକରେ ଏଭଳି ଘଟଣା ଦେଖିବାକୁ ମିଳିଛି।
ସରକାରୀ ହିସାବ ଅନୁଯାୟୀ, ଏଠାରେ ହିତାଧିକାରୀଙ୍କ ନିମନ୍ତେ ପ୍ରତ୍ୟେକ ମାସରେ ୧ଲକ୍ଷ ୧୭୦ କୁଇଣ୍ଟାଲ ଚାଉଳ ଓ ୨ ହଜାର ୫୧୭ କୁଇଣ୍ଟାଲ ଗହମର ଆବଶ୍ୟକତା ରହିଛି। ୨୦୨୨ ମେ’ ଓ ଜୁନ୍ ମାସ ଗହମ ହିତାଧିକାରୀଙ୍କୁ ଦିଆଯାଇ ନ ଥିଲା। ସେଥିମଧ୍ୟରୁ ଅର୍ଦ୍ଧାଧିକ ହିତାଧିକାରୀ ଗହମ ପାଇଥିବା ବେଳେ ଅଗଷ୍ଟ ଓ ସେପ୍ଟେମ୍ବରରେ ଅଧାଅଧି ହିତାଧିକାରୀ ଗହମ ପାଇଲେ ନାହିଁ। ମୋଟ୍ ୨ ମାସର ଗହମ ଗାଏବ୍ ହୋଇଗଲା, ଯାହାକି ୫ ହଜାର କୁଇଣ୍ଟାଲରୁ ଅଧିକ ହେବ। ଏଥିସହିତ ଚାଉଳ ପାଇବାରେ ହିତାଧିକାରୀ ସମସ୍ୟା ଭୋଗୁଛନ୍ତି। ଅକ୍ଟୋବର ଓ ନଭେମ୍ବରରେ ଖାଦ୍ୟ ନିଗମ ତରଫରୁ ୨୦ତାରିଖ ପରେ ରିଟେଲରଙ୍କୁ ଚାଉଳ ଯୋଗାଇ ଦିଆଗଲା। ପିଏସ୍ଓ ମେଶିନ ମାଧ୍ୟମରେ ସେମାନେ ଚାଉଳ ବାଣ୍ଟିବାକୁ ନିର୍ଦ୍ଦେଶନାମା ଥିବାବେଳେ ୨୫ ତାରିଖରୁ ସମ୍ପୃକ୍ତ ୱେବ୍ ପୋର୍ଟାଲ ସାଇଟ୍କୁ ବନ୍ଦ କରିଦିଆଗଲା। ଯେଉଁଥି ପାଇଁ ବଡ଼ଚଣା ବ୍ଲକ୍ର ଶାଳପଡ଼ା, ଦର୍ପଣ, ନଳୀପୁର, ବିକ୍ରମତିରଣ, ବରଦା ଭଳି ବହୁ ପଞ୍ଚୟତର ହିତାଧିକାରୀ ଚାଉଳ ପାଇବାରୁ ବଞ୍ଚତ୍ତ ହେଲେ। ଅଦ୍ୟାବଧି ସେମାନେ ଅକ୍ଟୋବରରୁ ଚାଉଳ ପାଇ ନାହାନ୍ତି। ଏପଟେ ଭାରତୀୟ ଖାଦ୍ୟ ନିଗମ ପଣ୍ୟାଗାରରେ ଚାଉଳ ଗଚ୍ଛିତ ନ ଥିବାରୁ ରିଟେଲରଙ୍କୁ ପରିବହନ ଠିକାଦାର ଚାଉଳ ଦେଉନାହାନ୍ତି। ଯେଉଁଥି ପାଇଁ ହିତାଧିକାରୀଙ୍କ ମଧ୍ୟରେ ଅସନ୍ତୋଷ ବଢିବାରେ ଲାଗିଛି। ୨ ମାସର ଗହମ ଗାଏବ ହେବା ଓ ଅକ୍ଟୋବରରୁ ଅଦ୍ୟାବଧି ଚାଉଳ ନ ମିଳିବା ନେଇ କେହି ସମୀକ୍ଷା କରୁ ନାହାନ୍ତି କିମ୍ବା ଏ ସମ୍ପର୍କରେ ସ୍ପଷ୍ଟ ମତ ଦେଉନାହାନ୍ତି। ଏ ସମ୍ପର୍କରେ ବଡ଼ଚଣା ବ୍ଲକ ଯୋଗାଣ ଅଧିକାରୀ ବିଶ୍ୱଜିତ୍ ମିଶ୍ରଙ୍କୁ ପଚାରିବାରେ ସେ କୁହନ୍ତି, ସରକାରଙ୍କ ତରଫରୁ ଏ ପର୍ଯ୍ୟନ୍ତ ୨ ମାସର ଗହମ ଆସିନାହିଁ। ତା’ ବଦଳରେ ଚାଉଳ ଦିଆଯିବକି ନାହିଁ ସେ ସମ୍ପର୍କିତ ନିର୍ଦ୍ଦେଶନାମା ମଧ୍ୟ ଦିଆଯାଇ ନାହିଁ। ଚାଉଳ ନ ପାଇବା ଘଟଣା ନେଇ ସେ ପ୍ରକାଶ କରିଛନ୍ତି ଯେ, କେତେକ ପଞ୍ଚାୟତରେ ଏଭଳି ଅସୁବିଧା ସୃଷ୍ଟି ହେଉଥିବା ଜଣାପଡ଼ିଛି। ଯେଉଁ ରିଟେଲରଙ୍କ ନିକଟରେ ଅଧିକ କାର୍ଡ ରହିଛି ସେମାନେ ବାଣ୍ଟିପାରିନାହାନ୍ତି।
