ବିଷମକଟକ,୫।୬(ଡି.ଏନ୍.ଏ.): ରାୟଗଡ଼ା ଜିଲା ବିଷମକଟକ ବ୍ଲକରେ ପୁଣି ଭତ୍ତାକୁ ନେଇ ବିବାଦ। କେନ୍ଦ୍ର ସରକାରଙ୍କ ଡିଜିଟାଲ ବ୍ୟବସ୍ଥା ଗରିବ ଲୋକଙ୍କ ପାଇଁ ସମସ୍ୟା ହୋଇଛି। ବ୍ୟାଙ୍କ ଖାତାରେ ସିଧାସଳଖ ଭତ୍ତା ଟଙ୍କା ଜମା ହେବା ବ୍ୟବସ୍ଥା ସଫଳ ହୋଇପାରୁନି। ବାର୍ଦ୍ଧକ୍ୟ ଭତ୍ତା, ଦିବ୍ୟାଙ୍ଗ ଭତ୍ତା ଓ ମଧୁବାବୁ ପେନସନ ପାଉଥିବା ହିତାଧିକାରୀ ଦୀର୍ଘ ଦିନ ଧରି ନିଜର ଭତ୍ତା ପାଉ ନ ଥିବା ଅଭିଯୋଗ ହୋଇଛି। ଆଦିବାସୀ ନେତା ତଥା ବିଏସ୍ପିର ଜିଲା ସଭାପତି ଜିତୁ ଜାକାସିକାଙ୍କ ନେତୃତ୍ୱରେ ନିୟମଗିରି ସମେତ ବହୁ ଆଦିବାସୀ ଗ୍ରାମର ହିତାଧିକାରୀ ବିଷମକଟକ ବିଡିଓଙ୍କୁ ଭେଟି ପୂର୍ବ ଭଳି ଅଫ୍ଲାଇନରେ ଭତ୍ତା ପ୍ରଦାନ କରିବା ପାଇଁ ଲିଖିତ ଭାବେ ଦାବି ଜଣାଇଛନ୍ତି।
ହିତାଧିକାରୀଙ୍କ ଅଭିଯୋଗ ହେଲା, କେଉଁଠି ଜମା ଖାତାରେ ତ୍ରୁଟି ଯୋଗୁ ଖାତାକୁ ଟଙ୍କା ଆସୁନାହି ତ ଆଉ କାହାର ଟିପି ଚିହ୍ନରେ ତାଳ ମେଳ ରହୁନାହିଁ। ଏହି କାରଣରୁ ଫଳରେ ଭତ୍ତା ଟଙ୍କା ପାଇବାରୁ ବଞ୍ଚିତ ହେଉଛନ୍ତି। ପୂର୍ବରୁ ଭତ୍ତା ବ୍ୟବସ୍ଥାରେ କୌଣସି ତ୍ରୁଟି ରହୁ ନ ଥିବାବେଳେ ଏବେ ଡିଜିଟାଲ ବ୍ୟବସ୍ଥାରେ ଅନେକ ତ୍ରୁଟି ରହୁଥିବା କହିଛନ୍ତି। ପୂର୍ବରୁ ବିଷମ କଟକ ବ୍ଲକ ଅଧୀନରେ ଥିବା ପ୍ରତ୍ୟେକ ପଞ୍ଚାୟତରେ ୧୫ ତାରିଖରେ ୧୫୫୨୪ ହିତାଧିକାରୀ ସହଜରେ ଭତ୍ତା ଟଙ୍କା ପାଉଥିଲେ। ବ୍ଲକ ପ୍ରଶାସନ ପକ୍ଷରୁ ଗାଁ ଗାଁ ରେ ଭତ୍ତା ଟଙ୍କା ପହଞ୍ଚାଉଥିଲେ। ଏବେ ଡିଜିଟାଲ ବ୍ୟବସ୍ଥାରେ ଭତ୍ତା ଟଙ୍କା ବ୍ୟଙ୍କ ଖାତାକୁ ସିଧାସଳଖ ଯିବା ସୁବିଧା କରିଛନ୍ତି। ହେଲେ ଏହାର ହିତାଧିକାରୀ ଏହାର ସୁଫଳ ପାଉ ନ ଥିବା କହିଛନ୍ତି। ସେହିପରି ଅଧିକାଂଶ ପଞ୍ଚାୟତରେ ମୋବାଇଲ ନେଟୱର୍କ ବ୍ୟବସ୍ଥା ନ ଥିବାବେଳେ ସେଠାରେ ଜନସେବା କେନ୍ଦ୍ର ଏବଂ ମିନି ବ୍ୟାଙ୍କ ବ୍ୟବସ୍ଥା ନାହିଁ। ଫଳରେ ମାତ୍ର ୫୦୦ ଏବଂ ୭୦୦ ଟଙ୍କା ଭତ୍ତା ପାଇବା ପାଇଁ ୨୦୦ ଟଙ୍କା ଖର୍ଚ୍ଚ କରି ଯିବାକୁ ପଡ଼ୁଛି ବୋଲି କହିଛନ୍ତି।
