ବ୍ରହ୍ମପୁର ଅଫିସ,୧୩।୫: ବ୍ରହ୍ମପୁର ମହାନଗର ନିଗମ (ବିଇଏମସି)ର ସାଧାରଣ ବୈଠକ ଶୁକ୍ରବାର ଅନୁଷ୍ଠିତ ହୋଇଯାଇଛି। ଗତ ବର୍ଷର ପୌର ନିର୍ବାଚନ ପରେ ନୂଆ ପରିଷଦ ଗଠନର ବର୍ଷେ ବିତିଛି ଓ ଏହି ସମୟ ଭିତରେ ଏହାକୁ ମିଶାଇ ମାତ୍ର ୩ଟି ସାଧାରଣ ବୈଠକ ହୋଇଥିବାରୁ ୱାର୍ଡଗୁଡ଼ିକର ସମସ୍ୟା ନେଇ ଆଲୋଚନା ହୋଇପାରୁ ନ ଥିବା ଦର୍ଶାଇ କେତେକ କର୍ପୋରେଟର ଅସନ୍ତୋଷ ପ୍ରକାଶ କରିଥିଲେ। ଅନ୍ୟପକ୍ଷରେ ବୈଠକର ଦିନକ ପୂର୍ବରୁ ଏଜେଣ୍ଡା ଦିଆଯାଇଥିବାରୁ ନିର୍ବାଚିତ ପ୍ରତିନିଧିମାନେ ଆଲୋଚନା ପାଇଁ ପ୍ରସ୍ତୁତ ହୋଇପାରୁନଥିବା ସଂଗୀନ ଅଭିଯୋଗ କରାଯାଇଥିଲା। ନିୟମ ପ୍ରକାରେ ପ୍ରତି ମାସେ ବା ଦୁଇ ମାସରେ ସାଧାରଣ ବୈଠକ ପାଇଁ ଦାବି କରାଯାଇଥିଲା। ମେୟର ସଂଘମିତ୍ରା ଦଳେଇ ଅଧ୍ୟକ୍ଷତା କରିଥିଲେ। ଏମ୍ପି ଚନ୍ଦ୍ରଶେଖର ସାହୁ ଓ ବିଧାୟକ ବିକ୍ରମ କୁମାର ପଣ୍ଡା ଉପସ୍ଥିତ ଥିଲେ। ମହାନଗରର ସର୍ବାଙ୍ଗୀନ ବିକାଶ ନିମନ୍ତେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସବୁ ପ୍ରକାର ସହଯୋଗ କରୁଛନ୍ତି। ତେଣୁ ଦଳମତ ନିର୍ବିଶେଷରେ କର୍ପୋରେଟରମାନେ ବିକାଶ ପ୍ରକ୍ରିୟାରେ ସାମିଲ ହେବାକୁ ଏମ୍ପି ଓ ବିଧାୟକ ଆହ୍ବାନ ଦେଇଥିଲେ।
ପ୍ରାରମ୍ଭରେ ଗତ ଡିସେମ୍ବର ୨୩ର ସାଧାରଣ ବୈଠକ ଏବଂ ଚଳିତ ବର୍ଷ ମାର୍ଚ୍ଚ ୨୯ରେ ଅନୁଷ୍ଠିତ ସ୍ବତନ୍ତ୍ର ବୈଠକର କାର୍ଯ୍ୟାବଳୀ ଦୃଢ଼ୀକରଣ କରାଯାଇଥିଲା। ବହୁ କୋଟି ଟଙ୍କା ବ୍ୟୟରେ କରାଯାଉଥିବା ବେଢ଼ା ବନ୍ଧ ପୁନରୁଦ୍ଧାର ଏବଂ ଆଧୁନିକୀକରଣ ଦ୍ୱାରା ଆଗାମୀ ଦିନରେ ଏହା ପ୍ରମୁଖ ପର୍ଯ୍ୟଟନସ୍ଥଳୀ ହେବ। ତେଣୁ ଅନ୍ଧପସରା ରୋଡ ଠାରୁ ବେଢ଼ା ବନ୍ଧ ପର୍ଯ୍ୟନ୍ତ ଥିବା ମାତ୍ର ୧୦ ଫୁଟିଆ ରାସ୍ତାକୁ ଓସାରିଆ କରାଯିବା ନିମନ୍ତେ ଘରୋଇ ଜମି ଅଧିଗ୍ରହଣ କରାଯିବାର ନିଷ୍ପତ୍ତି ନିଆଯାଇଛି। ଏହାର ଡିଟେଲ ରିପୋର୍ଟ ସପ୍ତାହକ ମଧ୍ୟରେ ପ୍ରସ୍ତୁତ କରିବାକୁ ବିଇଏମସି ଇଞ୍ଜିନିୟର ଓ ଅନ୍ୟ କର୍ମଚାରୀଙ୍କୁ ନିର୍ଦ୍ଦେଶ ଦିଆଯାଇଥିଲା।
ବିଭିନ୍ନ ପୋଖରୀ ପୁନରୁଦ୍ଧାର ପାଇଁ ପଦକ୍ଷେପ ନିଆଯାଇଛି। ତେବେ ପୁରାତନ କମାପଲ୍ଲୀ ପୋଖରୀ ପ୍ରତି ଅଣଦେଖା କରାଯାଇଥିବା ୩୨ନଂ ବିଜେଡି କର୍ପୋରେଟର ସୁରେନ୍ଦ୍ର ମହାରଣା ଅଭିଯୋଗ କରିଥିଲେ। ପ୍ରାୟ ୫୦ ଲକ୍ଷ ଟଙ୍କାର ଯୋଜନାକୁ କାହିଁକି କାର୍ଯ୍ୟକାରୀ କରାଯାଉନାହିଁ ବୋଲି ସେ ପ୍ରଶ୍ନ କରିଥିଲେ। ପୁଣି ରି’ଟେଣ୍ଡର ହେବ ଏବଂ କମାପଲ୍ଲୀ ବନ୍ଧ ଆଧୁନିକୀକରଣ କରାଯିବା ବୋଲି ମେୟର ଓ କମିଶନର ଜେ. ସୋନାଲ ଉତ୍ତର ରଖିଥିଲେ। ଅନ୍ୟପକ୍ଷରେ ପୌର ଗେଷ୍ଟ ହାଉସ ପଛପଟେ ଥିବା ବିସ୍ତୃତ ଜମି ପଡ଼ିଆ ପଡ଼ିଛି। ସେଠାରେ ନିଗମ ପକ୍ଷରୁ ମିଶନ ଶକ୍ତି ହବ୍ ନିର୍ମାଣ ପାଇଁ ସୁରେନ୍ଦ୍ର ଆଉ ଏକ ଦାବି କରିଥିଲେ। ଏସ୍ଏଚ୍ଜିର ପ୍ରସ୍ତୁତ ସମସ୍ତ ସାମଗ୍ରୀର କାରବାର ନିମନ୍ତେ ବଜାର ଖୋଲାଯିବାକୁ ସେ ପ୍ରସ୍ତାବ ଦେଇଥିଲେ। ଏହା ଉପରେ ବିଚାର କରାଯିବା ବୋଲି ମେୟର ଓ କମିଶନର ସୂଚାଇଥିଲେ। ଗତ ମାସ ଗୁଡ଼ିକର ଆୟ ଓ ବ୍ୟୟ ରିପୋର୍ଟ ବୈଠକରେ ଉପସ୍ଥାପିତ କରାଯାଇଥିଲା। ଟେବୁଲ ଏଜେଣ୍ଡାରେ ବିଭିନ୍ନ ପ୍ରସଙ୍ଗ ଉଠିଥିଲା। ପୌର ସଂସ୍ଥାର ଐତିହ୍ୟ ଗେଷ୍ଟ ହାଉସ (ଅତିଥି ଭବନ)କୁ ଦୁଇବର୍ଷ ତଳେ ସରକାରୀ ପରିଚାଳନା ସମୟରେ ଘରୋଇ ମାଲିକାନାକୁ ଦିଆଯାଇଥିବା ଲିଜ୍ ବାତିଲ ଲାଗି ଭାଜପା କର୍ପୋରେଟର ପ୍ରଦୀପ ଶତପଥୀ ଦାବି କରିଥିଲେ। ଏହାକୁ ବିଜେଡି କର୍ପୋରେଟର ସୁରେନ୍ଦ୍ର ମହାରଣା ଓ ଅନ୍ୟମାନେ ସମର୍ଥନ କରିଥିଲେ। ଲିଜ୍ଧାରୀ ଗେଷ୍ଟ ହାଉସ ନାମ ବଦଳାଇଥିବା ଏବଂ ଚୁକ୍ତିନାମା ଖିଲାପ କରୁଥିବା ବିରୋଧୀ ଓ ଶାସକ ଦଳ ଜନପ୍ରତିନିଧି ଅଭିଯୋଗ ବାଢ଼ିଥିଲେ। ତେବେ ଏହା ଉପରେ ମେୟର ଓ କମିଶନର ଟିପ୍ପଣୀ ଦେଇନଥିଲେ। ବିଭିନ୍ନ ପ୍ରସଙ୍ଗରେ ତ୍ରିପତି ପାତ୍ର, ପ୍ରଶାନ୍ତ ପଟ୍ଟନାୟକ, ବନିତା ସାହୁ, ସନ୍ଧ୍ୟାରାଣୀ ଶୁକ୍ଲ, ମମତା ପାତ୍ର, ନୀଳକଣ୍ଠ ସାହୁ, ଧୀରେଶ ସାବତ, ନରସିଂହ ସେଠୀ, ବବି ନାୟକ, ସମୀର ମିଶ୍ର, ଗୀତାରାଣୀ ପଣ୍ଡା, ଟି. କିଶୋର ପ୍ରମୁଖ ଆଲୋଚନା କରିଥିଲେ। ଡେପୁଟି ମେୟର ବିବେକ ରେଡି ଏବଂ ବିଇଏମ୍ସିର ଅଧିକାରୀ ଓ ଇଞ୍ଜିନିୟରମାନେ ଉପସ୍ଥିତ ଥିଲେ।
