ବ୍ରହ୍ମପୁର,୨୩ା୯ (ସ୍ମୃତି ରଞ୍ଜନ ମହାଲିକ): ବ୍ରହ୍ମପୁର ମହାନଗର ନିଗମ (ବିଇଏମସି) ପକ୍ଷରୁ ସହରର ୫ଟି ପୁରାତନ ରାସ୍ତାକୁ ସ୍ମାର୍ଟ ରାସ୍ତା ଭାବେ ନିର୍ମାଣ କରାଯାଇଛି। ସ୍ମାର୍ଟ ରାସ୍ତା ପ୍ରଶସ୍ତୀକରଣ ହୋଇଥିବା ବେଳେ ପାଦଚଲା ରାସ୍ତାରେ ପେଭର ବ୍ଲକ ପକାଯାଇଛି। ସ୍ମାର୍ଟ ରାସ୍ତା ପାର୍ଶ୍ୱରେ ସର୍ବସାଧାରଣଙ୍କ ବସିବା ନିମନ୍ତେ ସିମେଣ୍ଟ ଚେୟାର କରାଯାଇଛି। ସ୍ମାର୍ଟ ରାସ୍ତା କାର୍ଯ୍ୟ ବିଳମ୍ବରେ ହୋଇଥିଲେ ବି ସମସ୍ତ କାର୍ଯ୍ୟ ସରିଛି। ତେବେ ଏହାର ଉଚିତ ରକ୍ଷଣାବେକ୍ଷଣ କରାଯାଉ ନ ଥିବା ଦେଖିବାକୁ ମିଳିଛି। ସ୍ମାର୍ଟ ରାସ୍ତା ପାର୍ଶ୍ୱରେ ହୋଇଥିବା ଚେୟାର ଓ ଅନ୍ୟାନ୍ୟ ନିର୍ମାଣ କାର୍ଯ୍ୟ ଭାଙ୍ଗିରୁଜି ପଡିଛି।
ବ୍ରହ୍ମପୁର ସହରର ୧୦ଟି ପୁରାତନ ରାସ୍ତାକୁ ୨୩ କୋଟି ଟଙ୍କା ବ୍ୟୟରେ ସ୍ମାର୍ଟ ରାସ୍ତାରେ ପରିଣତ କରିବା ପାଇଁ ଯୋଜନା ହୋଇଥିଲା। ଏଥିମଧ୍ୟରୁ ୨୦୨୧ ଡିସେମ୍ବର ୨୬ରେ ବିଇଏମ୍ସି ପକ୍ଷରୁ ପ୍ରଥମ ପର୍ଯ୍ୟାୟରେ ୧୫ କୋଟି ବ୍ୟୟରେ ୫ଟି ସ୍ମାର୍ଟ ରାସ୍ତା ନିର୍ମାଣ ନିମନ୍ତେ ଶିଳାନ୍ୟାସ କରାଯାଇଥିଲା। ସେଥିମଧ୍ୟରୁ ୧୯ ନଂ ୱାର୍ଡ ଅନ୍ତର୍ଗତ ସୁବାରାଓ ଛକଠାରୁ ସେଣ୍ଟ ଭିନସେଣ୍ଟ ସ୍କୁଲ ରାସ୍ତା ଓ ଷ୍ଟେଟ ବ୍ୟାଙ୍କ ମୁଖ୍ୟ ଛକ ପାଇଁ ୫୩ ଲକ୍ଷ ୪୩ ହଜାର, ଅନ୍ନପୂର୍ଣ୍ଣା ମାର୍କେଟଠାରୁ ଭିଶାଲ ମେଗା ମାର୍ଟ ରାସ୍ତା ପାଇଁ ୩ କୋଟି ୮୦ ଲକ୍ଷ ୯୦ ହଜାର, ଜ୍ୟୋତି ପେଟ୍ରୋଲ ପମ୍ପଠାରୁ ଗାନ୍ଧୀନଗର ଛକ ରାସ୍ତା ପାଇଁ ୩ କୋଟି ୫ ଲକ୍ଷ, ଗାନ୍ଧୀନଗର ଉପର ଛକ ଖଲାସି ସାହିଠାରୁ ଗାନ୍ଧୀନଗର ଛକ ରାସ୍ତା ୨ କୋଟି ୧୦ ଲକ୍ଷ ଓ ୧୮ ନଂ ୱାର୍ଡ ଅନ୍ତର୍ଗତ ୫୯ ନଂ ଜାତୀୟ ରାଜପଥଠାରୁ ଭେଙ୍କେଟଶ୍ୱର ମନ୍ଦିର ସାହିଠାରୁ କପିଳେଶ୍ୱର ମନ୍ଦିର ରାସ୍ତାର ଉନ୍ନତୀକରଣ ପାଇଁ ଶିଳାନ୍ୟାସ କରାଯାଇଥିଲା। ଶିଳାନ୍ୟାସ ପରେ ୩ ମାସ ମଧ୍ୟରେ ୫ଟି ସ୍ମାର୍ଟ ରାସ୍ତା ନିର୍ମାଣ ସରିବା ନେଇ ଲକ୍ଷ୍ୟ ରଖାଯାଇଥିଲା। କିନ୍ତୁ ବିଇଏମସି ପକ୍ଷରୁ ଧାର୍ଯ୍ୟ ସମୟରେ ରାସ୍ତା କାର୍ଯ୍ୟ ସରିଲା ନାହିଁ। ଏହାପରେ ଅବଧି ବୃଦ୍ଧି କରାଗଲା। ଏଭଳି ଭାବେ ସ୍ମାର୍ଟ ରାସ୍ତା କାର୍ଯ୍ୟ ସରିବା ପାଇଁ ୧ ବର୍ଷରୁ ଉର୍ଦ୍ଧ୍ୱ ସମୟ ଲାଗିଲା। ତଥାପି କେତେକ ସଂପୂର୍ଣ୍ଣ ହୋଇଥିବା ସ୍ମାର୍ଟ ରାସ୍ତାରେ ଆନୁସଙ୍ଗିକ ସୁବିଧା ନ ଥିବା ଦେଖିବାକୁ ମିଳିଛି। ଏପରିକି ରାସ୍ତା ପାର୍ଶ୍ୱରେ ହୋଇଥିବା ବ୍ୟୟବହୁଳ କାର୍ଯ୍ୟ ଭାଙ୍ଗି ନଷ୍ଟ ହେବାକୁ ବସିଛି। ଷ୍ଟେଟ ବ୍ୟାଙ୍କ ମୁଖ୍ୟଛକରେ ହୋଇଥିବା ସିମେଣ୍ଟ ଚେୟାର ଭାଙ୍ଗି ପଡିଛି। ଏହି ରାସ୍ତାରେ ପ୍ରାୟ ୧୦ରୁ ଉର୍ଦ୍ଧ୍ୱ ସିମେଣ୍ଟ ଚେୟାର ରହିଛି। ପୂର୍ବାହ୍ନ ଓ ସନ୍ଧ୍ୟା ସମୟରେ ବହୁ ବରିଷ୍ଠ ନାଗରିକ ଓ ପଥ ଚାରୀ ଏଠାରେ ବସି ନିଜର ସମୟ ଅତିବାହିତ କରିଥାନ୍ତି। କିନ୍ତୁ ଦୀର୍ଘ ଦିନ ଧରି ଏହା ଭାଙ୍ଗି ରୁଜି ପଡିଥିବା ବେଳେ ଏହାର ନିର୍ମାଣ ଦିଗରେ ବିଇଏମସି କାୈଣସି ପଦକ୍ଷେପ ଗ୍ରହଣ କରୁ ନ ଥିବା ଅଭିଯୋଗ ହୋଇଛି। ଅନ୍ୟପଟେ ସ୍ମାର୍ଟ ରାସ୍ତା ଉପରେ ଉଠା ଦୋକାନୀମାନେ ବ୍ୟବସାୟ କରୁଥିବାରୁ ଅନେକ ସମୟରେ ଟ୍ରାଫିକ ଜାମ୍ ହେଉଛି। ତେଣୁ ସ୍ମାର୍ଟ ରାସ୍ତାରେ ଉଠା ଦୋକାନୀଙ୍କୁ ଉଚ୍ଛେଦ କରି ଉଚିତ ଜାଗାରେ ଥଇଥାନ କରିବାକୁ ଦାବି ହୋଇଛି। ଏ ନେଇ ବିଇଏମସି କନିଷ୍ଠ ଯନ୍ତ୍ରୀ ଶ୍ରୁତିକା ପାତ୍ରଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ରାସ୍ତା ପାର୍ଶ୍ୱରେ ଭାଙ୍ଗି ଯାଇଥିବା ଚେୟାର ମରାମତି ପାଇଁ ଠିକାଦାରଙ୍କୁ କୁହାଯାଇଛି। ଖୁବ ଶୀଘ୍ର ଏହାର ମରାମତି କରାଯିବ।
