କେସିଙ୍ଗା, ୧୧।୭ (ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଅନ୍ତର୍ଗତ କିନେରକେଲା ଗ୍ରାମରେ ଜଣେ ଚାଷୀଙ୍କ ତାର ବାଡ଼ରେ ଶନିବାର ସକାଳେ ଏକ ଭାଲୁ ଫସିଯାଇଥିବା ଦେଖିବାକୁ ମିଳିଛି। ତାର ବାଡ଼ରେ ଫସି ଭାଲୁଟି ଛଟପଟ ହେଉଥିବାରୁ ଗ୍ରାମବାସୀ ଭୟଭୀତ ହୋଇ ସେହି ଅଞ୍ଚଳକୁ ଯିବାକୁ ସାହସ କରି ନ ଥିଲେ। ପରେ କିନେରକେଲା ଗ୍ରାମବାସୀ କେସିଙ୍ଗା ବନ ବିଭାଗକୁ ଖବର ଦେଇଥିଲେ। ସୂଚନା ପାଇ ବନ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଭବାନୀପାଟଣାର ରାପିଡ୍ ରେସ୍କ୍ୟୁ ଟିମ୍କୁ ଅବଗତ କରାଇଥିଲେ।
ରାପିଡ୍ ରେସ୍କ୍ୟୁ ଟିମ୍ ଘଟଣାସ୍ଥଳରେ ପହଞ୍ଚି ପ୍ରଥମେ ଭାଲୁଟିକୁ ଟ୍ରାଙ୍କୁଲାଇଜର (ମୂର୍ଚ୍ଛାକାରୀ) ଇଞ୍ଜେକ୍ସନ ଦେଇ ଅଚେତ କରିଥିଲେ। ପରେ ଜାଲ ସାହାଯ୍ୟରେ ଭାଲୁକୁ ସୁରକ୍ଷିତ ଭାବେ ଉଦ୍ଧାର କରି ବଜରଗଡ଼ ଜଙ୍ଗଲରେ ଛାଡ଼ି ଦିଆଯାଇଥିଲା। ବନ ବିଭାଗର ଏହି ତ୍ୱରିତ ପଦକ୍ଷେପ ଯୋଗୁଁ ଭାଲୁଟିର ଜୀବନ ରକ୍ଷା ପାଇଥିବା ବେଳେ ଗ୍ରାମବାସୀମାନେ ମଧ୍ୟ ଆଶ୍ୱସ୍ତ ହୋଇଛନ୍ତି।
