ଦାରିଙ୍ଗବାଡି, ୩।୭ (ଅରୁଣ ସାହୁ): ଭୁବନେଶ୍ୱର ବିଏମସି କାର୍ଯ୍ୟାଳୟର ଉପକମିଶନରଙ୍କୁ ଆକ୍ରମଣ ଘଟଣାକୁ ନେଇ ରାଜ୍ୟର ଓଏଏସ ଏବଂ ଓଆରଏସ ଅଧିକାରୀମାନେ ସମୂହ ଛୁଟିରେ ଯାଇଥିବାବେଳେ ତାର ପ୍ରଭାବ କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଅଞ୍ଚଳରେ ଦେଖିବାକୁ ମିଳିଛି। ଘଟଣାକୁ ନେଇ ପ୍ରତିବାଦ ଜଣାଇବା ସହ ଏହିଭଳି ଆନ୍ଦୋଳନକୁ ଓହ୍ଲାଇଥିବାରୁ ଏବେ ବ୍ଲକ କାର୍ଯ୍ୟଳୟ ଓ ତହସିଲ କାର୍ଯ୍ୟାଳୟରେ ଗଦା ଗଦା ଫାଇଲ ପଡିରହିଛି। ଆଗକୁ ଉନ୍ନୟନ କାର୍ଯ୍ୟ ବଢୁ ନ ଥିବାବେଳେ ବିଭିନ୍ନ ସମସ୍ୟା ନେଇ ବ୍ଲକ କାର୍ଯ୍ୟାଳୟକୁ ଅଭିଯୋଗ କରିବାକୁ ଆସିଥିବା ଜନସାଧାରଣ ନିରାଶରେ ଫେରୁଛନ୍ତି।
ସୂଚନାଯୋଗ୍ୟ,ତହସିଲଦାର ଘଟଣା ପୂର୍ବରୁ କୌଣସି ଏକ ଟ୍ରେନିଂରେ ଯୋଗଦେବାକୁ ଯାଇଥିବାବେଳେ ଅତିରିକ୍ତ ତହସିଲଦାର ଦାୟିତ୍ୱରେ ରହିଥିଲେ। ସେ ମଧ୍ୟ ବିଏମସି ଘଟଣାରେ ପ୍ରତିବାଦ ଜଣାଇ ଛୁଟିରେ ରହିଛନ୍ତି। ବିଡିଓ ପ୍ରୀତିରଞ୍ଜନ ରଥ ମଧ୍ୟ ଛୁଟିରେ ଯାଇଥିବାରୁ ଏବେ ୨୫ଟି ପଞ୍ଚାୟତବାସୀ ହଇରାଣ ଭୋଗୁଛନ୍ତି। ଏନେଇ ବିଡିଓଙ୍କ ସହ ଯୋଗାଯୋଗ କରିବାରୁ ସେ ସଙ୍ଘର ନିଷ୍ପତି ପ୍ରକାରେ ସେ ଛୁଟିରେ ରହିଛନ୍ତି। ସଙ୍ଘ ଯାହା ନିଷ୍ପତି ଗ୍ରହଣ କରିବେ, ତାହା ପାଳନ କରିବେ ବୋଲି ସେ କହିଛନ୍ତି।
