ନୂଆଦିଲ୍ଲୀ,୧୦।୫: ବିସିସିଆଇ ଖୁବ ଶୀଘ୍ର ଏକ ନୂତନ କୋଚ୍ ପାଇଁ ଏକ ବିଜ୍ଞାପନ ପ୍ରକାଶ କରିବ। ବୁଧବାର ମୁମ୍ବାଇରେ ବିସିସିଆଇ ସଚିବ ଜୟ ଶାହା ଏହା ପ୍ରକାଶ କରିଛନ୍ତି।
ବିସିସିଆଇ ସଚିବ କହିଛନ୍ତି, “ରାହୁଲଙ୍କ କାର୍ଯ୍ୟକାଳ ଜୁନ୍ ପର୍ଯ୍ୟନ୍ତ ରହିଛି। ତେଣୁ ଯଦି ସେ ଭାରତୀୟ ଦଳ ସହିତ ଆଗକୁ ରହିବାକୁ ଚାହୁଁଛନ୍ତି, ତେବେ ସେ ଏହା କରିବାକୁ ମୁକ୍ତ।” ନୂତନ ପ୍ରଶିକ୍ଷକଙ୍କ ସହ ପରାମର୍ଶ ପରେ ବ୍ୟାଟିଂ, ବୋଲିଂ ଏବଂ ଫିଲ୍ଡିଂ କୋଚ୍ ଭଳି କୋଚିଂ କର୍ମଚାରୀଙ୍କ ଅନ୍ୟ ସଦସ୍ୟମାନେ ନିଷ୍ପତ୍ତି ନେବେ। ଏହି ସମୟରେ ଶାହା ଜଣେ ବିଦେଶୀ ପ୍ରଶିକ୍ଷକଙ୍କ ସମ୍ଭାବନାକୁ ଏଡ଼ାଇ ଦେଇନଥିଲେ ଏବଂ ଏହି ପ୍ରସଙ୍ଗକୁ ଖୋଲା ଛାଡିଥିଲେ।
ଏହା ସହିତ ସେ କହିଥିଲେ କି ଆମେ ଏହି ସମ୍ଭାବନାକୁ ଏଡାଇ ଦେଇପାରିବା ନାହିଁ ଯେ, ନୂଆ ପ୍ରଶିକ୍ଷକ ଭାରତୀୟ ହେବେ କି ବିଦେଶୀ। ଏହା କୋଚିଂ ନିଯୁକ୍ତି କମିଟିର ନିଷ୍ପତି ହେବ। ତେବେ ଇଂଲଣ୍ଡ ଏବଂ ପାକିସ୍ତାନ ପରି ଭାରତର ଅଲଗା ଅଲଗା ଫର୍ମାଟ ପାଇଁ ଭିନ୍ନ ଭିନ୍ନ ପ୍ରଶିକ୍ଷକ ହେବେ ନାହିଁ। କାରଣ ଭାରତରେ ବିରାଟ କୋହଲି, ରୋହିତ ଶର୍ମା ଏବଂ ଋଷଭଙ୍କ ଭଳି ଅନେକ ଖେଳାଳି ରହିଛନ୍ତି। ଯେଉଁମାନେ ଭିନ୍ନ ଭିନ ଫର୍ମାଟରେ ଖେଳିଥାନ୍ତି।
ଶାହା ନିଶ୍ଚିତ କରିଛନ୍ତି ଯେ ନୂତନ କୋଚ୍ ଦୀର୍ଘ ସମୟ ପାଇଁ ନିଯୁକ୍ତ ହେବେ ଏବଂ ପ୍ରାରମ୍ଭିକ ଅବଧି ତିନି ବର୍ଷ କାର୍ଯ୍ୟ କରିବେ।
ତେବେ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ରେ ଇମ୍ପାକ୍ଟ ପ୍ଲେୟାର ନିୟମ ଜାରି ରଖିବା ଉପରେ କୌଣସି ମନ୍ତବ୍ୟ ଦେଇ ନଥିଲେ ଏବଂ କ୍ୟାପଟେନ ଏବଂ କୋଚଙ୍କ ସହ ପରାମର୍ଶ ପରେ ନିଷ୍ପତ୍ତି ନିଆଯିବ ବୋଲି କହିଥିଲେ। ତେବେ ସେ ଏହି ନିୟମର ମହତ୍ତ୍ୱ ଉପରେ ଗୁରୁତ୍ୱାରୋପ କରିଛନ୍ତି ଯାହା ଦ୍ୱାରା ଦୁଇଜଣ ଅତିରିକ୍ତ ଭାରତୀୟ ଖେଳାଳିଙ୍କୁ ଆଇପିଏଲ୍ ଦଳର ଏକାଦଶରେ ରହିବାକୁ ଅନୁମତି ଦିଆଯାଇଛି।
